Кыргыз Республикасынын

Министрлер Кабинетине караштуу Мамлекеттик салык кызматынын

05.08.2026-ж. № П-330 буйругуна

1-тиркеме

Алкоголдук продукцияны өндүрүүчүлөр тарабынан 1 000 декалитр продукцияга чийки заттын жана материалдардын чыгымдарынын ченемдерин түзүү жана жүргүзүү тартиби

1. Жалпы жоболор

1. Ушул Тартип алкоголдук продукцияны өндүрүүчүлөр тарабынан алкоголдук продукцияны өндүрүүдө колдонулуучу чийки заттын, негизги, көмөкчү жана таңгактоочу материалдардын чыгымдарынын ченемдерин түзүүгө, эсептөөгө, бекитүүгө, жүргүзүүгө, колдонууга, кайра карап чыгууга жана сактоого карата бирдиктүү талаптарды белгилейт.

2. Ушул Тартип Кыргыз Республикасынын аймагында алкоголдук продукцияны өндүрүүнү жүзөгө ашыруучу алкоголдук продукцияны өндүрүүчүлөргө жайылтылат.

3. Чийки заттын жана негизги материалдардын чыгымдарынын ченемдери даяр алкоголдук продукциянын 1000 декалитрине эсептелип белгиленет.

4. Көмөкчү жана таңгактоочу материалдардын чыгымдарынын ченемдери колдонулган материалдын мүнөзүнө жараша даяр алкоголдук продукциянын 1000 декалитрине жана/же 1000 бирдик керектөө идишине эсептөө менен белгилениши мүмкүн.

5. Чийки заттын жана материалдардын чыгымдарынын ченемдери алкоголдук продукцияны өндүрүүчүлөр тарабынан алкоголдук продукциянын ар бир аталышы, продукциянын түрү, күчтүлүүгү, рецептурасы жана зарыл болгон учурда керектөө идиштеринин түрү боюнча түзүлөт.

6. Чийки заттын жана материалдардын чыгымдарынын ченемдери төмөнкүдөй максаттарда колдонулат:

- өндүрүштүк эсептин аныктыгын камсыз кылуу;

- чийки затка, материалдарга жана жарым фабрикаттарга болгон керектөөнү пландаштыруу;

- чийки заттын жана материалдардын иш жүзүндөгү чыгымын контролдоо;

- продукциянын өздүк наркынын эсеби;

- иш жүзүндөгү чыгымдын бекитилген ченемдерден четтөөсүн аныктоо;

- этил спиртин, спирт камтыган чийки затты жана алкоголдук продукциянын башка компоненттерин пайдаланууну контролдоону камсыз кылуу;

- этил спиртин, алкоголдук жана спирт камтыган продукцияны өндүрүү жана жүгүртүү жаатында мамлекеттик контролду жүзөгө ашыруу.

7. Чийки заттын жана материалдардын чыгымдарынын ченемдери ушул Тартиптин талаптарын, Кыргыз Республикасынын технологиялык регламенттерди, рецептураларды, ченемдик укуктук актыларын жана алкоголдук продукцияны өндүрүүнү эсепке алууга талаптарды сактоо менен алкоголдук продукцияны өндүрүүчү тарабынан өз алдынча иштелип чыгат жана бекитилет.

8. Чийки заттын жана материалдардын чыгымдарынын ченемдери документ түрүндө таризделиши, эсептөөлөр менен негизделиши жана технологиялык документтер менен тастыкталышы керек.

9. Алкоголдук продукцияны өндүрүүчү бекитилген чийки заттын жана материалдардын чыгымдарынын ченемдеринин сакталышын камсыз кылууга жана аларды мамлекеттик контролду жүргүзүүдө ыйгарым укуктуу мамлекеттик органга берүүгө милдеттүү .

