Тиркеме
		(Кыргыз Республикасынын Министрлер Кабинетинин 2022-жылдын 7-октябрындагы № 550 токтому менен бекитилди)

 

Аудиторлордун, аудитордук уюмдардын, кесиптик аудитордук

бирикмелердин бирдиктүү мамлекеттик реестрин

жүргүзүү тартиби

 

1. Жалпы жоболор

2. Бирдиктүү мамлекеттик реестрди жүргүзүү

3. Бирдиктүү мамлекеттик реестрде каттоо же каттоодон баш тартуу тартиби

4. Бирдиктүү мамлекеттик реестрде кайра каттоо жана катталууга тийиш болгон маалыматтардын өзгөртүүлөрү жөнүндө кабарлоо тартиби

5. Бирдиктүү мамлекеттик реестрден чыгаруу тартиби

6. Реестрдик жазуу

7. Реестрдик ишти жүргүзүү тартиби

8. Бирдиктүү мамлекеттик реестрге жана реестрдик иштерге жеткиликтүүлүк жана аларды сактоо

1. Жалпы жоболор

1. Ушул Аудиторлордун, аудитордук уюмдардын, кесиптик аудитордук бирикмелердин бирдиктүү мамлекеттик реестрин жүргүзүү тартиби (мындан ары - Тартип) Кыргыз Республикасындагы аудиторлордун, аудитордук уюмдардын, кесиптик аудитордук бирикмелердин жана ачык кызыкчылык субъекттеринин, ири ишкердик субъекттеринин аудитине жол берилген аудитордук уюмдардын бирдиктүү мамлекеттик реестрин жүргүзүү, мамлекеттик каттоо, каттоодон баш тартуу, кайра каттоо, андан чыгаруу талаптарын белгилейт.

2. Кыргыз Республикасындагы аудиторлордун, аудитордук уюмдардын, кесиптик аудитордук бирикмелердин бирдиктүү мамлекеттик реестри (мындан ары - Бирдиктүү мамлекеттик реестр) аудиторлордун, аудитордук уюмдардын, кесиптик аудитордук бирикмелердин жана ачык кызыкчылык субъекттеринин, ири ишкердик субъекттеринин аудитине жол берилген аудитордук уюмдардын электрондук системалаштырылган тизмегин билдирет, аны аудитордук ишти жөнгө салуучу жана аудиторлордун, аудитордук уюмдардын, кесиптик аудитордук бирикмелердин ишин контролдоочу ыйгарым укуктуу мамлекеттик орган (мындан ары - ыйгарым укуктуу мамлекеттик орган) жүргүзөт.

3. Аудиторлор, аудитордук уюмдар, кесиптик аудитордук бирикмелер жана ачык кызыкчылык субъекттеринин, ири ишкердик субъекттеринин аудитине жол берилген аудитордук уюмдар ыйгарым укуктуу мамлекеттик орган тарабынан аларды Бирдиктүү мамлекеттик реестрде каттоо жөнүндө чечим кабыл алынган датадан тартып ишти жүргүзүү укугуна ээ болот.

2. Бирдиктүү мамлекеттик реестрди жүргүзүү

4. Бирдиктүү мамлекеттик реестрди жүргүзүү аларга маалыматтарды (реестрдик жазууларды) киргизүүнү, Бирдиктүү мамлекеттик реестрге киргизилген маалыматтардын купуялуулугун сактоону, камсыздоону (Жекече мүнөздөгү маалымат жөнүндө Кыргыз Республикасынын мыйзамдарында белгиленген учурларда), ошондой эле реестрдик иштерди түзүүнү жана сактоону өзүнө камтыйт.

5. Бирдиктүү мамлекеттик реестрге реестрдик жазуулар ыйгарым укуктуу мамлекеттик органдын ыйгарым укуктуу кызмат адамы (мындан ары - кызмат адамы) тарабынан киргизилет, ал Бирдиктүү мамлекеттик реестрге киргизилүүчү маалыматтардын ишенимдүүлүгү үчүн жоопкерчилик тартат.