КЫРГЫЗ РЕСПУБЛИКАСЫНЫН ӨКМӨТҮ

БУЙРУК

2015-жылдын 10-декабры № 600-б

"Манас" эл аралык аэропорту" ачык акционердик коомунун структурасына кирген эл аралык жана региондук аэропортторду андан ары өнүктүрүү максатында, "Кыргыз Республикасынын Өкмөтү жөнүндө" Кыргыз Республикасынын конституциялык Мыйзамынын 10 жана 17-беренелерине ылайык:

1. Кыргыз Республикасынын Өкмөтүнө караштуу Мамлекеттик мүлктү башкаруу боюнча фонд "Манас" эл аралык аэропорту" ачык акционердик коомунун тийиштүү башкаруу органдарынын кароосуна төмөнкүдөй сунуштарды киргизсин:

- 2016-жылдын 1-январынан баштап "Манас" эл аралык аэропорту" ачык акционердик коомунун эл аралык аэропортторунан эл аралык аба линиялары боюнча учуп чыгуучу ар бир жүргүнчүдөн 15 (он беш) АКШ доллары өлчөмүндө аэропорттук акы алууну белгилөө жөнүндө;

- жогоруда айтылган каражатты "Манас" эл аралык аэропорту" ачык акционердик коомунун структурасына кирген эл аралык жана региондук аэропортторду өнүктүрүүгө жана мамлекеттик карыздык милдеттенмелер боюнча Кыргыз Республикасынын Финансы министрлигинин алдындагы Экономиканы өнүктүрүү боюнча мамлекеттик фондго карызды төлөөгө жумшоо жөнүндө.

2. Ушул буйруктун аткарылышын контролдоо Кыргыз Республикасынын Өкмөтүнүн Аппаратынын курулуш, транспорт жана коммуникациялар бөлүмүнө тапшырылсын.