Тиркеме (Кыргыз Республикасынын Өкмөтүнүн 2018-жылдын 21-декабрындагы № 603 токтомуна)

Бузуулардын бирдиктүү реестрин жүргүзүү тартиби жөнүндө ЖОБО

(КР Өкмөтүнүн 2020-жылдын 18-мартындагы № 168, 2020-жылдын 11-ноябрындагы № 544, КР Министрлер Кабинетинин 2021-жылдын 13-августундагы № 132  токтомдорунун редакцияларына ылайык)

1-глава. Жалпы жоболор

1. Ушул Жобо Бузуулардын бирдиктүү реестрин (мындан ары - ББР) түзүүнүн жана колдонуунун тартибин, ошондой эле аны колдонуу менен министрликтердин, мамлекеттик комитеттердин, административдик ведомстволордун, башка мамлекеттик жана сот органдарынын, ошондой эле жергиликтүү өз алдынча башкаруу органдарынын маалыматтык системаларынын ортосунда ишке ашырылуучу маалымат алмашуунун негиздерин белгилейт.

2. ББР Кыргыз Республикасынын Бузуулар жөнүндө кодексине ылайык төмөнкү максаттарда түзүлөт жана колдонулат:

- бузууларды жасаган жактарды каттоо;

- бузууларды, колдонулган жаза чараларын жана кошумча укуктук кесепеттерди, бузуулар жөнүндө иштер боюнча токтомдорду, ошондой эле аларга даттануу учурунда соттордун чечимдерин аткарууну каттоо;

- кызыкдар министрликтер, мамлекеттик комитеттер, административдик ведомстволор, башка мамлекеттик жана сот органдары, ошондой эле жергиликтүү өз алдынча башкаруу органдары менен маалыматтык өз ара аракеттенүүнүн натыйжалуулугун жогорулатуу;

- бузуулар жөнүндө иштерди кароону, колдонулган жаза чараларын жана кошумча укуктук кесепеттерди ачык-айкын эсепке алууну камсыз кылуу;

- статистиканы түзүү, прокурордук көзөмөлдү жана бузуулар жөнүндө иштерди эсепке алуу боюнча бирдиктүү контролду жүргүзүү;

- ББР системасында ишенимдүү сактоону жана ага ыңгайлуу жетүүнү уюштуруу менен, ушул чөйрөдө бирдиктүү маалыматтык мейкиндиктин иштеши;

- жарандардын укуктарына жана мыйзамдуу кызыкчылыктарына тийиштүү маалыматтарга алардын жетүүсүн камсыздоо.

(КР Министрлер Кабинетинин 2021-жылдын 13-августундагы № 132 токтомунун редакциясына ылайык)

3. ББРдин негизги милдеттери болуп төмөнкүлөр саналат:

- төмөндө саналган маалыматтарды чогултуу, иштеп чыгуу, жалпылоо, топтоо, сактоо жана коргоо:

бузуулар жана аларды жасаган жактар жөнүндө;

колдонулган жаза чаралары жана кошумча укуктук кесепеттер жөнүндө;

бузуу жөнүндө иш боюнча токтомдордун аткарылышы тууралуу;

бузуу жөнүндө иш боюнча токтомдорго даттануу учурунда соттордун чечимдери жөнүндө;

- кызыкдар министрликтерди, мамлекеттик комитеттерди, административдик ведомстволорду, башка мамлекеттик жана сот органдарын, ошондой эле жергиликтүү өз алдынча башкаруу органдарын маалыматтык камсыздоо;

- министрликтердин, мамлекеттик комитеттердин, административдик ведомстволордун, башка мамлекеттик жана сот органдарынын, ошондой эле жергиликтүү өз алдынча башкаруу органдарынын маалыматтык системасы менен электрондук өз ара аракеттенүү.

(КР Өкмөтүнүн 2020-жылдын 11-ноябрындагы № 544 токтомунун редакциясына ылайык)

4. ББРдин жүргүзүү анын ээси, ал эми бузуулар жөнүндө маалыматтарды каттоо Кыргыз Республикасынын Бузуулар жөнүндө кодексине ылайык ыйгарым укуктуу органдар тарабынан жүзөгө ашырылат.

5. Ушул Жободо колдонулуучу негизги терминдер жана алардын аныктамалары:

- автоматташтырылган жумуш орду - каттоочулардын жана колдонуучулардын ББРге кирүүсү үчүн багытталган программалык-техникалык комплекс;

- аутентификация - ББРдин катышуучусунун жетүү укуктарын идентификациялоочу, ошондой эле анын аныктыгын ырастоочу техникалык каражаттар;

- ББРдин администраторлору - маалыматтык-технологиялык чөйрөнүн каражаттарынын алкагында анын үзгүлтүксүз иштешин жана ыйгарым укуктуу адамдардын жана министрликтердин, мамлекеттик комитеттердин, административдик ведомстволордун, башка мамлекеттик жана сот органдарынын, ошондой эле жергиликтүү өз алдынча башкаруу органдарынын маалыматтык системаларынын кирүү мүмкүндүгүн камсыздоо боюнча ыйгарым укуктар жүктөлгөн ББРдин ээсинин ыйгарым укуктуу кызматкерлери;

- ББРдин ээси - ББРди башкаруу жана үзгүлтүксүз иштешин камсыз кылуу боюнча ыйгарым укуктар жүктөлгөн ыйгарым укуктуу орган;

- Бузууларды бирдиктүү реестри (ББР) - катталган бузуулар жана аларды жасаган жактар, ошондой эле аларга карата колдонулган жаза чаралары жана кошумча укуктук кесепеттер жөнүндө маалыматтарды чогултуу, иштеп чыгуу, сактоо үчүн багытталган автоматташтырылган маалыматтык система;

- логдор журналы - ББР системасында администраторлордун, каттоочулардын, колдонуучулардын жана техникалык оператордун иш-аракеттерин жазуулардын электрондук автоматташтырылган реестри;

- маалыматтарды эсепке алуу журналы - укук коргоо органдарына келип түшкөн, бузуунун, жоруктун жана кылмыштын белгилеринин болушун аныктоо максатында кошумча текшерүү иш-аракеттерин талап кылган окуялар жөнүндө маалыматтарды электрондук каттоо үчүн багытталган Кылмыштардын жана жоруктардын бирдиктүү реестринин адистештирилген модулу;

- инцидент - ББРдин иштешине жана аны жүргүзүүгө байланышкан жагымсыз учур же окуя;

- башка мамлекеттик органдар - прокуратура органдары, Кыргыз Республикасынын Улуттук банкы, Кыргыз Республикасынын Шайлоо жана референдум өткөрүү боюнча борбордук комиссиясы, Кыргыз Республикасынын Эсептөө палатасы, Кыргыз Республикасынын Акыйкатчысы (Омбудсмени);

- логин - ББРде каттоо үчүн катышуучунун аты;

- ББРди каттоочулардын жана колдонуучулардын жооптуу кызматкерлери - ББР системасына кошулган мамлекеттик, муниципалдык жана башка мамлекеттик органдардын ББРнин үзгүлтүксүз иштешин, ошондой эле бекитилген участоктордо ыйгарым укуктуу жактардын кирүү мүмкүндүгүн берүүнү техникалык камсыздоо боюнча функцияларды ишке ашыруучу ыйгарым укуктуу адамдары;

- ББРдин колдонуучулары - ББРге кошулган министрликтердин, мамлекеттик комитеттердин, административдик ведомстволордун, башка мамлекеттик жана сот органдарынын, ошондой эле жергиликтүү өз алдынча башкаруу органдарынын ыйгарым укуктуу адамдары, ошондой маалыматтык системалары;

- ББРди алуучулар - Кыргыз Республикасынын Бузуулар жөнүндө кодексине ылайык маалыматтары ББРге киргизилген бузуучулар, ошондой эле арыз ээлери;

- пароль - ББРдин катышуучусуна гана белгилүү болгон символдордун жашыруун ырааттуулугу, ал аны реалдуу маңызына шайкештигин ырастоого жана ББРге кирүүгө мүмкүндүк берет;

- Бузууларды жасаган жактарды каттоо - бузуулар жөнүндө иштерди кароого ыйгарым укуктуу органдар тарабынан бузууларды жасаган жактар (жеке же юридикалык жактар) тууралуу маалыматтарды ББРге киргизүү;

- бузууну каттоо - бузуулар жөнүндө иштерди кароого ыйгарым укуктуу органдар тарабынан бузуу тууралуу маалыматты ББРге киргизүү;

- ББРдин каттоочулары - Кыргыз Республикасынын Бузуулар жөнүндө кодексине ылайык бузуулар жөнүндө иштерди кароо укуктары берилген ыйгарым укуктуу адамдар, ошондой эле ББР системасына кошулган министрликтердин, мамлекеттик комитеттердин, административдик ведомстволордун, башка мамлекеттик жана сот органдарынын, ошондой эле жергиликтүү өз алдынча башкаруу органдарынын бузуулар тууралуу маалыматтарды киргизүү боюнча укуктар берилген кызматкерлери;

- ББРдин техникалык оператору - "Электрондук башкаруу жөнүндө" Кыргыз Республикасынын Мыйзамына ылайык ББР системасынын үзгүлтүксүз иштешин техникалык коштоочу жана камсыздоочу ыйгарым укуктуу юридикалык жак;

- ББРдин катышуучулары - ББРдин ээси, администраторлору, каттоочулары, колдонуучулары, ББРдин каттоочуларынын, колдонуучуларынын жана алуучуларынын жооптуу кызматкерлери, ББРдин техникалык оператору, ББРге кирүү мүмкүндүгүн алган кызыкдар министрликтер, мамлекеттик комитеттер, административдик ведомстволор, башка мамлекеттик жана сот органдары, ошондой эле жергиликтүү өз алдынча башкаруу органдары;

- электрондук кол тамга - электрондук түрдө башка маалыматка кошулган жана (же) аны менен логикалык байланышта болгон жана маалыматка кол койгон адамды аныктоо үчүн пайдаланылган электрондук маалымат.

2-глава. ББРдин катышуучуларынын функциялары

6. ББРдин ээси ББР системасынын иштешин, аны башкарууну жана өнүктүрүүнү камсыздоо боюнча ыйгарым укуктарды ишке ашырат, анын ичинен:

- ББРди уюштуруучулук, методикалык жана программа-техникалык жүргүзүү каражаттарын иштеп чыгуу;

- ББРдин электрондук маалыматтык базасынын администраторунун функцияларын аткаруу;

- Кыргыз Республикасынын мамлекеттик, муниципалдык жана башка органдарынын маалыматтар базалары менен өз ара аракеттенүүнү уюштуруу;

- ББРди түзүү, жүргүзүү жана колдонуу боюнча ченемдик документтерди иштеп чыгуу, бекитүү жана өркүндөтүү;

- ББРдин маалыматтык коопсуздугун анын борбордук сервердик жабдуусунун алкагында камсыздоо;

- ББРдин катышуучулары үчүн аны колдонуу боюнча окуу иш-чараларын уюштуруу;

- ББР системасына кирүү үчүн автоматташтырылган жумуш орундарына минималдуу техникалык талаптарды белгилөө;

- бузуу жөнүндө протоколдун жана токтомдун ар бир бланкына коюлган номерлерди контролдоо жана эсепке алуу;

(КР Министрлер Кабинетинин 2021-жылдын 13-августундагы № 132 токтомунун редакциясына ылайык)

7. ББРдин администраторлору өз ыйгарым укуктарынын чегинде системанын колдонулушуна, ББРдин катышуучуларына ага кирүү мүмкүндүгүн берүүгө жана кирүү мүмкүндүгүн чектөөгө, ББРде камтылган маалыматтардын сакталышына жана корголушуна мониторинг жүргүзүшөт, маалыматтык коопсуздук талаптарынын сакталышын текшеришет, системаны колдонуу эрежелери боюнча окутууну өткөрүшөт, ошондой эле ушул Жободо каралган башка функцияларды аткарышат, анын ичинен:

- ушул Жободо каралган учурларда ББРдеги бузуулар жана аларды жасаган жактар жөнүндө маалыматтарды актуалдаштырууну;

- техникалык тейлөө боюнча пландалган иштери үчүн ББР системасын иштетүүнү жана иштешин убактылуу токтотууну;

- ББРдин маалыматтарынын резервдик көчүрмөсүн алуу жана көчүрмөлөрдүн толуктугун камсыздоо жол-жобосун аткарууну;

- маалыматтык коопсуздук режимин аныктоо жана сактоо үчүн логдор журналындагы жазууларды мезгил-мезгили менен карап чыгууну;

- ББР системасын кайра иштетүү учурларын алдын алуу максатында, маалыматтарды сактоо үчүн ресурстардын эс тутумун, эсептегич эс тутумун, ресурстарынын запасын пайдалануу боюнча технологиялык чөйрөнүн каражаттарына мониторинг жүргүзүүнү;

- кызыкдар министрликтерге, мамлекеттик комитеттерге, административдик ведомстволорго, башка мамлекеттик жана сот органдарына, жергиликтүү өз алдынча башкаруу органдарына, ошондой эле техникалык операторго паролдордун жана логиндердин негизинде ББР системасына кирүү мүмкүндүгүн, ошондой эле башка аутентификация каражаттарын берүүнү;

- ББРдин каттоочуларынын жана колдонуучуларынын жооптуу кызматкерлеринин өз органынын ыйгарым укуктуу адамдарына ББРге кирүү мүмкүндүгүн берүүгө укук берүүнү;

- ББРдин катышуучуларына анын техникалык эксплуатациялоо шарттарынын өзгөргөндүгү жөнүндө маалымдоону.

8. ББРдин каттоочулары өз ыйгарым укуктарынын чегинде бузуулар жана аларды жасаган жактар, колдонулган жаза чаралары жана кошумча укуктук кесепеттер жөнүндө маалыматтарды киргизүүнү жана актуалдаштырууну ишке ашырышат, анын ичинен:

- алгачкы маалыматтарды түзүү: автоматтык түрдө уникалдуу идентификаторду берүү менен ББРге керектүү маалыматтарды киргизүүнү;

- ушул Жободо каралган учурларда каттаган бузуулар жана аларды жасаган жактар жөнүндө маалыматтарды актуалдаштырууну.

9. ББРдин алуучулары - ББРдеги өздөрү катышкан бузуулар жөнүндө иштерге түздөн-түз тиешелүү маалыматтарды гана алууга укуктуу.

10. ББРдин колдонуучулары өз ыйгарым укуктарына жана ББРдин ээси тарабынан берилген кирүү укугунун чегинде, ББРде болгон маалыматтарга өзгөртүү киргизүү укугусуз ББР менен өз аракеттенет.

11. ББРдин каттоочуларынын жана колдонуучуларынын жооптуу кызматкерлери өз ыйгарым укуктарынын чегинде, ошондой эле ББРдин администраторлору жана техникалык оператору менен өз ара аракеттенүүдө:

- ББРдин үзгүлтүксүз иштөөсүн камсыздашат;

- ББРдин администраторлору тарабынан аныкталган ыйгарым укуктуу органдын алкагында ыйгарым укуктуу адамдарга кирүү мүмкүндүгүн берет;

- жумуш орундарын, байланыш каналдарын жана башка техникалык каражаттарды тейлейт;

- ушул Жободо каралган учурларда тиешелүү каттоочулар тарабынан катталган бузуулар жөнүндө маалыматтарды актуалдаштырат.

12. ББРдин техникалык оператору өз ыйгарым укуктарынын чегинде, ошондой эле ББР ээсинин алдындагы макулдашылган милдеттенмелерине ылайык ББРдин үзгүлтүксүз иштөөсүн техникалык коштоону жана камсыздоону ишке ашырат. Эгерде ББРдин техникалык оператору аныкталбаса, "Электрондук башкаруу жөнүндө" Кыргыз Республикасынын Мыйзамына ылайык бул функция ББРдин ээсине жүктөлөт.

13. ББРге кирүү мүмкүндүгүн алган кызыкдар министрликтер, мамлекеттик комитеттер, административдик ведомстволор, башка мамлекеттик органдар, ошондой жергиликтүү өз алдынча башкаруу органдары өз ыйгарым укуктарынын жана ББР ээси тарабынан берилген кирүү укуктарынын чегинде ББР менен өз ара аракеттенишет.

14. Сот органдары өз ыйгарым укуктарынын чегинде, ошондой эле ушул Жобого ылайык бузуулар жөнүндө токтомдорго даттанууларды кароо жөнүндө маалыматтарды берүүнүн алкагында ББР системасы менен өз ара аракеттенет. Өз ара аракеттенүү тартиби анын ээси жана Кыргыз Республикасынын Жогорку Сотунун алдындагы Сот департаменти тарабынан белгиленет.

15. ББРдин катышуучулары жөнүндө маалыматтар администратор же каттоочулар менен колдонуучулардын жооптуу кызматкерлери тарабынан ББР тиешелүү электрондук маалымдамасына киргизилет.

16. ББРдин каттоочуларынын адам ресурстарын башкаруу маселелерин тейлеген бөлүмдөрү бир жумуш күндүн ичинде ошол ыйгарым укуктуу органдын ББР администраторун же каттоочуларынын жана колдонуучуларынын жооптуу кызматкерин уюштуруу түзүмүнүн, кызмат орундарынын жана аларды ээлеген адамдардын өзгөргөндүгү жөнүндө, эгерде мындай өзгөрүүлөр ББРдагы кандайдыр бир функцияларды аткаруу менен байланышкан учурларда жазуу жүзүндө кабарлоого милдеттүү. ББРнын администратору же каттоочуларынын жана колдонуучуларынын жооптуу кызматкерлери ББР системасына же тиешелүү электрондук маалымдамасына тийиштүү өзгөртүүлөрдү киргизүүлөрү керек.

17. ББРдин катышуучулары ББР системасына кирүү мүмкүндүгүн алган өз кызматкерлерин ББРге кирүү үчүн автоматташтырылган жумуш орундары жана байланыш каналдары менен камсыздоо боюнча өз алдынча чараларды көрүүгө, ошондой эле ББРдин өз деңгээлинде иштешин колдоого милдеттүү. Автоматташтырылган жумуш орундары жана байланыш каналдары ББР ээси тарабынан белгиленген минималдуу техникалык талаптарга шайкеш келүүсү тийиш.

3-глава. Катышуучуларды ББР системасына кошуу

18. ББРга кирүү мүмкүндүгүн алуу үчүн катышуучулар төмөнкүлөрдү камсыз кылуулары тийиш:

- ББРдин каттоочуларынын жана колдонуучуларынын жооптуу кызматкерин дайындоого;

- ички ведомстволук буйрукка ылайык ББР системасына кирүү мүмкүндүгүн алган жооптуу адамдарды дайындоого;

- байланыш каналынын ББР ээси тарабынан белгиленген минималдуу техникалык талаптарга ылайык маалыматтарды берүү ылдамдыгында иштешин;

- санкцияланбаган кирүүдөн, ошондой эле зыяндуу программалык камсыздоолордон талаптагыдай коргоону камсыздоо менен автоматташтырылган жумуш орундарынын иштешин;

- ББР ээси аны колдонуу боюнча сураган бардык маалыматтарды берүүнү.

19. ББР системасына кошууга суроо-талап ББР ээсинин же администраторлорунун дарегине (жазуу жүзүндө) жиберилет, анда ББР системасына кошуунун максаты жана зарыл болгон ролу көрсөтүлөт. Суроо-талаптын формасы ББР ээси тарабынан белгиленет.

20. Министрликтерди, мамлекеттик комитеттерди, административдик ведомстволорду, башка мамлекеттик жана сот органдарын, ошондой эле жергиликтүү өз алдынча башкаруу органдарын ББРнын катышуучулары катары ББР системасына кошуу алардын суроо-талабынан негизинде жүргүзүлөт.

21. Министрликтерди, мамлекеттик комитеттерди, административдик ведомстволорду, башка мамлекеттик жана сот органдарын, ошондой эле жергиликтүү өз алдынча башкаруу органдарын ББРнын колдонуучулары катары ББР системасына кошуу ошол орган менен ББР ээсинин ортосунда белгиленген тартипте кол коюлган макулдашуунун негизинде ишке ашырылат. Макулдашуунун формасы ББР ээси тарабынан белгиленет.

22. (КР Министрлер Кабинетинин 2021-жылдын 13-августундагы № 132 токтомуна ылайык күчүн жоготту)

23. ББР системасына кошууга суроо-талап кошула турган тараптын автоматташтырылган жумуш орундарына алдын ала техникалык талдоо жүргүзүлгөндөн кийин администраторлор тарабынан 5 жумуш күндүн ичинде каралат. Суроо-талапты кароонун натыйжасында ББРнын администраторлору кошула турган тарапты кошуу иштеринин башталышы жөнүндө маалымдайт.

24. ББР ээси кошууга суроо-талапты кароонун алкагында, ошондой эле кошуу боюнча иштерди баштоо үчүн катышуучулардан зарыл маалыматтарды, ошондой эле документтерди суроого укуктуу.

25. ББР ээси тарабынан белгиленген минималдуу техникалык талаптарга шайкеш келген автоматташтырылган жумуш орундары болбогон, ошондой эле ушул Жобого каршы келүүлөр аныкталган учурда ээси же администраторлор кошууга суроо-талапты аткаруудан баш тартууга укуктуу.

26. ББР системасына кошуудан баш тартылган учурда ээси же администраторлору кошулуучу тарапка себептерди көрсөтүп жүйөөлүү кат берүүсү керек. Кошулуучу тарап ББР системасына кошуудан баш тартуу себептерин жоюунун жыйынтыгы боюнча ББР системасына кошуу процесси кайра жанданат.

27. ББРдин катышуучусу, ошондой эле ээси же администраторлору ББРге кошууда жана аны колдонууда бири-бири менен болгон байланыш каражаттары, анын ичинде электрондук түрдөгү байланыш каражаттары боюнча дайындалган жооптуу адамдар аркылуу гана өз ара аракеттенишет.

28. ББРге кошуу, аны ичинде корголгон байланыш каналдарын уюштуруу менен байланышкан бардык чыгымдарды жана ББРдин катышуучусунун маалыматтык системаларын мүмкүн болгон өзгөртүүлөр менен байланышкан чыгымдарды, ошондой эле ББР системасына кошуу жана ага кирүү мүмкүндүгүн коштогон башка чыгымдарды катышуучу же колдонуучу тартат.

29. Кызыкдар министрликтердин, мамлекеттик комитеттердин, административдик ведомстволордун, башка мамлекеттик жана сот органдарынын, ошондой эле жергиликтүү өз алдынча башкаруу органдарынын маалыматтык системалары маалыматтык өз ара аракеттенүү, ошондой эле ББРга маалыматтарды каттоо максатында ББР системасына кошулушу мүмкүн.

30. ББРдин катышуучусу ээсине же өзүнүн ББРди каттоочулардын жана колдонуучулардын жооптуу кызматкерине ББРге кирүүгө ыйгарым укуктуу кызматкерлердин тизмесин берет. Бул маалыматтын негизинде, ошондой эле ББРге кошуунун натыйжасында логиндер менен паролдор ар бир ыйгарым укуктуу адам үчүн ББРде өзүнчө түзүлөт.

31. Логин менен пароль ээси же ББРди каттоочулардын жана колдонуучулардын жооптуу кызматкерлери тарабынан үчүнчү жактарга көрсөтүлбөстөн жабык түрүндө берилет. Логин менен пароль ББРдин катышуучусунун ар бир ыйгарым укуктуу адамы үчүн уникалдуу болуп саналат.

32. ББРдин администраторлору, ошондой эле ББРди каттоочулардын жана колдонуучулардын жооптуу кызматкерлери ББРдин катышуучусунун ар бир адамына төмөнкүдөй ролдордун бирин белгилейт:

- администратор;

- ББРди каттоочулардын жана колдонуучулардын жооптуу кызматкери;

- каттоочу;

- колдонуучу;

- колдонуучу-маалыматтык система;

- техникалык оператор.

33. ББРди алуучулар ББРдин ээси тарабынан белгиленген тартипке ылайык бузуунун идентификациялык номеринин негизинде ББРге кирүүгө мүмкүндүк алат.

34. ББР системасына кирүү үчүн логин жана пароль алган адам ББРге алгачкы кошулууда паролду алмаштырууга милдеттүү. ББРди ар бир колдонууда ага логин жана пароль аркылуу кошуу каралган.

35. ББРге кошуунун жыйынтыгы:

- катышуучунун же колдонуучунун ББРге кошууну конфигурирлөө иштерин аяктоо;

- ББРдин ээси тарабынан ага кошуу үчүн логинди жана паролду берүү;

- ББРдин катышуучу тарабынан аны биринчи колдонууда логинди жана паролду алмаштыруу.

36. Пароль ББР системасынын билдирүүсү боюнча бир айдын ичинде бир жолудан кем эмес алмаштырылууга тийиш. Катышуучунун суроо-талабы боюнча логин жана/же пароль администратор же ББРди каттоочулардын жана колдонуучулардын жооптуу кызматкери тарабынан башкасына алмаштырылышы мүмкүн. Мында алмаштырылган паролду да катышуучу ББРге алгачкы кошулгандан кийин өзгөртүүгө тийиш.

37. ББРдин катышуучусу администраторго же ББРди каттоочулардын жана колдонуучулардын жооптуу кызматкерлерине өзүнүн чечимин кабарлоо менен ага кирүүдөн баш тартуу укугуна ээ. Бул учурда администраторлор же ББРди каттоочулардын жана колдонуучулардын жооптуу кызматкерлери токтоосуз бул катышуучунун ББРге кирүү мүмкүндүгүн токтотууга тийиш.

4-глава. ББР системасынын маалыматтарын түзүү жана колдонуу тартиби

38. ББР системасына маалыматтарды киргизүү жана актуалдаштыруу ББРди каттоочулардын өздөрүнүн Кыргыз Республикасынын Бузуулар жөнүндө кодексинде белгиленген компетенциясынын, ошондой эле ББРдин ээси же каттоочулардын жана колдонуучулардын жооптуу кызматкерлери тарабынан аныкталган ролдорунун чегинде ишке ашырылат

39. Катышуучуга жеткиликтүү болгон ББРдин маалыматтары, ошондой эле функционалдык мүмкүндүктөрү ББРдин ээси тараптан аныкталган кирүү ролдоруна, ошондой эле Кыргыз Республикасынын Бузуулар жөнүндө кодексине ылайык аныкталат.

40. Каттоочулар бузууларды жана аларды жасаган адамдарды, ошондой эле колдонулган кошумча укуктук кесепеттерди ББРге автоматташтырылган жумушчу орундарды колдонуу менен бузуу жөнүндө протоколдон маалыматтарды киргизүү же протоколдун электрондук формасын толтуруу жолу менен катташат. Бузууларды жана аларды жасаган адамдарды, ошондой эле колдонулган жаза чараларды жана кошумча укуктук кесепеттер жөнүндө маалыматты ББРге каттоо ББРге кошулган катышуучулардын маалыматтык системасы, анын ичинде "Коопсуз шаар" автоматташтырылган маалыматтык системасы аркылуу катталат.

(КР Өкмөтүнүн 2020-жылдын 11-ноябрындагы № 544 токтомунун редакциясына ылайык)

41. Бузууларды жана аларды жасаган адамдарды, ошондой эле колдонулган кошумча укуктук кесепеттерди ББРге күнү-түнү каттоого болот.

42. Бузууларды жана аларды жасаган адамдарды, ошондой эле, колдонулган жаза чараларын жана кошумча укуктук кесепеттерди ББРге каттоо үчүн Кыргыз Республикасынын Бузуулар жөнүндө кодексине ылайык түзүлгөн протокол жана/же бузуу жөнүндө токтом негиз болот. Протокол жана/же бузуу жөнүндө токтом кагазда, ошондой эле квалификациялуу электрондук кол тамга менен ырасталган электрондук формада түзүлүшү мүмкүн.

43. Протокол жана/же бузуу жөнүндө кагазга жазылган токтом так отчеттук бланктардан болуп эсептелет. ББРдин системасы тарабынан протоколдун же бузуу жөнүндө токтомдун ар бир бланкына номер ыйгарылат жана так отчеттук бланктарга номер ыйгаруунун электрондук журналына киргизилет. Номер ыйгарылган протоколдордун бланктарын басып чыгаруу боюнча чыгымды ББРдин катышуучусу тартат.

44. Протоколду анын уникалдуу номери аркылуу ББРде автоматтык идентификациялоодон кийин гана бузууларды жана аларды жасаган адамдарды, ошондой эле колдонулган кошумча укуктук кесепеттерди каттоого болот. Протоколдун мазмуну Кыргыз Республикасынын Бузуулар жөнүндө кодексине ылайык бузуулардын процесстик тартибине шайкеш келүүгө тийиш.

45. Техникалык себептер боюнча автоматташтырылган жумушчу орундарынын ББР системасына кирүүгө мүмкүндүгү болбосо, каттоочу байланыш каражаттары аркылуу администраторго же ББРди каттоочулардын жана колдонуучулардын жооптуу кызматкерлерине токтоосуздан кабарлоого милдеттүү. Бул учурда бузуулар маалыматтардын өз убагында киргизилбегендигинин себебин (жазуу жүзүндө) көрсөтүү менен ББРге кирүү мүмкүндүгү пайда болгондо ББРге катталууга тийиш.

46. Бузуу жөнүндө протоколдун жана жаза жөнүндө токтомдун, ошондой эле колдонулган кошумча укуктук кесепеттер жөнүндө электрондук формадагы маалыматтар автоматтык түрдө ББРге келип түшөт.

47. Ушул Жободо белгиленген тартипте катталган ар бир бузууга ББРде автоматтык түрдө уникалдуу идентификациялык номер ыйгарылат.

48. Бузуулар Кыргыз Республикасынын Бузуулар жөнүндө кодексине ылайык бузуулар жөнүндө маалыматтардын аныктыгын ырастаган документтердин негизинде гана катталат.

49. Бузуулар жөнүндө арыз, ошондой эле Кыргыз Республикасынын Бузуулар жөнүндө кодексине ылайык ыйгарым укуктуу адамдар тарабынан аныкталган бузуулар маалыматтарды каттоо журналына киргизилет.

50. Бузууларды жана аларды жасаган адамдарды, ошондой эле, Кыргыз Республикасынын Жазык-процесстик кодексине ылайык сотко чейинки териштирүүнүн алкагында белгиленип, колдонулган кошумча укуктук кесепеттерди, Кыргыз Республикасынын Бузуулар жөнүндө кодексине ылайык бузуу жөнүндө ишти кароодо кылмыш же жоруктардын белгилери аныкталган учурда тергөө органдары же алгачкы текшерүү органдары тарабынан тергөө караштуулугу боюнча берилген материалдар Кылмыш жана жоруктардын бирдиктүү реестри менен биргеликте катталат.

51. ББР менен Кылмыштардын жана жоруктардын бирдиктүү реестринин ортосунда маалымат алмашуу тартиби автоматташтырылган маалыматтык системалардын ээси тарабынан белгиленет.

(КР Министрлер Кабинетинин 2021-жылдын 13-августундагы № 132 токтомунун редакциясына ылайык)

52. Бузуулар жана аны жасаган адамдар, ошондой эле колдонулган кошумча укуктук кесепеттер ББРге Кыргыз Республикасынын Бузуулар жөнүндө кодексине ылайык каттоочу тарабынан бузуу жөнүндө протокол түзүлгөндөн тартып 72 сааттан кечиктирбей катталууга тийиш.

(КР Өкмөтүнүн 2020-жылдын 18-мартындагы № 168 токтомунун редакциясына ылайык)

53. Бузуулар жөнүндө соттордун чечими да даттанууну кароонун жыйынтыгы боюнча Кыргыз Республикасынын Бузуулар жөнүндө кодексине ылайык катталат. Чечим квалификациялык электрондук кол тамга менен күбөлөндүрүлгөн сот органынын маалыматтык системасы аркылуу электрондук түрдө ББРге киргизилиши мүмкүн.

54. Даттанууну кароонун жыйынтыгы боюнча соттун чечими каттоочу тарабынан ББРдин ээси жана Кыргыз Республикасынын Жогорку сотунун алдындагы Сот департаменти менен макулдашуу боюнча белгиленген мөөнөттө катталат.

55. ББРге бузууларды каттоодо төмөнкүлөр жазылат:

- бузуу жөнүндө ишти өндүрүшкө алуунун укуктук негиздери;

- бузуу жөнүндө өндүрүштөгү иштин каттоо номери (бузуу жөнүндө протоколдун катар номери жана штрих-коду);

- бузуу жасалган жер, датасы, убактысы жана жагдайлары;

- протокол түзүүчүнүн кызмат орду, аты-жөнү;

- процесстик чечимдер жөнүндө маалымат, ошондой эле, бузуу жөнүндө иштин токтомуна даттануу боюнча кабыл алынган процесстик чечимдер жөнүндө маалымат;

- бузуу жөнүндө иштин өндүрүшүн алып барган, процесстик чечим чыгарган органдын аталышы, чечимди чыгаруунун негизи жана датасы;

- бузуучу катары тартылып жаткан жеке жак жөнүндө маалыматтар, бар болсо;

- бузуучу катары тартылып жаткан юридикалык жак жөнүндө маалыматтар, бар болсо (юридикалык жактын аталышы, анын жайгашкан жери, төлөөчүнүн эсептик номери, мамлекеттик каттоо датасы);

- бузуу үчүн жоопкерчилик каралган Кыргыз Республикасынын Бузуулар жөнүндө кодексинин беренеси;

- эгерде бар болсо, күбөлөр жана жабырлануучулар жөнүндө маалыматтар;

- бузуучу катары тартылып жаткан адамдын түшүндүрмөсү, бар болсо;

- бузуу жөнүндө ишти чечүү үчүн зарыл болгон башка маалыматтар;

- тергөө, алгачкы текшерүү органыма же болбосо башка ыйгарым укуктуу органга бузуу жөнүндө иштин материалдарын өткөрүп берүү жөнүндө маалыматтары бар болсо;

- бузуулар жөнүндө өткөрүп берилген иш боюнча өндүрүштү жүргүзгөн органдын аталышы, ыйгарым укуктуу адамдын кызмат орду, аты-жөнү жана байланыш маалыматтары.

(КР Өкмөтүнүн 2020-жылдын 11-ноябрындагы № 544 токтомунун редакциясына ылайык)

56. Салынган айыптарды төлөө фактысы автоматтык режимде ББРдин ээсинин төлөмдөрүн эсепке алуу боюнча тиешелүү маалыматтык системалар, ошондой эле электрондук төлөмдөрдүн мамлекеттик системасы менен өз ара аракеттенүүнүн алкагында катталат.