2. Терминдер жана аныктамалар

10. Ушул Тартипте төмөнкүдөй терминдер колдонулат:

1) чийки заттын жана материалдардын чыгымдарынын ченеми – рецептураны, өндүрүш технологиясын, табигый азаюу ченемдерин жана технологиялык негизделген жоготууларды эске алуу менен алкоголдук продукцияны өндүрүү үчүн керектүү чийки заттын, жарым фабрикаттардын, көмөкчү жана таңгактоочу материалдардын өндүрүүчү тарабынан белгиленген саны;

2) чийки зат – алкоголдук продукцияны өндүрүүдө колдонулуучу этил спирти, спиртти камтыган чийки зат, суу, кант, шарап материалдары, дистилляттар, ширелер, морстор, тундурмалар, жыпар жыттуу спирттер, экстракттар, тамак-аш кислоталары, жыт бергичтер, боёктор жана башка компоненттер;

3) материалдар – алкоголдук продукцияны өндүрүү жана тариздөө процессинде колдонулуучу көмөкчү, фильтрлөөчү, таңгактоочу жана башка материалдар;

4) жарым фабрикаттар – алкоголдук продукцияны өндүрүүдө колдонулуучу өз өндүрүшүнүн же сатып алынган өндүрүштүн орто аралык продуктулары;

5) технологиялык жоготуулар – өндүрүштүн белгиленген технологиясын сактоодо пайда болгон жана бекитилген ченемдерде каралган чийки заттын, материалдардын, жарым фабрикаттардын же продукциянын жоготуулары;

6) этил спиртинин табигый азаюусу – белгиленген эрежелер жана технологиялык режимдер сакталган шартта этил спиртин сактоо, жылдыруу, технологиялык иштетүү жана башка операцияларды жүргүзүү учурунда келип чыккан физикалык-химиялык процесстердин натыйжасында этил спиртинин көлөмүнүн азаюусу.

7) ченемден ашык чыгым – технологиялык негизделген жоготуулар жана табигый азаюу ченемдери менен ырасталбаган, бекитилген ченемден ашык чийки заттын жана материалдардын чыгымы;

8) технологиялык негизделген керектөө – рецептуранын, технологиялык регламенттин, табигый азаюу ченемдеринин, технологиялык жоготуулардын ченемдеринин, жабдуулардын мүнөздөмөлөрүнүн жана өндүрүш шарттарынын негизинде аныкталган алкоголдук продукцияны өндүрүү үчүн чийки заттын жана материалдардын эсептик саны;

9) контролдук четтөө – кошумча талдоону жана документтик негиздемени талап кылган чийки заттын жана материалдардын бекитилүүчү ченеминин же иш жүзүндө чыгымдарынын эсептелген технологиялык негизделген керектөөдөн четтөөсү.

3. Ченемдөө объектилери

11. Төмөнкүлөр ченемделүүгө тийиш:

- этил спирти;

- спирт камтыган чийки зат;

- дистилляттар;

- шарап материалдары;

- даярдалган суу;

- кант, кант сиробу жана кант камтыган башка компоненттер;

- ширелер, морстор, тундурмалар, экстракттар, жыпар жыттуу спирттер;

- тамак-аш кислоталары, жыт бергичтер, боёктор жана рецептуранын башка компоненттери;

- көмөкчү материалдар;

- фильтрлөөчү материалдар;

- тыгындоо каражаттары;

- керектөө идиши;

- этикеткалык продукция;

- Кыргыз Республикасынын мыйзамдарына ылайык колдонулуучу акциздик же башка милдеттүү маркалоо каражаттары;

- транспорттук жана топтук таңгак;

- алкоголдук продукцияны өндүрүүдө колдонулуучу башка чийки зат жана материалдар.

4. Ченемдерди түзүү принциптери

12. Чийки заттын жана материалдардын чыгымдарынын ченемдери төмөнкүдөй болушу керек:

– технологиялык жактан негизделген;

– документ түрүндө ырасталган;

– ушул Тартип менен аныкталган бирдиктүү эсептик базасына эсептелген;

– өндүрүштүк, кампалык жана бухгалтердик эсептин маалыматтары менен салыштырмалуу;

– актуалдуу жана колдонуудагы рецептураларга жана технологиялык регламенттерге ылайык келген;

– мамлекеттик контролду жүзөгө ашырууда текшерилүүчү;

– технологиялык жактан негизделген керектөөлөрдөн ашпаган.

13. Ченемдерди түзүүдө төмөнкүлөр эске алынат:

– продукциянын бекитилген рецептурасы;

– технологиялык регламент, технологиялык нускама;

– продукциянын күчтүлүүгү;

– суусуз спирттин курамы;

– спирт камтыган компоненттердин көлөмү жана курамы;

– чийки заттын жана жарым фабрикаттардын сапатынын көрсөткүчтөрү;

– этил спиртинин табигый азаюунун бекитилген ченеми;

– технологиялык жоготуулардын бекитилген ченеми;

– колдонулуучу жабдуулар;

– иштеп чыгуу, фильтрлөө, жетилтүү жана куюу ыкмасы;

– керектөө идишинин көлөмү жана түрү;

– таңгактын жана маркалоонуну түрү;

– өндүрүштүн иш жүзүндөгү шарттары.

14. Рецептура, технологиялык регламент, табигый азаюу ченеми, технологиялык жоготуулар ченеми же өндүрүүчүнүн эсептөөлөрү менен ырасталбаган запас менен ченемдер түзүлбөйт.

15. Рецептуралык керектөө менен бекитилген ченемдин ортосунда айырмачылык болгон учурда, өндүрүүчү мындай айырмачылыктын себептерин кошумча эсептөө негиздемесин түзүүгө милдеттүү.

5. Чийки заттын жана материалдардын чыгымынын ченемдерине карата чектүү талаптар

16. Чийки заттын жана материалдардын чыгымынын ченемдери төмөнкүлөрдөн улам эсептелген технологиялык негизделген керектөөдөн ашпоого тийиш:

– бекитилген рецептура;

– технологиялык регламент;

– даяр продукциянын күчтүлүүгү;

– даяр продукциянын көлөмү;

– табигый азаюунун бекитилген ченеми;

– технологиялык жоготуулардын бекитилген ченеми;

– көмөкчү жана таңгактоочу материалдардын чыгымынын ченемдери;

– колдонулган жабдуулардын жана технологиялык процесстердин өзгөчөлүктөрү.

17. Этил спиртинин чыгымынын ченеми даяр продукцияда камтылган суусуз спирттин санына таянып, табигый азаюунун жана технологиялык жоготуулардын бекитилген ченемдерин эске алуу менен аныкталат.

18. Этил спиртин чыгымдоо ченеми даяр алкоголдук продукциянын курамындагы абсолюттук спирттин көлөмүнүн негизинде аныкталат жана төмөнкүлөрдүн жалпы суммасынан ашпоого тийиш:

– даяр продукцияда камтылган суусуз спирттин саны;

– бекитилген ченемдердин чегинде этил спиртинин табигый азаюусунун;

– бекитилген ченемдердин чегинде этил спиртин технологиялык жоготууларынын;

– куюу учурундагы жоготулар, эгерде мындай жоготуулар технологиялык регламентте жана бекитилген ченемдерде каралса.

19. Этил спиртинин чыгымынын ченемине төмөнкүлөрдү киргизүүгө жол берилбейт:

– авариялардан келип чыгуучу жоготуулар;

– жабдуулардын бузулушунан улам агып кетүү;

– уурдоо;

– жетишпестиктер;

– технологиялык режимдин бузулушунан улам жоготуулар;

– туура эмес сактоодон улам жоготуу;

– технологиялык режимдин бузулушунан улам өндүрүштүк брактан келип чыккан жоготуулар;

– дозалоо каталарынан улам жоготуулар;

– бекитилген технологиялык документтерде каралбаган башка жоготуулар.

