КР 2020-жылдын 24-августундагы № 143 Мыйзамына ылайык КҮЧҮН ЖОГОТТУ

КЫРГЫЗ РЕСПУБЛИКАСЫНЫН МЫЙЗАМЫ

2012-жылдын 29-февралы № 9

"Кыргыз Республикасынын прокуратурасы жөнүндө" Кыргыз Республикасынын Мыйзамына өзгөртүүлөрдү жана толуктоолорду киргизүү тууралуу

1-берене.

"Кыргыз Республикасынын прокуратурасы жөнүндө" Кыргыз Республикасынын Мыйзамына (Кыргыз Республикасынын Жогорку Кеңешинин Жарчысы, 2009-ж., № 7, 734-ст.) төмөнкүдөй өзгөртүүлөр жана толуктоолор киргизилсин:

1. 1-беренедеги "борборлоштурулган" деген сөз алып салынсын.

2. 2-берененин 1-бөлүгү төмөнкүдөй редакцияда баяндалсын:

"1. Прокуратура органдарынын ишинин укуктук негизин Кыргыз Республикасынын Конституциясы, ушул Мыйзам жана башка ченемдик укуктук актылар, Кыргыз Республикасы катышуучу болуп саналган, мыйзам менен белгиленген тартипте күчүнө кирген эл аралык келишимдер, ошондой эле Кыргыз Республикасынын Башкы прокурорунун (мындан ары - Башкы прокурор) укуктук актылары түзөт.".

3. 3-берененин 1-бөлүгү төмөнкүдөй редакцияда баяндалсын:

"1. Мыйзамдын үстөмдүгүн, мыйзамдуулуктун биримдүүлүгүн жана чыңдалышын, ошондой эле коомдун жана мамлекеттин мыйзам менен корголуучу кызыкчылыктарын камсыз кылуу максатында Кыргыз Республикасынын прокуратурасы төмөнкүлөрдү жүзөгө ашырат:

1) аткаруу бийлигинин органдары, жергиликтүү өз алдынча башкаруу органдары, алардын кызмат адамдары тарабынан мыйзамдардын так жана бир түрдүү аткарылышына көзөмөлдү;

2) изин суутпай издөө ишин, тергөөнү жүзөгө ашыруучу органдар тарабынан мыйзамдардын сакталышы үчүн көзөмөлдү;

3) жазык иштери боюнча соттордун чечимдерин аткарууда, ошондой эле жарандардын жеке эркиндигин чектөөгө байланышкан мажбурлоо мүнөзүндөгү чараларды колдонууда мыйзамдардын сакталышы үчүн көзөмөлдү;

4) мыйзам менен аныкталган учурларда сотто жарандын же мамлекеттин кызыкчылыктарына өкүл болууну;

5) сотто мамлекеттик айыптоону колдоону;

6) мамлекеттик органдардын кызмат адамдарын жазыктык куугунтуктоону.".

4. 4-беренеде:

1-бөлүктөгү "борборлоштурулган" деген сөз алып салынсын;

3-бөлүктүн 1-пункту төмөнкүдөй редакцияда баяндалсын:

"1) мамлекеттик бийлик органдарына, жергиликтүү өз алдынча башкаруу органдарына, коммерциялык жана коммерциялык эмес уюмдарга көз карандысыз жана Кыргыз Республикасынын Конституциясына, ченемдик укуктук актыларга жана Кыргыз Республикасы катышуучу болуп саналган, мыйзамда белгиленген тартипте күчүнө кирген эл аралык келишимдерге так ылайык келген ыйгарым укуктарын жүзөгө ашырат;";

4-бөлүктөгү "мекемелердин жана менчигинин формасына карабастан ишканалардын," деген сөздөр алып салынсын.

