КЫРГЫЗ РЕСПУБЛИКАСЫНЫН МИНИСТРЛЕР КАБИНЕТИ

2022-жылдын 30-марты № 185

Маданият, искусство, маалымат жана спорт мекемелеринин кызматкерлерине эмгек акы төлөөнүн шарттары жөнүндө

Маданият, искусство, маалымат жана спорт мекемелеринин кызматкерлерине эмгек акы төлөөнүн шарттарын тартипке келтирүү максатында, "Кыргыз Республикасынын Министрлер Кабинети жөнүндө" Кыргыз Республикасынын конституциялык Мыйзамынын 13, 17-беренелерине ылайык Кыргыз Республикасынын Министрлер Кабинети токтом кылат:

1. Маданият, искусство, маалымат жана спорт мекемелеринин кызматкерлеринин кызматтык маяналарын эсептөө үчүн негиз болуп саналуучу минималдуу базалык ставка 7040 сом өлчөмүндө белгиленсин.

2. Төмөнкүлөр бекитилсин:

1) Маданият, искусство, маалымат жана спорт мекемелеринин кызматкерлерине эмгек акы төлөөнүн шарттары жөнүндө жобо 1-тиркемеге ылайык;

2) Маданият, искусство, маалымат жана спорт мекемелеринин кызматкерлерине иштеген жылдары үчүн үстөк акыларды белгилөөнүн жана төлөөнүн тартиби жөнүндө жобо 2-тиркемеге ылайык;

3) маданият, искусство, маалымат жана спорт мекемелеринин кызматкерлеринин кызматтык маяналарынын өлчөмүн аныктоодо колдонулуучу кызматтык маяналарга карата эселөө коэффициенттери 3-11-тиркемелерге ылайык.

2¹. Төмөнкүлөр белгиленсин:

1) А.Малдыбаев атындагы В.И.Ленин ордендүү Кыргыз улуттук академиялык опера жана балет театрынын, Т.Сатылганов атындагы Кыргыз улуттук филармониясынын, Токтоболот Абдумомунов атындагы Кыргыз улуттук академиялык драма театрынын жана Чыңгыз Айтматов атындагы Кыргыз Республикасынын мамлекеттик улуттук орус драма театрынын артисттик персоналынын эселөө коэффициенттери ушул токтомдун 6-тиркемесинде белгиленгенден 20 пайызга жогору белгиленет;

2) С.Ибраимов атындагы Ош улуттук драма театрынын жана Бабур атындагы Ош мамлекеттик өзбек академиялык музыкалык-драма театрынын артисттик персоналынын эселөө коэффициенттери ушул токтомдун 6-тиркемесине ылайык республикалык мааниде колдонулат.

(КР Министрлер Кабинетинин 2022-жылдын 9-сентябрындагы № 497 токтомунун редакциясына ылайык)