20. Спирт камтыган компоненттердин чыгымынын ченемдери тийиштүү компонент киргизген суусуз спирттин санына, компоненттин рецептурасынын санына, анын күчтүлүүгүнө, технологиялык жоготууларына жана эгерде алар тиешелүү компонентке колдонулса, табигый азаюунун ченемдерине жараша аныкталат.

21. Суунун, канттын, кант сиробунун, кычкылдыктардын, жыт бергичтердин, боектордун, ширелердин, морстордун, тундурмалардын, экстракттардын жана башка компоненттердин чыгымынын ченемдери бекитилген рецептурага, компоненттин концентрациясына, технологиялык регламентке жана технологиялык негизделген жоготууларга жараша аныкталат.

22. Көмөкчү жана таңгактоочу материалдардын чыгымынын ченемдери аларды колдонуунун технологиялык зарылдыгына, жабдуунун мүнөздөмөлөрүнө, чыгаруунун көлөмүнө, керектөө идишинин сыйымдуулугуна, таңгактын түрүнө жана куюуда жана таңгактоодо технологиялык негизделген жоготууларга жараша аныкталат.

23. Өндүрүүчү тарабынан бекитилген ченемди технологиялык негизделген керектөөдөн ашып кетүүгө документтик эсептөө жана технологиялык негиздеме болгондо гана жол берилет.

24. Ыйгарым укуктуу мамлекеттик орган тарабынан чийки заттын жана материалдардын чыгымынын ченемдерин негизсиз жогорулатуу белгилери аныкталганда, өндүрүүчү эсептөөлөрдү, технологиялык документтерди, өндүрүштүк эсепке алуу маалыматтарын жана бекитилген ченемдердин негиздүүлүгүн ырастаган башка документтерди берүүгө милдеттүү.

6. Ченемдерди эсептөө үчүн баштапкы маалыматтар

25. Ченемдерди эсептөө үчүн төмөнкүлөр пайдаланылат:

– технологиялык регламенттер;

– технологиялык нускамалар жана рецептуралар;

– продукцияга карата талаптарды аныктаган уюмдун стандарттары, техникалык шарттар жана башка документтер;

– шайкештик жөнүндө декларациялар, шайкештик сертификаттары;

– лабораториялык контролдун маалыматтары;

– өндүрүштүк эсепке алуу маалыматтары;

– иш жүзүндөгү жоготуулар жөнүндө маалыматтар;

– инвентаризациялоонун маалыматтары;

– жабдуулардын паспорттору жана техникалык документтери;

– мурунку мезгилдер үчүн чийки заттын жана материалдардын иш жүзүндөгү чыгымы жөнүндө маалыматтар;

– табигый азаюунун бекитилген ченемдери;

– технологиялык жоготуулардын бекитилген ченемдери.

26. Жетиштүү иш жүзүндөгү маалыматтар жок болгон учурда, ченем иш жүзүндөгү өндүрүштүн жыйынтыктары боюнча кийин тактоо менен эсептөө методу аркылуу белгилениши мүмкүн.

7. Ченемдерди эсептөө методикасы

27. Чийки заттын жана материалдардын чыгымынын ченемдерин эсептөө бекитилген рецептуранын, технологиялык регламенттин, технологиялык нускаманын, табигый азаюунун ченемдеринин, технологиялык жоготуу ченемдеринин жана өндүрүштүн иш жүзүндөгү шарттарынын негизинде жүргүзүлөт.

28. Чийки заттын же материалдын белгилүү бир түрүнүн чыгымынын ченеми мындай чийки заттын же материалдын рецептуралык санынын жана технологиялык негизделген жоготууларынын негизинде аныкталат.

29. Суусуз спирттин санын, иш жүзүндөгү күчтүүлүктөгү спирттин чыгымын, спирт камтыган компоненттердин, көмөкчү жана таңгактоочу материалдарынын чыгымын эсептөө ушул Тартиптин 1-тиркемесине ылайык чийки заттын жана материалдардын чыгымдарынын ченемдеринин эсептөө барагында чагылдырылат.

