Распоряжение Кабинета Министров КР от 1 июля 2024 года № 388-р (О согласии с проектом Соглашения об информационном взаимодействии в сфере пенсионного обеспечения между Социальным фондом Кыргызской Республики при Кабинете Министров Кыргызской Республики и Фондом пенсионного и социального страхования Российской Федерации)

КЫРГЫЗ РЕСПУБЛИКАСЫНЫН МИНИСТРЛЕР КАБИНЕТИНИН ТЕСКЕМЕСИ

2024-жылдын 1-июлу № 388-т

Кыргыз Республикасынын Министрлер Кабинетине караштуу Кыргыз Республикасынын Социалдык фонду менен Россия Федерациясынын Пенсиялык жана социалдык камсыздандыруу фондунун ортосундагы Пенсиялык камсыздоо чөйрөсүндө маалыматтык өз ара аракеттенүү жөнүндө макулдашуунун тиркелген долбооруна принциптүү эмес мүнөздөгү өзгөртүүлөрдү жана толуктоолорду киргизүү укугу менен макулдук берилсин.

Кыргыз Республикасынын Министрлер Кабинетине караштуу Кыргыз Республикасынын Социалдык фонду менен Россия Федерациясынын Пенсиялык жана социалдык камсыздандыруу фондунун ортосундагы Пенсиялык камсыздоо чөйрөсүндө маалыматтык өз ара аракеттенүү жөнүндө МАКУЛДАШУУ

Мындан ары "Социалдык фонд" деп аталуучу Кыргыз Республикасынын Министрлер Кабинетине караштуу Кыргыз Республикасынын Социалдык фонду бир тараптан жана мындан ары "РСФ" деп аталуучу Россия Федерациясынын Пенсиялык жана социалдык камсыздандыруу фонду экинчи тараптан, мындан ары биргеликте "Тараптар" деп аталып, пенсиялык камсыздоо чөйрөсүндө маалыматтык өз ара аракеттенүүнүн натыйжалуулугун жогорулатуу максатында төмөнкүлөр жөнүндө ушул Макулдашууну түзүштү:

1-берене. Макулдашуунун предмети

Ушул Макулдашуунун предмети болуп төмөнкүлөр саналат:

1.1. Евразия экономикалык бирлигинин интеграцияланган маалыматтык системасын колдонуу менен өз ара аракеттенүүгө өткөнгө чейин 2019-жылдын 20-декабрындагы Евразия экономикалык бирлигине мүчө мамлекеттердин эмгекчилерин пенсиялык камсыздоо жөнүндө макулдашууну ишке ашыруу үчүн зарыл болгон өз ара аракеттенүү тартибин жана электрондук документтер (маалыматтар) менен алмашуу технологиясын аныктоо.

1.2. Жарандардын бир эле убакта Кыргыз Республикасынын мыйзамдарына жана Россия Федерациясынын мыйзамдарына ылайык белгиленген пенсияларды алуу фактын текшерүү максатында Социалдык фонд менен РСФ ортосунда корголгон электрондук документ жүгүртүүнү уюштуруу.

1.3. Аларды сактоодо маалыматтарга жана ресурстарга санкцияланбаган жетүү мүмкүндүгүнөн коргоо, Тараптардын маалыматтык өз ара аракеттенүү процессинде байланыш каналдары боюнча берилүүчү электрондук документтердин бүтүндүгү жана аныктыгы, авторлугунун ырасталышы камсыз кылынган шарттарды жана жол-жоболорду, ошондой эле жарандар бир эле убакта Кыргыз Республикасынын мыйзамдарына жана Россия Федерациясынын мыйзамдарына ылайык белгиленген пенсияларды алуу факты аныкталган учурда иш-аракеттердин тартибин аныктоо.

