КЫРГЫЗ РЕСПУБЛИКАСЫНЫН ӨКМӨТҮ

2019-жылдын 27-июну № 320

2019-2023-жылдарга Кыргыз Республикасында азык-түлүк коопсуздугу жана тамактануу программасын бекитүү жөнүндө

Туруктуу өнүктүрүүнүн стратегиялык артыкчылыктарын ишке ашыруу, өлкөнүн азык-түлүк коопсуздугун камсыздоо жана Кыргыз Республикасынын азык-түлүк рыногунун ички жана тышкы коркунучтарына ыкчам аракеттерди көрүү максатында, "Кыргыз Республикасынын Өкмөтү жөнүндө" Кыргыз Республикасынын конституциялык Мыйзамынын 10 жана 17-беренелерине ылайык Кыргыз Республикасынын Өкмөтү

ТОКТОМ КЫЛАТ:

1. Төмөнкүлөр бекитилсин:

- 2019-2023-жылдарга Кыргыз Республикасында азык-түлүк коопсуздугу жана тамактануу программасы (мындан ары - Программа), 1-тиркемеге ылайык;

- Программаны жүзөгө ашыруу боюнча иш-чаралар планы (мындан ары - Иш-чаралар планы), 2-тиркемеге ылайык;

- Программанын жүзөгө ашырылышына мониторинг жана баалоо жүргүзүү индикаторлорунун матрицасы (мындан ары - Индикаторлордун матрицасы), 3-тиркемеге ылайык;

- Программанын Иш-чаралар планынын бюджети (мындан ары - Иш-чаралар планынын бюджети), 4-тиркемеге ылайык.

2. Иш-чаралар планын жүзөгө ашырууга жооптуу министрликтер жана административдик ведомстволор аны аткарууну камсыз кылышсын жана квартал сайын отчеттук мезгилден кийинки айдын 15инен кечиктирбей, тийиштүү маалыматты Кыргыз Республикасынын Айыл чарба, тамак-аш өнөр жайы жана мелиорация министрлигине берип турушсун.

3. Кыргыз Республикасынын Айыл чарба, тамак-аш өнөр жайы жана мелиорация министрлиги:

- Кыргыз Республикасынын Саламаттык сактоо министрлиги менен бирдикте ушул токтомдон келип чыгуучу зарыл болгон чараларды көрсүн;

- ар бир кварталдын жыйынтыгы боюнча отчеттук мезгилден кийинки айдын 25инен кечиктирбей, Иш-чаралар планын аткаруунун жүрүшү жөнүндө маалыматты Кыргыз Республикасынын Өкмөтүнүн Аппаратына берип турсун.

4. Ушул токтомдун аткарылышын контролдоо Кыргыз Республикасынын Өкмөтүнүн Аппаратынын агроөнөр жай комплекси жана экология бөлүмүнө жүктөлсүн.