30. Спирт камтыган компоненттер пайдаланылганда ар бир компоненттеги суусуз спирттин саны өзүнчө аныкталат жана этил спиртинин жалпы чыгымын эсептөөдө эске алынат.

31. Бекитилүүчү ченемди эсептик технологиялык негизделген керектөөдөн четтөө болгон учурда өндүрүүчү ушул Тартиптин 2-тиркемесине ылайык кошумча эсептик негиздемени тариздейт.

8. Контролдук четтөөлөр жана ченемдерди кошумча негиздөө

32. Эгерде өндүрүүчү тарабынан бекитилген чийки заттын же материалдардын чыгымынын ченеми эсептик технологиялык негизделген керектөөдөн ашып кетсе, өндүрүүчү кошумча эсептик негиздемени тариздөөгө милдеттүү.

33. Кошумча эсептик негиздеме төмөнкүлөрдү камтууга тийиш:

– продукциянын аталышы;

– продукциянын түрү;

– продукциянын күчтүүлүгү;

– чийки заттын же материалдын рецептуралык саны;

– эсептик технологиялык негизделген керектөө;

– бекитилүүчү ченем;

– четтөөнүн өлчөмү;

– четтөөнүн себептери;

– технологиялык регламентке, рецептурага, сыноолук иштеп чыгуу актыларына, өндүрүштүк эсепке алуу маалыматтарына же башка ырастоочу документтерге шилтемелер;

– өндүрүүчүнүн жооптуу кызмат адамдарынын кол тамгалары.

34. Бекитилген ченемди эсептик технологиялык негизделген керектөөдөн четтөө объективдүү технологиялык себептер болгон учурда гана жол берилет.

Технологиялык режимдин бузулушунун натыйжасында келип чыккан авариялар, жабдуулардын бузулушу, чыгып кетүүлөр, уурдоолор, жетишпестиктер, технологиялык режимдин бузулушу, персоналдын каталары, эсепке алуудагы каталар жана өндүрүштүк брак объективдүү технологиялык себептер деп таанылбайт.

35. Кошумча эсептик негиздеме жок болгон учурда ченемдин эсептик технологиялык негизделген керектөөдөн ашуусу негизсиз деп эсептелет.

9. Өндүрүүчү тарабынан ченемдерди иштеп чыгуу жана бекитүү

36. Чийки заттын жана материалдардын чыгымынын ченемдерин иштеп чыгуу алкоголдук продукцияны өндүрүүчү тарабынан өз алдынча жүргүзүлөт.

37. Ченемдерди иштеп чыгууга өндүрүштүк-технологиялык бөлүк, лаборатория, бухгалтерия, экономикалык кызмат, кампалык бөлүк жана зарылдыгына жараша өндүрүүчүнүн башка бөлүктөрү катышат.

38. Ченемдерди иштеп чыгуу төмөнкүлөрдү камтыйт:

– ченемдөөгө тийиш болгон продукцияны аныктоо;

– рецептураны жана технологиялык документтерди изилдөө;

– ченемделүүчү чийки заттын жана материалдардын тизмегин аныктоо;

– баштапкы маалыматтарды чогултуу;

– чийки заттын жана материалдардын чыгымын эсептөө;

– технологиялык негизделген жоготууларды эсептөө;

– ченемдин чектик талаптарга шайкештигин текшерүүнү;

– эсептөө барагын тариздөө;

– четтөөлөр болгон учурда кошумча эсептик негиздемени тариздөө;

– ченемдин долбоорун макулдашуу;

– ченемди өндүрүүчүнүн жетекчиси же ыйгарым укуктуу жак тарабынан бекитилиши;

– ченемди ченемдердин тизмегине киргизүү.

39. Ченем алкоголдук продукцияны өндүрүүчүнүн буйругу, тескемеси же башка ички документи менен бекитилет.

Ченем бекитилгенге чейин сыноолук же контролдук иштеп чыгууларды кошпогондо, чийки затты жана материалдарды эсептен чыгарууда колдонууга жол берилбейт.