2-берене. Тараптардын өз ара аракеттенүүсү

2.1. Тараптар төмөнкүлөрдү ишке ашыруу максатында өз ара аракеттенет:

2019-жылдын 20-декабрындагы Евразия экономикалык бирлигине мүчө мамлекеттердин эмгекчилерин пенсиялык камсыздоо жөнүндө макулдашууну (мындан ары - ЕАЭБ макулдашуусу);

1997-жылдын 21-июлундагы № 57 "Мамлекеттик пенсиялык социалдык камсыздандыруу жөнүндө" Кыргыз Республикасынын Мыйзамын;

2013-жылдын 28-декабрындагы № 400-ФЗ "Камсыздандыруу пенсиялары жөнүндө" федералдык мыйзамды.

Ушул Макулдашуунун алкагында Тараптар акысыз негизде өз ара аракеттенет жана уюштуруу иш-чараларын аткарат.

3-берене. Документтердин тизмеги жана аларды берүү, анын ичинде электрондук түрдө берүү тартиби

3.1. Электрондук документтер менен алмашуу ушул Макулдашуунун 1-тиркемесине ылайык шифрлөө жана бекитилбеген күчөтүлгөн электрондук кол тамга (КЭК) функциялары менен тиешелүү Тарап үчүн актуалдуу сертификатталган версиянын VipNet CSP маалыматты криптографиялык коргоо каражаттарын (МККК) жана корпоративдик почта серверине туташтырылган Тараптардын корпоративдик электрондук почта кызматын колдонуу менен электрондук файл түрүндө маалыматты берүү жолу менен жүзөгө ашырылат.

Телекоммуникациялык байланыш каналдары боюнча маалыматты берүү мүмкүн болбогон учурда маалымат купуялуулук (кызматтык пайдалануу үчүн) белгиси бар коштомо кат менен эске алынган CD-дискте жана/же башка жеке эске алынган алып жүрүүчүдө файл түрүндө берилет, анда берилүүчү маалыматтардын корголушун камсыз кылган атайын чабарман кызматы аркылуу жана/же тиешелүү Тараптын өкүлүнө кабыл алуу-өткөрүп берүү акты боюнча берүү аркылуу жазуулардын саны жана берилүүчү маалыматтын көлөмү жөнүндө маалыматтар көрсөтүлөт.

3.2. Евразия экономикалык бирлигинин интеграцияланган маалыматтык системасын колдонуу менен өз ара аракеттенүүгө өткөнгө чейин Тараптар Евразия экономикалык комиссиясынын Кеңешинин 2020-жылдын 23-декабрындагы № 122 чечими менен бекитилген 2019-жылдын 20-декабрындагы Евразия экономикалык бирлигине мүчө мамлекеттердин эмгекчилерин пенсиялык камсыздоо жөнүндө макулдашуунун ченемдерин колдонуу боюнча Евразия экономикалык бирлигине мүчө мамлекеттердин ыйгарым укуктуу органдары, компетенттүү органдары менен Евразия экономикалык комиссиясынын ортосундагы өз ара аракеттенүү тартибинде (мындан ары - Тартип) каралган төмөнкү формулярлар (аларда камтылган маалыматтар) жана документтер (маалыматтар) менен электрондук формада алмашат:

1) "Анкета-арыз" формуляры (Тартиптин № 1 тиркемеси);

2) "Маалымат баракчасы" формуляры (Тартиптин № 2 тиркемеси), анын ичинде мурда башка Тараптын аймагында жашаган жана пенсия алган адамдардын пенсия чектөө үчүн кайрылуу факты боюнча жиберилген;

3) "Медициналык текшерүү жөнүндө" формуляры (Тартиптин № 3 тиркемеси);

4) "Иш стажы жөнүндө" формуляры (Тартиптин № 4 тиркемеси);

5) "Кабыл алынган чечим жөнүндө кабарлама" формуляры (Тартиптин № 5 тиркемеси);

6) "Суроо-талап" формуляры (Тартиптин № 6 тиркемеси);

7) "Төлөм ведомосту" формуляры (Тартиптин № 7 тиркемеси);

8) "Салыштыруу акты" формуляры (Тартиптин № 8 тиркемеси);

9) "Пенсиянын ашык төлөнгөн суммасын кармап калуу жөнүндө" формуляры (Тартиптин № 9 тиркемеси);

10) Тараптардын аймактарында эмгек ишин жүргүзүү (токтотуу) факты жөнүндө маалымат көрсөтүлгөн пенсия алуучулардын тизмеси (ушул Макулдашуунун 2-тиркемеси);

11) Кыргыз Республикасында жана Россия Федерациясында жашаган адамдарга пенсиялык камсыздоо төлөмдөрүнүн негиздүүлүгүн ырастоо максатында 2021-жылдын 1-январына чейин Тараптардын аймактарында белгиленген пенсия алуучулардын тизмеси (ушул Макулдашуунун 3-тиркемеси).