5. 8-беренеде:

1-бөлүктөгү "Кыргыз Республикасынын Конституциялык сотунун, Кыргыз Республикасынын Жогорку сотунун" деген сөздөр "Кыргыз Республикасынын Жогорку сотунун жана Кыргыз Республикасынын Жогорку сотунун Конституциялык палатасынын" деген сөздөргө алмаштырылсын;

3-бөлүктөгү ", менчигинин түрүнө карабастан уюмдардын, мекемелердин жана ишканалардын" деген сөздөр "жана уюмдардын" деген сөздөргө алмаштырылсын.

6. 9-берененин 3-пункту "мыйзамда белгиленген тартипте" деген сөздөрдөн мурда "Кыргыз Республикасы катышуучу болуп саналган," деген сөздөр менен толукталсын.

7. 11-берененин 1-бөлүгү төмөнкүдөй редакцияда баяндалсын:

"1. Башкы прокуратура Кыргыз Республикасынын прокуратурасынын жогорку органы болуп саналат, ага Кыргыз Республикасынын Жогорку Кеңешинин депутаттарынын макулдугу менен Кыргыз Республикасынын Президенти тарабынан дайындалуучу Башкы прокурор башчылык кылат.

Башкы прокурор ушул Мыйзам менен каралган учурларда Кыргыз Республикасынын Жогорку Кеңешинин депутаттарынын жалпы санынын үчтөн биринен кем эмесинин макулдугу менен же болбосо Кыргыз Республикасынын Жогорку Кеңешинин депутаттарынын жалпы санынын үчтөн биринин демилгеси боюнча Кыргыз Республикасынын Жогорку Кеңешинин депутаттарынын үчтөн экисинин жактыруусу менен Кыргыз Республикасынын Президенти тарабынан кызматынан бошотулат.

Эгерде Кыргыз Республикасынын Президенти тарабынан Башкы прокурордун кызматына сунуш кылынган талапкер добуштардын талап кылынган санын албаса, анда Кыргыз Республикасынын Президенти 14 күндүн ичинде Кыргыз Республикасынын Жогорку Кеңешине жаңы талапкерди сунуштайт.".

8. 12-беренеде:

1-бөлүктө:

- 3-пункт төмөнкүдөй редакцияда баяндалсын:

"3) мыйзам менен белгиленген тартипте сүйлөшүүлөрдү жүргүзөт жана укуктук жардам жана кылмыштуулук менен күрөшүү маселелери боюнча Кыргыз Республикасынын эл аралык келишимдерине кол коет;";

- 5-пункт төмөнкүдөй редакцияда баяндалсын:

"5) Кыргыз Республикасынын Жогорку Кеңеши тарабынан кылмыш жасады деп айыптоо коюлган учурда Кыргыз Республикасынын Президентинин иш-аракеттеринде кылмыштын белгилери бар экендиги жөнүндө корутунду берет;";

4-бөлүктүн 1-пункту төмөнкүдөй редакцияда баяндалсын:

"1) мыйзамдардын жана башка ченемдик укуктук актылардын Кыргыз Республикасынын Конституциясына ылайык келбеген маселелер боюнча Кыргыз Республикасынын Жогорку сотунун Конституциялык палатасына кайрылууга;".

9. 19-берененин 3-бөлүгүндөгү "Кыргыз Республикасынын прокуратура органдары менен мекемелеринде кызмат өтөө тартиби жөнүндө" Жободо" деген сөздөр "Кыргыз Республикасынын мыйзамдары менен" деген сөздөргө, 49-беренедеги "Кыргыз Республикасынын прокуратура органдарында жана мекемелеринде кызмат өтөөнүн тартиби жөнүндө" Жобо менен" деген сөздөр "Кыргыз Республикасынын мыйзамдары менен" деген сөздөргө, 56-берененин 12-бөлүгүндөгү "Кыргыз Республикасынын прокуратура органдары менен мекемелеринде кызмат өтөөнүн тартиби жөнүндө" Жобого" деген сөздөр "Кыргыз Республикасынын мыйзамдарына" деген сөздөргө алмаштырылсын.