57. Колдонулган жаза чаралары жана кошумча укуктук кесепеттер, токтомдорду аткаруу жөнүндө маалыматтар, ошондой эле токтомдорго даттануу болгон учурда соттордун чечимдери жөнүндө маалыматтар тиешелүү токтом чыгарылган учурдан же бузуу жөнүндө иш боюнча токтом аткарылган учурдан тартып 24 сааттан кечиктирбей катталууга тийиш.

58. Бузуулар жана аны жасаган адамдар, колдонулган жаза чаралары жана кошумча укуктук кесепеттер, токтомдорду аткаруу жөнүндө маалыматтар, ошондой эле токтомдорго даттануу болгон учурда соттордун чечимдерин аткаруу жөнүндө маалыматтар автоматтык режимде министрликтердин, мамлекеттик комитеттердин, административдик ведомстволордун, башка мамлекеттик органдардын жана сот органдарынын, ошондой эле жергиликтүү өз алдынча башкаруу органдарынын маалыматтык системалары менен маалыматтык өз ара аракеттенүүнүн алкагында катталат.

59. Бузуулар жана анын жасаган адамдар, колдонулган жаза чаралары жана кошумча укуктук кесепеттер, токтомдорду аткаруу жөнүндө маалыматтар, ошондой эле токтомдорго даттануу болгон учурда соттордун чечимдерин аткаруу жөнүндө маалыматтар төмөнкү учурларда актуалдаштырылышы мүмкүн:

- белгиленген маалыматтарды каттоо учурунда каталар аныкталса;

- токтомду жана колдонулган кошумча укуктук кесепеттерди жокко чыгаруу жөнүндө соттун чечими чыгарылса;

- Кыргыз Республикасынын Бузуулар жөнүндө кодексине ылайык бузуу жөнүндө иштин өндүрүшүн жокко чыгарган жагдайлар болгон учурда ыйгарым укуктуу органдын ишти токтотуу жөнүндө чечими чыгарылса;

- кылмыш же жоруктардын белгилери болгон учурда бузуу жөнүндө өндүрүштүн материалдарын тергөө же алгачкы текшерүү органына тергөө караштуулугу боюнча өткөрүп берүү жөнүндө ыйгарым укуктуу органдын чечими чыгарылса;

- эгерде ишти кароо анын компетенциясына кирбесе, бузуу жөнүндө протоколду жана башка материалдарды ведомствого караштуулугу боюнча өткөрүп берүү жөнүндө ыйгарым укуктуу органдын чечими чыгарылса.

60. ББРге бузуулар жөнүндө маалыматтар белгиленген үлгүдөгү кагазда жазылган маалыматтардын негизинде катталат. Эсепке алуу журналдарынын, ошондой эле процесстик документтердин типтүү формалары ушул Жобонун 1 жана 2-тиркемелеринде көрсөтүлгөн.

61. ББРдин маалыматтарын жеке маалыматтарды топтоо, иштеп чыгуу жана колдонуу чөйрөсүндөгү, ошондой эле банктык сыр чөйрөсүндөгү Кыргыз Республикасынын мыйзамдарына ылайык гана колдонууга болот.

62. ББРдин маалыматтарын ББРдин ээси, администраторлору, каттоочулары жана колдонуучулары ББРдин администраторлору тарабынан жана Кыргыз Республикасынын мыйзамдарында белгиленген ага укугу менен ыйгарым укуктарынын чегинде колдоно алышат.

63. Министрликтердин, мамлекеттик комитеттердин, административдик ведомстволордун, башка мамлекеттик органдардын жана сот органдарынын, ошондой эле жергиликтүү өз алдынча башкаруу органдарынын атайын суроо-талабы берилгенде ББРдин маалыматтары суроо-талап берген органдын компетенциясына ылайык жеке маалыматтарды топтоо, иштеп чыгуу жана колдонуу чөйрөсүндөгү, ошондой эле банктык сыр чөйрөсүндөгү Кыргыз Республикасынын мыйзамдарынын талаптарын сактоо менен берилүүгө тийиш.

64. Кыргыз Республикасынын ар бир жараны ББРге анын маалыматы киргизилген болсо, өзүнүн маалыматтарына жетүүгө укуктуу.

65. ББРдин маалыматтары жеке маалыматтарды топтоо, иштеп чыгуу жана колдонуу чөйрөсүндөгү, ошондой эле банктык сыр чөйрөсүндөгү Кыргыз Республикасынын мыйзамдарына ылайык коргоого алынат.

66. ББРде маалыматтарды сактоо 3 жылдан кем эмес мөөнөттү түзөт. Сактоо мөөнөтү аяктагандан кийин маалыматтарды электрондук архивдештирүү жана аны сактоо орду же жок кылуу тартиби ББРдин ээси тарабынан аныкталат.

5-глава. Бузуулардын бирдиктүү реестрин жүргүзүүнү контролдоо (көзөмөлдөө) жана аны бузуу үчүн жоопкерчилик

67. Ушул Жобонун аткарылышын ББРдин катышуучуларынын жетекчилери контролго алышат, алар;

- ББРди анык, объективдүү жана өз убагында түзүүнү камсыздоо үчүн жоопкерчилик тартышат;

- ушул Жобонун талаптарын бузууларды аныктоо боюнча тиешелүү чараларды көрүшөт;

- өздөрүнүн компетенцияларынын алкагында ББРди жүргүзүүнү контролго алышат.

68. Кыргыз Республикасынын Башкы прокурору жана ага баш ийген прокурорлор ББРди түзүүнүн жана колдонуунун тартибинин так жана бир түрдүү аткарылышын көзөмөлдөшөт, анын ичинде;

- Кыргыз Республикасынын Бузуулар жөнүндө кодексине ылайык бузууларды процесстик тариздөөнүн объективдүүлүгүн жана тактыгын көзөмөлдөшөт жана контролго алышат;

- ушул Жобонун талаптарынын бузулгандыгы аныкталган учурда аларды жоюу жана күнөөлүү болгон ыйгарым укуктуу адамдарды жоопкерчиликке, анын ичинде кылмыш жоопкерчилигине тартуу максатында прокурордук чара көрүшөт.