3.3. Тараптар ушул Макулдашуунун 3.2-пунктунун 1-9-пунктчаларында көрсөтүлгөн формулярлар жана документтер (көчүрмөлөр) менен Тартипте белгиленген тартипте жана мөөнөттөрдө алмашат.

3.4. Ушул Макулдашуунун 3.2-пунктунун 10-пунктчасында көрсөтүлгөн маалымат Тараптардын биринин суроо-талабынын негизинде ушул Макулдашуунун 2-тиркемесинде каралган форма боюнча алуучулардын тизмеси түрүндө берилет.

3.5. Ушул Макулдашуунун 3.2-пунктунун 11-пунктчасында көрсөтүлгөн маалымат Тараптардын биринин суроо-талабынын негизинде ушул Макулдашуунун 3-тиркемесинде каралган форма боюнча алуучулардын тизмеси түрүндө берилет.

3.6. Ушул Макулдашуунун 3.5-пунктуна ылайык алынган тизменин негизинде алуучулардын маалымат базасы менен салыштырылат, анын жыйынтыгы ал алынган күндөн тартып бир айдан кечиктирилбеген мөөнөттө маалымат берген Тараптын дарегине жиберилет.

3.7. Берилген маалыматта ката кырдаалдар (мисалы, маалыматтардын туура эмес форматы) аныкталган учурда маалымат алынгандан кийин 10 жумуш күндөн кечиктирилбеген мөөнөттө салыштыруу жүргүзүү мүмкүн эместиги жөнүндө кабарлама жиберилет.

3.8. Ката кырдаалды четтетүү жана экинчи Тарапка такталган маалыматты жиберүү ушул Макулдашуунун 3.6-пунктунда көрсөтүлгөн кабарлама алынгандан кийин 10 жумуш күндөн кечиктирилбестен жүзөгө ашырылат.

3.9. Тараптар документтерди төмөнкүдөй түрдө алмашат:

1) ушул Макулдашуунун 3.2-пунктунун 1-9-пунктчаларына карата курамында пенсионерди бир мааниде идентификациялоо үчүн маалымат блогу, ошондой эле камсыздандырылган адамды идентификациялоо үчүн тиешелүү маалымат блогуна тиркелген документтердин электрондук сканерленген образдарынын тизмеси түрүндө формулярды жана башка документтерди камтыган документтердин түзүмдөштүрүлгөн тизими берилет (ушул Макулдашуунун 4-тиркемеси).

DjVu жана/же PDF форматында, түстүү сүрөттө сканерленет. DjVu форматы үчүн документте 12 pt жана андан көп шрифтин өлчөмүндө тексттин негизги бөлүгү болсо, 200 dpi уруксаты менен, 9-11 pt - 300 dpi уруксаты менен, 8 pt жана андан аз - 400-600 dpi уруксаты менен сканерлөө сунушталат. PDF форматы үчүн 150-200 dpi уруксаты менен сканерлөө сунушталат. Ар бир документ өзүнчө файл катары сканерленүүгө тийиш.

Ар бир документ ыйгарым укуктуу кызматкердин КЭК менен күбөлөндүрүлүүгө тийиш.

2) ушул Макулдашуунун 3.2-пунктунун 10-11-пунктчаларына карата камсыздандырылган адамды бир мааниде идентификациялоо үчүн маалымат блогун жана берилүүчү документке ылайык маалыматтардын талап кылынган топтомун камтыган машина иштетүүчү маалымат блогун камтыган түзүмдөштүрүлгөн документтер берилет.

