КЫРГЫЗ РЕСПУБЛИКАСЫНЫН КОНСТИТУЦИЯЛЫК МЫЙЗАМЫ
2021-жылдын 11-октябры № 122
Кыргыз Республикасынын Министрлер Кабинети жөнүндө
(КР 2024-жылдын 10-январындагы № 5, 2024-жылдын 12-январындагы № 12, 2025-жылдын 9-июнундагы № 112, 2025-жылдын 28-июлундагы № 161, 2025-жылдын 9-августундагы № 194 конституциялык Мыйзамдарынын редакциясына ылайык)
1-глава. Жалпы жоболор
1-берене. Жөнгө салуу предмети. Аткаруу бийлигинин органдарынын тутуму
1. Ушул конституциялык Мыйзам төмөнкүнү аныктайт:
1) Кыргыз Республикасынын Министрлер Кабинетин (мындан ары - Министрлер Кабинети), аткаруу бийлигинин башка органдарын түзүүнүн жана ишин уюштуруунун тартибин, алардын укуктук статусун;
2) Министрлер Кабинетинин мүчөлөрүнүн, аткаруу бийлигинин башка органдарынын жетекчилеринин, алардын орун басарларынын укуктарын, милдеттерин, жоопкерчилигин, укуктук коргоосун жана социалдык кепилдиктерин.
2. Аткаруу бийлигинин органдарынын тутумун төмөнкүлөр түзөт:
1) Кыргыз Республикасынын Президенти (мындан ары - Президент);
2) Министрлер Кабинети;
3) министрликтер жана мамлекеттик комитеттер;
4) администрациялык ведомстволор;
5) Президенттин облустардагы ыйгарым укуктуу өкүлдөрү (мындан ары -ыйгарым укуктуу өкүл);
6) жергиликтүү мамлекеттик администрациялар.
3. Президент аткаруу бийлигине башчылык кылат жана ишин жетектейт.
4. Президент Президентке караштуу мамлекеттик органдарды жана мекемелерди түзүүгө укуктуу.
2-берене. Министрлер Кабинетинин укуктук статусу