10. Ченемдерди документтик тариздөө

40. Ченемдерди иштеп чыгуунун жыйынтыгы боюнча өндүрүүчү төмөнкү документтерди тариздейт:

– ченемдин эсептөө барагы;

– четтөөлөр болгон учурда кошумча эсептик негиздеме;

– макулдашуу барагы;

– ченемди бекитүү жөнүндө буйрук жана тескеме;

– чийки заттын жана материалдардын чыгымынын ченемдеринин тизмеги.

41. Чийки заттын жана материалдардын чыгымынын ченеминин эсептөө барагы ушул Тартиптин 1-тиркемесине ылайык форма боюнча таризделет.

42. Чийки заттын жана материалдардын чыгымдоо ченеминин эсептик технологиялык негизделген керектөөдөн четтөөсүн кошумча эсептик негиздемеси ушул Тартиптин 2-тиркемесине ылайык форма боюнча таризделет.

Технологиялык документтерде каралбаган негизсиз, авариялык, ченемден ашык же башка жоготууларды ченемдерге киргизүүгө жол берилбейт.

43. Чийки заттын жана материалдардын чыгымынын ченемдеринин тизмеги ушул Тартиптин 3-тиркемесине ылайык форма боюнча жүргүзүлөт.

Ушул Тартиптин 1–3-тиркемелеринде каралган формалар өндүрүштүн өзгөчөлүктөрүн эске алуу менен, аталган формаларда каралган маалыматтар сакталган шартта, алкоголдук продукцияны өндүрүүчү тарабынан толукталышы мүмкүн.

11. Ченемдердин тизмегин жүргүзүү

44. Алкоголдук продукцияны өндүрүүчү чийки заттын жана материалдардын чыгымынын ченемдеринин тизмегин жүргүзөт.

45. Тизмекте төмөнкүлөр көрсөтүлөт:

– ченемдин каттоо номери;

– продукциянын аталышы;

– продукциянын түрү;

– продукциянын күчтүүлүгү;

– керектөө идишинин көлөмү;

– ченем бекитилген дата;

– ченем күчүнө кирген дата;

– колдонуу мөөнөтү;

– ченемдин статусу;

– ченемди иштеп чыгуунун, өзгөртүүнүн же жокко чыгаруунун негизи;

– эсептик технологиялык негизделген керектөөдөн четтөө болгон учурда кошумча эсептик негиздеменин болушу.

46. Тизмек кагаз жүзүндө жана/же электрондук формада жүргүзүлөт.

Бекитилген ченемдер ыйгарым укуктуу мамлекеттик орган тарабынан текшерүү жүргүзүү үчүн жеткиликтүү болууга тийиш.

12. Ченемдерди колдонуу

47. Бекитилген ченемдер төмөнкү учурларда колдонулат:

– чийки затты жана материалдарды сатып алууну пландаштырууда;

– чийки затты жана материалдарды өндүрүшкө берүүдɵ;

– чийки затты жана материалдарды эсептен чыгарууда;

– өндүрүштүк отчетторду тариздөөдө;

– алкоголдук продукциянын өздүк наркын эсептөөдө;

– иш жүзүндөгү чыгымдын ченемдик чыгымдан четтөөсүн талдоодо;

– инвентаризациялоо жүргүзүүдө;

– мамлекеттик контролду жүзөгө ашырууда.

48. Чийки заттын жана материалдардын иш жүзүндөгү чыгымы продукциянын ар бир партиясы же отчеттук мезгил боюнча бекитилген ченемдер менен салыштырылат.

49. Чийки заттын жана материалдардын ченемден ашык чыгымы документтик тариздөөгө, себептерин талдоого жана өндүрүүчүнүн ички документтерине жана Кыргыз Республикасынын мыйзамдарына ылайык чараларды көрүүгө жатат.

Ченемден ашык чыгым тиешелүү эсептөө жана технологиялык негиздеме болбосо, ченемдик чыгым катары таанылбайт.

