1-тиркеме

(Кыргыз Республикасынын Министрлер Кабинетинин 2023-жылдын 15-ноябрындагы № 607 токтомуна)

Мамлекеттик асыл тукум каттоо жөнүндө ЖОБО

1-глава. Жалпы жоболор

1. Бул Жободо төмөнкүдөй негизги түшүнүктөр колдонулат:

1) бонитировка - андан ары пайдалануу максатында асыл тукум жаныбарлардын асылдык жана азыктык сапатын, ошондой эле башка асыл тукум продукциянын сапатын баалоо;

2) асыл тукум жаныбарларды жана асыл тукум үйүрлөрдү мамлекеттик каттоо - асыл тукум жаныбарларды жана алардын үйүрлөрүн идентификациялоо, тегин аныктоо жана азыктыгын аныктоо максатында асыл тукум жаныбарлар жана асыл тукум үйүрлөрү жөнүндө маалыматтарды мамлекеттик китепте жана мамлекеттик асыл тукум каттоосунда эсепке алуу;

3) жеке идентификациялык номер - идентификацияланган жаныбарларга визуалдык, электрондук жана аралаш маалыматтык каражаттарды пайдалануу менен ыйгарылуучу, анын өмүрүнүн аягына чейин алмаштырылбай турган жана жаныбардын бир түрүнүн чегинде кайталангыс болуп саналган номер;

4) асыл тукум жаныбар - теги документтүү ырасталган, белгилүү бир породаны чыгарууга пайдаланылуучу жана мамлекеттик китепте жана мамлекеттик асыл тукум каттоосунда катталган айыл чарба жаныбарлары;

5) асыл тукум үйүрү - тигил же бул породанын стандарттуу талаптарына жооп берүүчү, атайын селекциялык-асылдандыруу иштери жүргүзүлө турган айыл чарба жаныбарларынын ар кандай жыныстагы жана жаштагы белгилүү бир сандагы асыл тукум тобу;

6) асыл тукум күбөлүгү - асылдандыруу ишин башкаруу боюнча ыйгарым укуктуу мамлекеттик орган тарабынан берилүүчү, асыл тукум жаныбарлардын тегин, азыктыгын жана башка сапаттарын, ошондой эле ата-энесинин генетикалык тектерин жана уруктун же түйүлдүктүн сапатын ырастаган документ;

7) асыл-тукумдук баалуулук - асыл тукум жаныбарлардын генетикалык потенциалынын деңгээли жана ал генетикалык потенциалдын тукумдун чарбалык пайдалуу белгилерине тийгизген таасири;

8) асылдандыруу иши - колдо болгон айыл чарба жаныбарларын сактоого жана сапатын жакшыртууга жана жаңы породаларын, түрлөрүн, линияларын чыгарууга багытталган зоотехникалык, биологиялык-генетикапык жана уюштуруучу-чарбалык иш-чаралардын системасы;

9) селекциялык-асылдандыруу иши - мал чарбасындагы асылдандыруу ишинде жаныбарлардын азыктык жана асыл тукумдук сапаттарын жакшыртууга багытталган иш-чаралардын комплекси;

10) асылдандыруу иштеринин субъекттери - асыл тукум жаныбарларды көбөйтүп, асыл тукум продукцияны (материалдарды) селекциялык максатта пайдаланып жана өндүрүп жаткан, ошондой эле асылдандыруу иштерине кызматтарды көрсөткөн жеке жана юридикалык жактар;

11) асылдандыруу ишин башкаруу боюнча ыйгарым укуктуу мамлекеттик орган - Кыргыз Республикасынын Министрлер Кабинети тарабынан аныкталган аткаруу бийлигинин асылдандыруу ишин башкаруу жаатындагы мамлекеттик органы.

2. Асыл тукум субъекттеринде асыл тукум жаныбарларды, асыл тукум үйүрлөрдү жана ар кандай түрдөгү жана породадагы канаттууларды эсепке алууну ишке ашыруу максатында асыл тукум мал чарбачылыгы жаатында маалымат базасын түзүү үчүн "Кыргыз Республикасынын мал чарбасындагы асылдандыруу иши жөнүндө" Кыргыз Республикасынын Мыйзамынын 7-беренесине ылайык жаныбарлардын жана үйүрлөрдүн мамлекеттик асыл тукум каттоосун (мындан ары - асыл тукум каттоо) жүргүзүүнүн тартиби белгиленет.

3. Мамлекеттик каттоо жүргүзүүнүн максаттары:

1) асыл тукум субъекттеринде асыл тукум жаныбарлардын сандык, сапаттык жана породалык курамы жөнүндө маалыматтардын жыйындысын түзүү;

2) асыл тукум субъекттериндеги асыл тукум жаныбарларды, үйүрлөрдү жана канаттууларды эсепке алуу (мамлекеттик асыл тукум заводдору, фермердик асыл тукум заводдору, фермердик асыл тукум фермалары);

3) асыл тукум жаныбарларды өстүрүү менен алектенген субъекттерге мамлекеттик колдоо чараларын аныктоо;

4) жаныбарлардын породалары менен асыл тукум иштерин жүргүзүүнү пландаштыруу үчүн маалымат базасын түзүү;

5) асыл тукум мал чарбачылыгы боюнча чарбалардын негизги иш жүргүзүүсүн баалоо;

6) Кыргыз Республикасынын Өкмөтүнүн 2015-жылдын 22-июлундагы № 516 "Кыргыз Республикасында асыл тукум заводдору жана фермалары статусун ыйгаруунун жана ажыратуунун тартибин бекитүү жөнүндө" токтомуна ылайык асыл тукум заводу жана асыл тукум фермасы статусуна (мындан ары - асыл тукум статусу) ээ субъекттерге коюлуучу талаптардын чарбаларда сакталышын көзөмөлдөө;

7) асыл тукум продукциясын (жаныбарларды, материалдарды) сертификациялоо жана анын маркетинги;

8) товардык чарбаларга сатууда же башка өлкөлөргө алып чыгууда асыл тукум жаныбарларды, үйүрлөрдү жана канаттууларды баалоо.

4. Ыйгарылган асыл тукум статусуна ылайык асылдандыруу иши жаатындагы ишти жүзөгө ашыруучу субъекттерге таандык асыл тукум жаныбарлар, үйүрлөр жана канаттуулар мамлекеттик каттоонун объекттери болуп саналат.