КҮЧҮН ЖОГОТТУ

КЫРГЫЗ РЕСПУБЛИКАСЫНЫН ПРЕМЬЕР-МИНИСТРИ

2016-жылдын 24-марты № 142

 (КР Премьер-министринин 2017-жылдын 21-июнундагы № 439 буйругунун редакциясына ылайык)

Кыргыз Республикасынын Улуттук илимдер академиясынын "Э.З.Гареев атындагы ботаникалык бак" Илимий-изилдөө институтунун оперативдүү башкаруусунда турган Ботаникалык бактын аймагын калыбына келтирүүгө жана өнүктүрүүгө көмөк көрсөтүү максатында:

1. 2016-2017-жылдарга Биринчи кезектеги чаралардын планынын (мындан ары - План) долбоорун жана 2020-жылга чейин "Азия тоо багы" катары ботаникалык бакты калыбына келтирүү концепциясынын (мындан ары - Концепция) долбоорун иштеп чыгуу боюнча ведомстволор аралык жумушчу топ тиркемеге ылайык курамда түзүлсүн.

2. Ведомстволор аралык жумушчу топ:

- 2017-жылдын 15-июнуна чейин Ботаникалык бакты сактап калуу жана калыбына келтирүү үчүн биринчи кезектеги чаралардын тизмегин, анын ичинде аймакты тазалоону жана кайтарууну, тосмолорду, сугаруу системасын калыбына келтирүүнү, ботаникалык бактын аймагын топографиялык тартууларды жүргүзүүнү, "Э.З.Гареев атындагы ботаникалык бак" Илимий-изилдөө институтунун жайларын жеке адамдар тарабынан ижаралоо тууралуу маселени, Ботаникалык бактын аймагын элдин келүүсү үчүн ачууну, экскурсияларды, лекцияларды уюштурууну, китепканаларды ачууну, Ботаникалык бакты коргоону күчөтүү бөлүгүндө ченемдик укуктук актыларга толуктоолорду киргизүүнү жана башка чараларды караган пландын долбоорун иштеп чыксын;

- 2017-жылдын 15-сентябрына чейин 2020-жылга чейин "Азия тоо бага" катары ботаникалык бактын аймагын калыбына келтирүү боюнча концепциянын долбоорун иштеп чыксын жана Кыргыз Республикасынын Премьер-министринин алдындагы Илим жана инновациялар боюнча кеңештин жыйынына кароого киргизсин;

- "Арча жаратылыш мурасын сактоо боюнча демилгеси" коомдук фондун Пландын жана Концепциянын долбоорлорун иштеп чыгууга тартсын (макулдашуу боюнча);

- Пландын жана Концепциянын долбоорлорун мамлекеттик органдарды, илимий чөйрөнү, бизнес-коомчулукту, жарандык секторду жана донордук коомчулукту кошо, бардык кызыкдар тараптардын катышуусу менен иштеп чыгуу процессинин ачык-айкындыгын камсыздасын.

(КР Премьер-министринин 2017-жылдын 21-июнундагы № 439 буйругунун редакциясына ылайык)

3. Ведомстволор аралык жумушчу топко белгиленген тартипте төмөнкүлөргө укук берилсин:

- улуттук жана эл аралык эксперттерди, консультанттарды, мамлекеттик органдардын жана уюмдардын адистерин ишке тартууга;

- мамлекеттик органдардан жүктөлгөн милдеттерди ишке ашыруу үчүн материалдарды талап кылууга жана алууга.