69. ББРдин катышуучуларынын ыйгарым укуктуу адамдары ушул Жобого жана жеке маалыматтарды электрондук башкаруу, ошондой эле топтоо, иштеп чыгуу жана колдонуу чөйрөсүндөгү Кыргыз Республикасынын мыйзамдарына ылайык төмөнкүлөр үчүн жеке жоопкерчилик тартышат;

- ББРди жүргүзүүнүн тартибин бузуу;

- ББРге бузууну каттоо учурунда туура эмес маалыматтарды киргизүү;

- так отчеттук бланктарын, бузуулар жөнүндө протоколдорду жана токтомдорду эсепке алуу жана колдонуу боюнча иштерди уюштуруу;

- ББРге бузууларды каттоонун мөөнөттөрүн бузуу;

- ББРди түзүү жана пайдалануу менен байланышкан башка бузуулар.

70. ББРдин катышуучулары (өз деңгээлинде) ушул Жобонун жана Кыргыз Республикасынын мыйзамдарынын талаптарына ылайык маалыматтарга санкцияланбаган кирүү мүмкүндүгүнө каршы аракеттенүүнүн методдорун жана жол-жоболорун изилдөөнү жана пайдаланууну, ошондой эле талаптагыдай маалыматтык коопсуздукту камсыздашат.

71. Маалыматтык коопсуздукту камсыздоо максатында ББРди пайдалануу жана жүргүзүү төмөнкүлөрдү караштырат:

- ББРге кирүү мүмкүндүгүн, анын ичинде ББРдин катышуучуларын аутентификациялоонун негизинде контролдоо;

- корголгон каналдар боюнча гана маалыматтар менен алмашуу;

- катышуучулардын бардык аракеттерин ББРде каттоо.

72. Маалыматтык коопсуздукту камсыздоонун алкагында ББРдин катышуучулары төмөнкүдөй принциптерди жетекчиликке алышат;

- маалыматтын бүтүндүгү - маалыматтарды өзгөртүүдөн жана жок кылуудан коргоо;

- конфиденциалдуулук - маалыматтарды санкцияланбаган кирүү мүмкүндүгүнөн коргоо;

- кирүү мүмкүндүгү - ББРдин катышуучуларын ББРге кирүү мүмкүндүгүнүн бардык методдору менен камсыздоо.

73. ББРдеги маалыматтык коопсуздукту камсыздоонун негизги компоненттери болуп төмөнкүлөр эсептелет;

- тышкы түйүндөргө кошуу учурунда маалыматты жана базалык инфраструктураны коргоо;

- түйүндөрдүн өз ара аракеттенүү процессинде маалыматты коргоо;

- маалыматтардын агымын коргоо;

- вируска каршы коргоо;

- программалык каражаттардын коопсуздугун камсыздоо;

- катышуучуларды аудентификациялоо,

- ББР системасындагы ролуна ылайык колдонуучулардын маалыматтарга кирүү мүмкүндүгүн чектөө;

- борборлоштурулган башкаруу жана ББРдин маалыматтарына кирүү мүмкүндүгүн контролдоо.

74. Логин жана/же пароль ББРдин катышуучуларынын ар бири үчүн жекече болуп эсептелет. Пароль кандай түрдө болбосун берилбейт же үчүнчү жактарга айтылбайт. Паролду үчүнчү жактарга маалымат алууга мүмкүндүк берген кандай маалымат сактагычтарда болбосун сактоого тыюу салынат.

75. Пароль жоголгондо же ачыкка чыккан учурда ага тиешелүү болгон ББРдин катышуучусу токтоосуз түрдө ал тууралуу ББРдин ээсине же колдонуучулардын жана каттоочулардын жооптуу кызматкерине маалымдоого милдеттүү.

76. Паролдун жоголгон же болбосо ачыкка чыккан фактысы жоголгон же ачыкка чыккан пароль тиешелүү болгон ББРдин катышуучусун жоопкерчиликке тартуу жөнүндө маселени чечүү менен каралууга тийиш.

77. ББРдин ээси бузуулар тууралуу протоколдордун жана токтомдордун ар бир бланктарына ыйгарылган номерди контролдойт жана эсепке алат.

(КР Министрлер Кабинетинин 2021-жылдын 13-августундагы № 132 токтомунун редакциясына ылайык)

78. Кошуу жана колдонуу алкагындагы ББРдин катышуучуларынын ортосунда келип чыккан пикир келишпестиктер жана талаштар кызыкдар тараптардын ортосунда сүйлөшүүлөрдү жүргүзүү жолу менен жөнгө салынат. Эгерде сүйлөшүүлөр оң жыйынтык бербесе, талаш маселелер ББРдин ээсинин өкүлү башчылык кылган талаш маселелерди кароо боюнча түзүлгөн жумушчу топ тарабынан, ошондой эле кызыкдар тараптардын өкүлдөрүнүн катышуусунда каралат. Жумушчу топ тарабынан маселени кароонун жыйынтыгы жумушчу топтун ар бир катышуучусу кол койгон тийиштүү протоколдо чагылдырылат.

79. Ушул Жободо регламенттелбеген маселелерди чечүү үчүн ББРдин катышуучулары электрондук башкаруу, ошондой эле топтоо, иштеп чыгуу жана колдонуу чөйрөсүндөгү Кыргыз Республикасынын мыйзамдарынын жоболорун жетекчиликке алышат.

6-глава. ББРди каржылоо

80. ББР системасын киргизүү жана аны иштетүү, ошондой эле анын иштешин контролдоо Кыргыз Республикасынын республикалык бюджетинин каражаттарынын эсебинен жана Кыргыз Республикасынын мыйзамдарына ылайык башка булактардан каржыланат.

 

Бузуулардын бирдиктүү реестрин жүргүзүү тартиби жөнүндө жобого 1-тиркеме