13. Ченемдерди кайра карап чыгуу

50. Чийки заттын жана материалдардын чыгымынын ченемдери төмөнкү учурларда кайра карап чыгууга жатат:

– рецептура өзгөргөндө;

– продукциянын күчтүүлүгү өзгөргөндө;

– технологиялык регламент өзгөргөндө;

– колдонулуучу жабдуулар өзгөргөндө;

– чийки заттын түрү же сапаты өзгөргөндө;

– куюунун форматы же таңгактын түрү өзгөргөндө;

– табигый азаюу ченемдери өзгөргөндө;

– технологиялык жоготуулардын ченемдери өзгөргөндө;

– иш жүзүндөгү чыгымдын бекитилген ченемден туруктуу четтөөлөрү аныкталганда;

– инвентаризациялоонун жыйынтыгы боюнча;

– ченемдердин негизсиз жогорулашынын белгилери аныкталганда ыйгарым укуктуу мамлекеттик органдын талабы боюнча;

– алкоголдук продукцияны өндүрүүчүнүн чечими боюнча.

51. Ченемдерди кайра карап чыгуу ченемдин жаңы редакциясы же өзгөртүүлөр баракчасы менен таризделет.

Күчүн жоготкон ченемдер жараксыз статусуна өткөрүлөт жана өндүрүүчү тарабынан ички документтерде белгиленген тартипте сакталат.

14. Ыйгарым укуктуу мамлекеттик органдын контролу

52. Ыйгарым укуктуу мамлекеттик орган мамлекеттик контролду жүзөгө ашырууда төмөнкүлөрдү текшерүүгө укуктуу:

– чийки заттын жана материалдардын чыгымынын бекитилген ченемдеринин болушун;

– ченемдердин тизмегинин болушун;

– ченемдердин рецептураларга жана технологиялык регламенттерге шайкештигин;

– эсептөө барактарынын болушун;

– четтөөлөр болгон учурда кошумча эсептик негиздеменин болушун;

– ченемдердин ушул Тартипте белгиленген чектүү талаптарга шайкештигин;

– өндүрүштүк эсепке алууда ченемдердин иш жүзүндө колдонулушун;

– чийки заттын жана материалдардын иш жүзүндөгү чыгымы жөнүндө маалыматтарды;

– ченемден ашык чыгымдын себептерин;

– ченемдерди кайра карап чыгуунун өз убагында жүргүзүлүшүн.

53. Ченемдердин негизсиз жогорулашынын белгилери аныкталганда, ыйгарым укуктуу мамлекеттик орган өндүрүүчүдөн рецептураларды, технологиялык регламенттерди, технологиялык нускамаларды, стандарттарды, техникалык шарттарды, эсептөө барактарын, контролдук сыноолук иштеп чыгуу актыларын, өндүрүштүк эсепке алуу маалыматтарын, лабораториялык контролдун маалыматтарын, инвентаризациялоо актыларын жана ченемдердин негиздүүлүгүн ырастоочу башка документтерди талап кылууга укуктуу.

54. Жетиштүү негиздеме жок болсо, ыйгарым укуктуу мамлекеттик орган өндүрүүчүгө тиешелүү ченемди кайра карап чыгуу жөнүндө талап кылууга укуктуу.

15. Ыйгарым укуктуу мамлекеттик органдын ченемдерди кайра карап чыгуу жөнүндө талабын кароо тартиби

55. Ченемди кайра карап чыгуу жөнүндө талап алкоголдук продукцияны өндүрүүчүгө аны алуу фактысын жана датасын ырастоого мүмкүндүк берүүчү ыкма менен кагаз жүзүндө жана/же электрондук формада жөнөтүлөт.

56. Ченемди кайра карап чыгуу жөнүндө талап төмөнкүлөрдү камтууга тийиш:

– алкоголдук продукцияны өндүрүүчүнүн аталышы;

– кайра карап чыгууга тийиш болгон ченемдин аталышы;

– талаптын багытынын негиздери;

– ченемдин негизсиз жогорулашынын аныкталган белгилеринин баяндалышы;

– маселени кароо үчүн зарыл болгон документтердин жана маалыматтардын тизмеги;

– талапты кароо мөөнөтү.

57. Алкоголдук продукцияны өндүрүүчү ченемди кайра карап чыгуу жөнүндө талапты аны алган күндөн тартып 15 жумуш күндүн ичинде карайт.

58. Кошумча документтерди алуу, эсептешүүлөрдү, контролдук өлчөөлөрдү же өндүрүштүк маалыматтарды талдоону жүргүзүү зарыл болгон учурда талапты кароо мөөнөтү өндүрүүчү тарабынан 10 жумуш күндөн ашпаган мөөнөткө ыйгарым укуктуу мамлекеттик органга узартуунун себептери жөнүндө кабарлоо менен узартылышы мүмкүн.

59. Талапты кароонун жыйынтыгы боюнча алкоголдук продукцияны өндүрүүчү төмөнкү чечимдердин бирин кабыл алат:

– тиешелүү ченемди кайра карап чыгуу жөнүндө;

– колдонуудагы ченемди кошумча эсептөө жана технологиялык негиздемени берүү менен сактоо жөнүндө;

– аны кайра карап чыгуу үчүн негиздер жок болсо, баш тартуунун себептерин көрсөтүү менен ченемди кайра карап чыгуудан баш тартуу жөнүндө.

60. Алкоголдук продукцияны өндүрүүчүнүн чечими өндүрүүчүнүн буйругу, тескемеси, комиссиянын протоколу менен таризделет.

61. Ченемди кайра карап чыгуу жөнүндө чечим кабыл алынган учурда өндүрүүчү жаңы ченемди же колдонуудагы ченемге өзгөртүү баракчасын бекитет жана чийки заттын жана материалдардын чыгымынын ченемдеринин тизмегине тиешелүү маалыматтарды киргизет.

62. Колдонуудагы ченем сакталган учурда өндүрүүчү ырастоочу документтерди тиркөө менен кошумча эсептөө жана технологиялык негиздемени тариздейт.

63. Ченемди кайра карап чыгуудан баш тартууда өндүрүүчү баш тартуунун жүйөлөрүн көрсөтүүгө жана колдонуудагы ченемдин негиздүүлүгүн ырастоочу документтерди тиркөөгө милдеттүү.

64. Өндүрүүчү чечим кабыл алынган күндөн тартып 3 жумуш күндүн ичинде ыйгарым укуктуу мамлекеттик органга кабыл алынган чечим жөнүндө кабарлайт.

65. Кабарламага төмөнкүлөр тиркелет:

– өндүрүүчүнүн чечиминин көчүрмөсү;

– ченемди кайра карап чыгууда – ченемдин жаңы редакциясы же өзгөртүү баракчасы;

– колдонуудагы ченемди сактоодо – кошумча эсептөө жана технологиялык негиздеме;

– ченемди кайра карап чыгуудан баш тартууда – негиздүү баш тартуу жана аны ырастоочу документтер.

66. Кабарлама анын жиберилген фактысын жана датасын ырастоого мүмкүндүк берген ыкма менен кагаз жүзүндө жана/же электрондук формада жөнөтүлөт.

16. Жоопкерчилик

67. Алкоголдук продукцияны өндүрүүчү чийки заттын жана материалдардын чыгымынын ченемдерин эсептөөнүн, бекитүүнүн, жүргүзүүнүн жана колдонуунун аныктыгын камсыз кылат.

68. Өндүрүүчүнүн кызмат адамдары ченемдерде, эсептешүү документтеринде, тизмектерде жана өндүрүштүк отчеттордо камтылган маалыматтардын аныктыгы үчүн жоопкерчилик тартат.

69. Ушул Тартиптин талаптары бузулгандыгы аныкталган учурда Кыргыз Республикасынын мыйзамдарында каралган чаралар колдонулат.