10. 20-беренеде:

2 жана 3-бөлүктөрдөгү "колдонуудагы" деген сөз алып салынсын;

5-бөлүк төмөнкүдөй редакцияда баяндалсын:

"5. Эл аралык-укуктук кызматташтык процессинде прокуратура Кыргыз Республикасы катышуучу болуп саналган, мыйзам менен белгиленген тартипте күчүнө кирген эл аралык келишимдер жана Кыргыз Республикасынын мыйзамдары менен каралган укуктук жардам көрсөтүү жөнүндө тапшырманы, экстрадициялоо жөнүндө өтүнүчтү, макулдашууну жана башка актыларды колдонот.".

11. 25-берененин 1-бөлүгүндөгү "коомдук (диний), коммерциялык эмес бирикмелердин" деген сөздөр "уюмдардын" деген сөзгө алмаштырылсын.

12. 31-берененин 1-бөлүгү төмөнкүдөй редакцияда баяндалсын:

"1. Төмөнкүлөр көзөмөлдүн предмети болуп саналат:

1) Кыргыз Республикасынын Өкмөтү, министрликтер, мамлекеттик комитеттер, администрациялык ведомстволор, кызматтар жана аткаруу бийлигинин башка органдары, жергиликтүү өз алдынча башкаруу органдары, алардын кызмат адамдары тарабынан Кыргыз Республикасынын Конституциясын сактоо, мыйзамдарды жана башка ченемдик укуктук актыларды так жана бир түрдүү аткаруу;

2) Кыргыз Республикасынын Өкмөтү жана жергиликтүү өз алдынча башкаруу өкүлчүлүктүү органдары тарабынан чыгарылган ченемдик укуктук актылардын, ошондой эле ушул беренеде көрсөтүлгөн органдар жана алардын кызмат адамдары тарабынан чыгарылган укуктук актылардын мыйзамдарга ылайык келүүсү.".

13. 32-берененин 1-бөлүгүнүн 4-пункту күчүн жоготту деп таанылсын.

14. 33-берененин 1-бөлүгүндөгү ", ошондой эле башкаруу органдары жана коммерциялык жана коммерциялык эмес уюмдардын жетекчилери" деген сөздөр алып салынсын.

15. 44-берененин 2-бөлүгү төмөнкүдөй редакцияда баяндалсын:

"2. Кыргыз Республикасынын прокуратура органдарында жана мекемелеринде кызмат өтөөнүн тартиби ушул Мыйзам жана Кыргыз Республикасынын Президенти тарабынан бекитилүүчү прокуратура органдарында жана мекемелеринде кызмат өтөөнүн тартиби жөнүндө Жобо менен аныкталат.".

16. 45-беренеде:

4-бөлүктөгү "Башкы прокурор тарабынан белгисиз мөөнөткө же 5 жылдан ашпаган мөөнөткө түзүлгөн эмгек келишиминин шарттарында" деген сөздөр "мыйзамдар менен белгиленген тартипте" деген сөздөргө алмаштырылсын;

10-бөлүктөгү "5 жылда" деген сөздөр "3 жылда" деген сөздөргө алмаштырылсын.

17. 47-берене төмөнкүдөй редакцияда баяндалсын:

"47-берене. Прокурордук кызматкерлердин атайын класстык чендери,

класстык чендери жана аскердик наамдары

1. Прокурорлорго жана тергөөчүлөргө, алардын ээлеген кызмат ордуна жана иш стажысына ылайык "Аскердик наамдарды, класстык чендерди, атайын класстык чендерди жана атайын наамдарды белгилөө жөнүндө" Кыргыз Республикасынын Мыйзамына жана "Мамлекеттик кызмат жөнүндө" Кыргыз Республикасынын Мыйзамына ылайык атайын класстык чендер, класстык чендер жана аскердик наамдар берилет.

2. Кыргыз Республикасынын прокуратура органдарынын жана мекемелеринин прокурорлору жана тергөөчүлөрү үчүн ээлеген кызмат орду боюнча төмөнкүдөй чектүү атайын класстык чендер жана аскердик наамдар берилет: