(Кыргыз Республикасынын Министрлер Кабинетинин 2024-жылдын 16-февралындагы № 58 токтомуна)

Юридикалык жактарды, филиалдарды (өкүлчүлүктөрдү) электрондук формада мамлекеттик каттоо (кайра каттоо) жана ишин токтотууну каттоо ТАРТИБИ

1-глава. Жалпы жоболор

1. Бул Юридикалык жактарды, филиалдарды (өкүлчүлүктөрдү) электрондук формада мамлекеттик каттоо (кайра каттоо) жана ишин токтотууну каттоо тартиби (мындан ары - Тартип) Интернет маалыматтык-коммуникациялык тармагы аркылуу "Юридикалык жактарды, филиалдарды (өкүлчүлүктөрдү) электрондук каттоо, кайра каттоо жана ишин токтотууну каттоо" маалыматтык системасын пайдалануу менен юридикалык жактарды, филиалдарды (өкүлчүлүктөрдү) мамлекеттик каттоо (кайра каттоо) жана ишин токтотууну каттоо тартибин аныктайт.

Юридикалык жактарды, филиалдарды (өкүлчүлүктөрдү) электрондук формада мамлекеттик каттоо (кайра каттоо) жана ишин токтотууну каттоо (мындан ары - онлайн каттоо (кайра каттоо), ишин токтотууну онлайн каттоо) юридикалык жактарды каттоо чөйрөсүндөгү мыйзамдарга жана ушул Тартипке ылайык жүргүзүлөт.

2. Бул Тартипте төмөнкүдөй түшүнүктөр колдонулат:

1) "Юридикалык жактарды, филиалдарды (өкүлчүлүктөрдү) электрондук каттоо, кайра каттоо жана ишин токтотууну каттоо" маалыматтык системасы - Интернет маалыматтык-коммуникациялык тармагы (мындан ары - маалыматтык система) аркылуу юридикалык жактарды, филиалдарды (өкүлчүлүктөрдү) мамлекеттик каттоого (кайра каттоого) жана ишин токтотууну каттоого байланышкан арыздарды жана маалыматтарды кабыл алуу, иштеп чыгуу жана кароо процесстерин автоматташтырууга арналган маалыматтык система;

2) арыз ээси - юридикалык жактарды каттоо чөйрөсүндөгү мыйзамдарга ылайык арыз ээси катары чыгууга ыйгарым укуктуу адам;

3) каттоочу орган - юридикалык жактарды, филиалдарды (өкүлчүлүктөрдү) мамлекеттик каттоону (кайра каттоону) жана ишин токтотууну каттоону жүргүзүүчү Кыргыз Республикасынын Министрлер Кабинети тарабынан аныкталуучу ыйгарым укуктуу мамлекеттик орган жана анын аймактык органдары;

4) каттоочу - юридикалык жактарды, филиалдарды (өкүлчүлүктөрдү) мамлекеттик каттоо (кайра каттоо) жана ишин токтотууну каттоо боюнча арыздарды жана маалыматтарды маалыматтык системаны пайдалануу менен юридикалык жактарды каттоо чөйрөсүндөгү Кыргыз Республикасынын мыйзамдарына ылайык келүү предметине карата кароого ыйгарым укуктуу каттоочу органдын кызматкери;

5) электрондук кол тамга - электрондук формадагы башка маалыматка кошулган жана (же) аны менен логикалык жактан байланышкан, маалыматка кол койгон адамды аныктоо үчүн колдонулган электрондук формадагы маалымат.

3. Кыргыз Республикасынын аймагында юридикалык жактарды, филиалдарды (өкүлчүлүктөрдү) мамлекеттик каттоодо (кайра каттоодо) жана ишин токтотууну каттоодо электрондук документтерди, кагаз түрүндөгү электрондук форматтарды, электрондук кол тамгаларды түзүү жана пайдалануу тартиби Кыргыз Республикасынын электрондук башкаруу жана электрондук кол тамга чөйрөсүндөгү мыйзамдарына ылайык жүргүзүлөт.

4. Юридикалык жактарды, филиалдарды (өкүлчүлүктөрдү) онлайн каттоо (кайра каттоо) жана ишин токтотууну онлайн каттоо үчүн арыз ээсинде маалыматтык системада документтерге кол коюуга мүмкүндүк берген булут электрондук кол тамганын болушу зарыл.

5. Юридикалык жактарды, филиалдарды (өкүлчүлүктөрдү) каттоо (кайра каттоо) жана ишин токтотууну онлайн каттоо үчүн документтер каттоочу органга кагаз түрүндө электрондук форматта берилет.

Кагаз түрүндөгү электрондук үлгү ушул Тартиптин 5-главасында каралган тартипте техникалык каражаттардын жардамы менен түзүлөт.

6. Нотариат чөйрөсүндөгү мыйзамдарга ылайык нотариустар юридикалык жактарды, филиалдарды (өкүлчүлүктөрдү) онлайн каттоо (кайра каттоо) жана ишин токтотууну каттоо үчүн документтерди берүү укугуна ээ.

Юридикалык жактарды, филиалдарды (өкүлчүлүктөрдү) мамлекеттик каттоого (кайра каттоого) жана ишин токтотууну каттоого нотариус тарабынан документтерди берүүдө ишеним кат талап кылынбайт.