4-берене. Электрондук документтердин файлдарынын аталыштарынын форматы жана түзүмү

4.1. Ушул Макулдашуунун 3.2-пунктунун 1-9-пунктчаларында көрсөтүлгөн маалымат алмашуу үчүн электрондук түрдө өз ара аракеттенүүнүн форматтарынын сыпаттамасы ушул Макулдашуунун 4-тиркемесинде келтирилген.

4.2. Ушул Макулдашуунун 3.2-пунктунун 10-пунктчасында көрсөтүлгөн маалымат алмашуу үчүн электрондук түрдө өз ара аракеттенүүнүн форматгарынын сыпаттамасы ушул Макулдашуунун 5-тиркемесинде келтирилген.

4.3. Ушул Макулдашуунун 3.2-пунктунун 11-пунктчасында көрсөтүлгөн маалымат алмашуу үчүн электрондук түрдө өз ара аракеттенүүнүн форматтарынын сыпаттамасы ушул Макулдашуунун 6-тиркемесинде келтирилген.

5-берене. Электрондук документтерди алмашуу технологиясы

Электрондук документтерди алмашуу Кыргыз Республикасынын Министрлер Кабинетине караштуу Кыргыз Республикасынын Социалдык фонду менен Россия Федерациясынын Пенсиялык жана социалдык камсыздандыруу фондунун ортосунда корголгон электрондук өз ара аракеттенүүнү уюштуруу тартибине (ушул Макулдашуунун 1-тиркемеси) жана Социалдык фонд менен РСФ ортосунда корголгон электрондук өз ара аракеттенүү схемасына (ушул Макулдашуунун 7-тиркемеси) ылайык жүзөгө ашырылат.

6-берене. Тараптардын милдеттери

6.1. Тараптар өздөрүнө төмөнкү милдеттерди алат:

6.1.1. Берилүүчү электрондук документтерге талаптардын өзгөргөндүгү тууралуу, ошондой эле ушул Макулдашуу боюнча милдеттенмелерди токтото туруу жөнүндө жазуу жүзүндө, анын ичинде Тараптардын корпоративдик электрондук почта кызматы аркылуу 10 жумуш күндүн ичинде бири-бирине кабарлоо.

6.1.2. Маалымат иштеп чыгуунун коопсуздугу жана купуялуулугу максатында маалыматтык өз ара аракеттенүүдө берилүүчү маалыматты вируска каршы коргоону камсыз кылуу.

6.1.3. Жеке маалыматтарды жана (же) башка жетүү мүмкүндүгү чектелген маалыматтарды камтыган ушул Макулдашуунун алкагында алынган маалыматтардын купуялуулугун жана коопсуздугун камсыз кылуу.

6.1.4. Тараптар өз ара аракеттенүүнү уюштурууда төмөнкү принциптерди жетекчиликке алат:

кызматтык жана мыйзам менен корголгон башка сырларды так сактоо;

маалыматтын корголушун жана маалыматка жетүү мүмкүндүгүн контролдоону камсыздоо.

6.1.5. Ушул Макулдашуунун алкагында алынган маалыматты ушул Макулдашуунун максаттарына жана Тараптардын мыйзамдарына ылайык гана колдонуу.

6.1.6. Тараптардын ар биринин жеке маалыматтарын коргоо жөнүндө мыйзамдарынын талаптарын аткарууну камсыздоо.

7-берене. Тараптардын жоопкерчилиги

Тараптар ушул Макулдашуунун максаттарына ылайык келбеген маалыматтардын (документтердин) колдонулушу жана ушул Макулдашуу боюнча милдеттенмелерди аткарбагандыгы үчүн Тараптардын ар биринин мыйзамдарына ылайык жоопкерчилик тартат.

8-берене. Талаш-тартыштарды чечүү тартиби

КЭК түзүү, жеткирүү, алуу, ошондой эле электрондук документте колдонуу менен байланышкан талаш жагдайлар Тараптар тарабынан консультациялар жана сүйлөшүүлөр жолу менен каралат жана чечилет.

9-берене. Макулдашууну колдонуу мөөнөтү

9.1. Ушул Макулдашуу Тараптар кол койгон учурдан тартып күчүнө кирет.

