КЫРГЫЗ РЕСПУБЛИКАСЫНЫН ӨКМӨТҮНҮН

2013-жылдын 9-апрели № 179

Кыргыз Республикасынын Өкмөтүнүн 2012-жылдын 10-февралындагы № 85 "Аткаруу бийлигинин органдары, алардын түзүмдүк бөлүмчөлөрү жана ведомстволук мекемелери көрсөтүүчү мамлекеттик кызмат көрсөтүүлөрдүн бирдиктүү реестрин (тизмегин) бекитүү жөнүндө" токтомуна өзгөртүүлөрдү жана толуктоолорду киргизүү тууралуу

Жарандарга жана юридикалык жактарга көрсөтүлүүчү мамлекеттик кызматтардын сапатын жана жеткиликтүүлүгүн жогорулатуу боюнча милдеттерди ишке ашыруу максатында Кыргыз Республикасынын Өкмөтү

ТОКТОМ КЫЛАТ:

1. Кыргыз Республикасынын Өкмөтүнүн 2012-жылдын 10-февралындагы № 85 "Аткаруу бийлигинин органдары, алардын түзүмдүк бөлүмчөлөрү жана ведомстволук мекемелери көрсөтүүчү мамлекеттик кызмат көрсөтүүлөрдүн бирдиктүү реестрин (тизмегин) бекитүү жөнүндө" токтомуна төмөнкү өзгөртүүлөр жана толуктоолор киргизилсин:

- токтомдун мамлекеттик тилдеги аталышында жана бүткүл тексти боюнча түрдүү жөндөмөдөгү "тизме" деген сез тиешелүү жөндөмөдө "тизмек" деген сөзгө алмаштырылсын;

- 6-1-пунктта:

төртүнчү абзацы төмөнкү редакцияда берилсин:

"- белгиленген функцияларды түздөн-түз аткаруу боюнча аткаруу бийлигинин органдарынын, алардын түзүмдүк бөлүмчөлөрүнүн жана ведомстволук мекемелеринин ортосундагы ведомстволор аралык жана ведомстволор ичиндеги өз ара аракеттенүүсүнө;";

төмөнкү мазмундагы бешинчи абзац менен толукталсын:

"- жалпыга маалымдоо каражаттары катары катталган, менчигинин түрү мамлекеттик болгон юридикалык жактар.";

- жогору аталган токтом менен бекитилген Аткаруу бийлик органдары, алардын структуралык бөлүмчөлөрү жана ведомстволук мекемелери тарабынан көрсөтүлүүчү мамлекеттик кызмат көрсөтүүлөрдүн бирдиктүү реестринде (тизмегинде):

мамлекеттик тилдеги тексттин аталышында "тизмеси" деген сөз "тизмеги" деген сөзгө алмаштырылсын;

1-главанын 66-пунктундагы "Бул тейлөөлөрдү көрсөтүүчү мамлекеттик органдар жана уюмдар" графасы "БИМ" деген кыскартылган сөздөрдөн кийин ", ЭМ, ФМ" деген кыскартылган сөздөр менен толукталсын;