Распоряжение Кабинета Министров Кыргызской Республики от 7 июля 2023 года № 420-р (Об одобрении заключения Кабинета Министров Кыргызской Республики к Протоколу о внесении изменений и дополнений в Договор между Кыргызской Республикой и Республикой Казахстан об оказании взаимной правовой помощи по гражданским и уголовным делам от 26 августа 1996 года, подписанному 26 мая 2022 года в городе Бишкек)

   КЫРГЫЗ РЕСПУБЛИКАСЫНЫН МИНИСТРЛЕР КАБИНЕТИНИН ТЕСКЕМЕСИ

2023-жылдын 7-июлу № 420-т

 "Кыргыз Республикасынын Жогорку Кеңешинин Регламенти жөнүндө" Кыргыз Республикасынын Мыйзамынын 65-беренесине ылайык, мамлекеттик ички жол-жоболорду аткаруу максатында:

1. 2022-жылдын 26-майында Бишкек шаарында кол коюлган 1996-жылдын 26-августундагы Граждандык жана жазык иштер боюнча өз ара укуктук жардам көрсөтүү жөнүндө Кыргыз Республикасы менен Казакстан Республикасынын ортосундагы келишимге өзгөртүүлөрдү жана толуктоолорду киргизүү тууралуу протоколго Кыргыз Республикасынын Министрлер Кабинетинин тиркелген корутундусу жактырылсын.

2. Кыргыз Республикасынын Юстиция министрлиги, Кыргыз Республикасынын Башкы прокуратурасы, ошондой эле Кыргыз Республикасынын Жогорку сотуна караштуу Сот департаменти (макулдашуу боюнча) Келишимди ишке ашырууга жооптуу мамлекеттик органдар болуп дайындалсын.

3. Кыргыз Республикасынын Министрлер Кабинетинин тиркелген корутундусу Кыргыз Республикасынын Жогорку Кеңешине жиберилсин.

2022-жылдын 26-майында Бишкек шаарында кол коюлган 1996-жылдын 26-августундагы Граждандык жана жазык иштер боюнча өз ара укуктук жардам көрсөтүү жөнүндө Кыргыз Республикасы менен Казакстан Республикасынын ортосундагы келишимге өзгөртүүлөрдү жана толуктоолорду киргизүү тууралуу протоколго Кыргыз Республикасынын Министрлер Кабинетинин корутундусу

1996-жылдын 26-августундагы Граждандык жана жазык иштер боюнча өз ара укуктук жардам көрсөтүү жөнүндө Кыргыз Республикасы менен Казакстан Республикасынын ортосундагы келишимге өзгөртүүлөрдү жана толуктоолорду киргизүү тууралуу протокол Кыргыз Республикасынын Президентинин 2021-жылдын 26-мартындагы № 34 буйругу менен жактырылган, ошондой эле 2022-жылдын 26-майында Бишкек шаарында кол коюлган.

Протокол жарандык жана жазык иштери боюнча укуктук мамилелер, укуктук жардам көрсөтүү жаатында өз ара аракеттенүүнү жеңилдетүү максатында иштелип чыккан.

Протоколго ылайык дайындалган компетенттүү органдар жөнүндө дипломатиялык каналдар аркылуу бири-бирине кабарлоолор тууралуу Тараптардын милдеттенмелерин көрсөтүү менен Келишимдин жоболорун ишке ашыруу боюнча компетенттүү органдардын тизмегин алып салуу бөлүгүндө Келишимдин 4-беренесинин редакциясын өзгөртүү каралат.

Ошондой эле Келишимдин 22-беренесинде каралган, таанылууга жана аткарылууга тийиш болгон чечимдердин тизмеги соттун буйругу менен толукталат.

Мындан тышкары кайталанган жоболорду жоюу максатында Келишимдин 28-беренесин алып салуу, ошондой эле Келишимдин айрым жоболорун толуктоо сунушталат.

Протоколдун тексти мурда Кыргыз Республикасынын Жогорку Кеңешинин Укук тартиби, кылмыштуулук менен күрөшүү жана коррупцияга каршы аракеттенүү боюнча (2021-жылдын 24-февралындагы № 6-455и/21 чечими) жана Эл аралык иштер, коргоо, коопсуздук жана миграция боюнча профилдик комитеттери (2021-жылдын 24-февралындагы № 6-467и/21 чечими) менен макулдашылган.

Сунушталган Протокол Кыргыз Республикасынын Конституциясынын жана мыйзамдарынын ченемдерине, ошондой эле Кыргыз Республикасы катышуучу болуп саналган, белгиленген тартипте күчүнө кирген эл аралык келишимдерге каршы келбейт.

Протоколду кабыл алуу социалдык, экономикалык, укуктук, укук коргоочулук, гендердик, экологиялык, коррупциялык терс кесепеттерге алып келбейт.