9.2. Ушул Макулдашуунун алкагында электрондук өз ара аракеттенүү Тараптар тарабынан корголгон электрондук документ жүгүртүү системасы аркылуу маалыматтык өз ара аракеттенүүгө даярдыгы жөнүндө кабарлама жиберген Тарап экинчи Тараптан мындай даярдык жөнүндө кабарлама алган күндөн кийинки күндөн тартып жүзөгө ашырылат.

9.3. Ушул Макулдашуунун колдонуу мөөнөтү кол коюлган учурдан тартып бир жылды түзөт.

9.4. Эгерде ушул Макулдашуунун колдонуу мөөнөтү аяктагандан кийин Тараптардын бири дагы ушул Макулдашууну бузуу жөнүндө өзүнүн ниетин билдирбесе, ал мөөнөтсүз узартылды деп эсептелет.

10-берене. Корутунду жоболор

10.1. Ушул Макулдашууга өзгөртүүлөр жана толуктоолор Тараптардын өз ара макулдугу боюнча жазуу жүзүндө гана киргизилиши мүмкүн.

Өзгөртүүлөр жана толуктоолор ушул Макулдашуунун ажыратылгыс бөлүгү болуп саналган кошумча макулдашуулар түрүндө жазуу жүзүндө таризделет жана Тараптардын ыйгарым укуктуу өкүлдөрү тарабынан кол коюлат.

10.2. Ушул Макулдашуу Тараптардын биринин жазуу жүзүндө кабарламасы боюнча бузулушу мүмкүн. Ушул Макулдашууну бузууну жана маалымат алмашууну токтотууну демилгелеген Тарап Макулдашууну бузуунун болжолдонгон мөөнөтүнө чейин үч айдан кем эмес убакытта өзүнүн ниетин билдирүүгө тийиш.

10.3. Ушул Макулдашуу ар бири кыргыз жана орус тилдеринде, эки нускада түзүлдү, мында эки текст тең бирдей укуктук күчкө ээ.

Тексттердин ортосунда айырмачылыктар болгон учурда Тараптар орус тилиндеги текстке кайрылат.

10.4. Тараптар ушул Макулдашуунун шарттарын ишке ашыруу үчүн жооптуу компетенттүү органдарды (түзүмдүк бөлүмдөрдү) дайындайт, алар жөнүндө байланыш маалыматтарды Тараптардын ар бири экинчи Тарапка жазуу жүзүндө берет.

10.5. Ушул Макулдашууну ишке ашырууда өз ара аракеттенүү (кат алышуу) жана маалыматты (документтерди) берүү орус тилинде жүргүзүлөт.

10.6. Ушул Макулдашуунун тиркемелери анын ажыратылгыс бөлүгү болуп саналат:

1-тиркеме "Кыргыз Республикасынын Министрлер Кабинетине караштуу Кыргыз Республикасынын Социалдык фонду менен Россия Федерациясынын Пенсиялык жана социалдык камсыздандыруу фондунун ортосунда корголгон электрондук өз ара аракеттенүүнү уюштуруу тартиби";

2-тиркеме "Макулдашуучу Тараптардын аймактарында эмгек ишин жүргүзүү (токтотуу) факты жөнүндө маалыматтар көрсөтүлгөн пенсия алуучулардын тизмеси";

3-тиркеме "Макулдашуучу Тараптардын аймактарында белгиленген пенсия алуучулардын тизмеси";

4-тиркеме "Түзүмдөштүрүлгөн алмашуу форматтарынын сыпаттамасы. Формулярлардын жыйынды тизими";

5-тиркеме "Түзүмдөштүрүлгөн документтердин электрондук түрдө өз ара аракеттенүү форматтарынын сыпаттамасы. Эмгек ишин жүргүзүү факты жөнүндө маалыматтар менен алмашуу";

6-тиркеме "Түзүмдөштүрүлгөн документтердин электрондук түрдө өз ара аракеттенүү форматтарынын сыпаттамасы. Пенсия алуучулар жөнүндө маалыматтар";

7-тиркеме "Социалдык фонд менен РСФ ортосундагы корголгон электрондук өз ара аракеттенүү схемасы".

11-берене. Тараптардын кол тамгалары