№ 159 «Мамлекеттик алымдын ставкалары» — Далил

Тиркеме

Мамлекеттик алымдын СТАВКАЛАРЫ

(КР Өкмөтүнүн 2020-жылдын 4-июнундагы № 299, 2020-жылдын 11-ноябрындагы № 546, 2021-жылдын 3-майындагы № 177 КР Министрлер Кабинетинин 2022-жылдын 11-майындагы № 251 , 2022-жылдын 10-июнундагы № 308, 2023-жылдын 15-февралындагы № 73, 2024-жылдын 12-апрелиндеги № 167, 2024-жылдын 15-майындагы № 247 , 2024-жылдын 3-июлундагы № 350, 2024-жылдын 4-июлундагы № 352, 2024-жылдын 16-июлундагы № 392, 2025-жылдын 30-октябрындагы № 707, 2026-жылдын 23-июлундагы № 505

токтомдорунун редакцияларына ылайык)

1-глава. Сотко кайрылууда төлөнүүгө тийиш болгон мамлекеттик алым

1. Сотко берилүүчү доо арыздарынан, анын ичинде келишимге чейинки талаштар боюнча арыздардан, өзгөчө өндүрүштөгү иштер боюнча арыздардан (даттануулардан), апелляциялык жана кассациялык даттануулардан мамлекеттик алым төмөнкүдөй өлчөмдөрдө алынат:

1) доонун төмөнкүдөй баадагы доо арыздарынан:

- 50000 (элүү миң) сомго чейин - доонун баасынан 5 пайыз, бирок бир эсептик көрсөткүчтөн кем эмес;

- 50000 (элүү миң) сомдон 250000 (эки жүз элүү миң) сомго чейин - 2500 (эки миң беш жүз) сом жана 50000 (элүү миң) сомдон ашкан доонун суммасынан 4 пайыз;

- 250000 (эки жүз элүү миң) сомдон 500000 (беш жүз миң) сомго чейин - 10000 (он миң) сом жана 250000 (эки жүз элүү миң) сомдон ашкан доонун суммасынан 3 пайыз;

- 500000 (беш жүз миң) сомдон 2500000 (эки миллион беш жүз миң) сомго чейин - 20000 (жыйырма миң) сом жана 500000 (беш жүз миң) сомдон ашкан доонун суммасынан 2 пайыз;

- 2500000 (эки миллион беш жүз миң) сомдон 5000000 (беш миллион) сомго чейин - 60000 (алтымыш миң) сом жана 2500000 (эки миллион беш жүз миң) сомдон ашкан доонун суммасынан 1 пайыз;

- 5000000 (беш миллион) сомдон жогору - 80000 (сексен миң) сом жана 5000000 (беш миллион) сомдон ашкан суммадан 0,5 пайыз;

2) никени бузуу жөнүндө доо арыздарынан - эсептик көрсөткүчтүн 10 эселенген өлчөмү, никени бузууда мүлктү бөлүштүрүү жөнүндө доо арыздарынан - доонун баасынан 1 пайыз;

3) белгиленген тартипте дайыны жок же жин оорусунан же кем акылдыктан улам аракетке жөндөмсүз деп таанылган адамдар, же үч жылдан кем эмес мөөнөткө эркиндигинен ажыратууга соттолгон адамдар менен никени бузуу жөнүндө доо арыздарынан - эсептик көрсөткүчтүн 7 эселенген өлчөмү;

4) турак-жайларды жалдоо келишимин өзгөртүү же бузуу жөнүндө, мурасты кабыл алуунун мөөнөтүн узартуу, мүлктү камоодон бошотуу жана мүлктүк эмес мүнөздөгү (же баалоого тийиш эмес) башка доо арыздарынан - эсептик көрсөткүчтүн 7 эселенген өлчөмү;

5) өзгөчө өндүрүштөгү иштер боюнча арыздардан (даттануулардан) - эсептик көрсөткүчтүн 10 эселенген өлчөмү;

6) келишимге чейинки талаштар боюнча доо арыздарынан - эсептик көрсөткүчтүн 10 эселенген өлчөмү;

7) эгерде эл аралык келишимде башкача каралбаса, чет өлкөлүк соттордун чечимдерин мажбурлап аткартууга аткаруу барагын берүү жөнүндө арыздардан - эсептик көрсөткүчтүн 10 эселенген өлчөмү;