КЫРГЫЗ РЕСПУБЛИКАСЫНЫН МИНИСТРЛЕР КАБИНЕТИНИН ТЕСКЕМЕСИ

2025-жылдын 11-январы № 13-т

Мамлекеттик органдар жана жергиликтүү өз алдынча башкаруу органдары, мекемелер жайгашкан тарыхый-маданий мурас объекттеринин курамына кирген административдик имараттарды жана курулмаларды инвентаризациялоо жана баалоо, ошондой эле аларды инвестициялык долбоорлор үчүн сунуштоо максатында, “Тарыхый-маданий мурастарды коргоо жана пайдалануу жөнүндө” Кыргыз Республикасынын Мыйзамынын 36-статьясына, “Кыргыз Республикасынын Министрлер Кабинети жөнүндө” Кыргыз Республикасынын конституциялык Мыйзамынын 13, 17-беренелерине ылайык:

1. Мамлекеттик органдар жана жергиликтүү өз алдынча башкаруу органдары, мекемелер жайгашкан тарыхый-маданий мурас объекттерине кирген административдик имараттарды инвентаризациялоо жана баалоо боюнча ведомстволор аралык комиссия (мындан ары – Ведомстволор аралык комиссия) тиркемеге ылайык курамда түзүлсүн.

2. Ведомстволор аралык комиссия: 

1) мамлекеттик органдар жана жергиликтүү өз алдынча башкаруу органдары, мекемелер жайгашкан, XX кылымдагы тарыхый, шаар куруу жана архитектура эстеликтеринин статусуна ээ болгон административдик имараттарды жана курулмаларды инвентаризациялоону, тарыхый, илимий, көркөм жана башка маданий баалоону жүргүзсүн;

2) мамлекеттик органдар жана жергиликтүү өз алдынча башкаруу органдары, мекемелер тарыхый-маданий мурас объекттерин сактоону, сарамжалдуу пайдаланууну жана инвесторлорго ээликтен ажыратууну камсыз кылуу боюнча сунуштарды даярдасын;

3) 2025-жылдын 10-февралына чейин инвентаризациялоонун жана баалоонун жыйынтыгы боюнча инвесторлорго ээликтен ажыратуу үчүн конкреттүү сунуштарды жана мамлекеттик органдар жана жергиликтүү өз алдынча башкаруу органдары, мекемелер жайгашкан административдик имараттардын жана курулмалардын тизмесин Кыргыз Республикасынын Министрлер Кабинетинин кароосуна киргизсин.

3. Кыргыз Республикасынын Маданият, маалымат, спорт жана жаштар саясаты министрлиги Ведомстволор аралык комиссиянын катчылыгы болуп аныкталсын.

4. Кыргыз Республикасынын Маданият, маалымат, спорт жана жаштар саясаты министрлиги Кыргыз Республикасынын Министрлер Кабинетине караштуу Жер ресурстары, кадастр, геодезия жана картография боюнча мамлекеттик агенттик, Кыргыз Республикасынын Министрлер Кабинетине караштуу Архитектура, курулуш жана турак жай-коммуналдык чарба мамлекеттик агенттиги, Кыргыз Республикасынын Президентинин Иш башкармасы, Кыргыз Республикасынын Президентине караштуу Инвестициялар боюнча улуттук агенттик, Кыргыз Республикасынын Министрлер Кабинетине караштуу Мамлекеттик мүлктү башкаруу боюнча мамлекеттик агенттик менен биргеликте Бишкек шаарында жана башка калктуу конуштарда жайгашкан инвестициялык макулдашуулардын алкагында ээликтен ажыратылууга тийиш болгон административдик имараттардын жана курулмалардын тизмесин даярдасын жана аны Ведомстволор аралык комиссиянын кароосуна берсин.

5. Кыргыз Республикасынын Министрлер Кабинетине караштуу Архитектура, курулуш жана турак жай-коммуналдык чарба мамлекеттик агенттиги Бишкек шаарынын мэриясы менен биргеликте 2025-жылга чейинки мезгилге Бишкек шаарынын башкы планы жана Бишкек шаарынын тарыхый борборунун коргоо зоналары боюнча материалдарды, документтерди, маалыматтарды берсин.

6. Кыргыз Республикасынын Президентинин облустардагы ыйгарым укуктуу өкүлдөрү жана Ош шаарынын мэриясы жергиликтүү өз алдынча башкаруу органдары менен биргеликте өзүнүн аймагында жайгашкан тарыхый-маданий мурас объекттерине кирген административдик имараттар жана курулмалар боюнча Кыргыз Республикасынын Министрлер Кабинети менен инвесторлордун ортосунда түз сүйлөшүүлөр жолу менен түзүлүүчү инвестициялык макулдашуулардын алкагында аларды инвесторлорго ээликтен ажыратуу үчүн административдик имараттардын жана курулмалардын тизмесин даярдасын жана аны Ведомстволор аралык комиссияга берсин.

7. Ведомстволор аралык комиссия белгиленген тартипте маалымат суроого жана министрликтердин, административдик ведомстволордун, жергиликтүү мамлекеттик администрациялардын, жергиликтүү өз алдынча башкаруу органдарынын (макулдашуу боюнча) жана эксперттик коомчулуктун адистерин, ошондой эле көз карандысыз эксперттерди, архитекторду, тарыхчыны, реставраторду, искусство таануучуну жана компаниялардын баалоочуларын ишке тартууга укуктуу деп белгиленсин.

8. Аткаруу бийлигинин мамлекеттик органдарынын жана жергиликтүү өз алдынча башкаруу органдарынын (макулдашуу боюнча) жетекчилери Ведомстволор аралык комиссиянын суроо-талабы боюнча зарыл болгон маалыматты ыкчам тартипте берсин жана анын ишине ар тараптуу көмөк көрсөтсүн.

9. Бул тескеменин аткарылышын контролдоо Кыргыз Республикасынын Президентинин Администрациясынын Президенттин жана Министрлер Кабинетинин чечимдерин аткарууну контролдоо башкармалыгына жүктөлсүн.