(Кыргыз Республикасынын Министрлер Кабинетинин 2024-жылдын 3-декабрындагы № 728 токтомуна)
"Балдарга жана жаштарга ыңгайлуу шаар" конкурсун өткөрүү тартиби жөнүндө ЖОБО
1. Жалпы жоболор
1. Бул Жобо шаарды туруктуу социалдык-экономикалык өнүктүрүүнүн алкагында жашы жете электер жана жаштар үчүн эң мыкты шарттарды түзүү боюнча конкурс өткөрүү тартибин аныктайт.
2. "Балдарга жана жаштарга ыңгайлуу шаар" конкурсу (мындан ары - конкурс) эки жылда бир жолу өткөрүлүп турат жана отчеттук календардык жылдан кийинки апрелдин биринчи жумуш күнүндө башталат. Кыргыз Республикасынын облустук жана райондук маанидеги бардык шаарлары конкурска тиешелүү өтүнмө берүү жолу менен катышат.
Шаарлардын конкурска катышуусу - өткөн конкурстун жыйынтыгы боюнча байгелүү орундар (1, 2 жана 3-орундар) ыйгарылган шаарлардан тышкары, мамлекеттик жаштар саясатын жана жергиликтүү маанидеги милдеттерди ишке ашыруунун алкагында милдеттүү. Жеңүүчү шаарлар кезектеги конкурстан кийин "Кыргызстандын жаштар шаары" же "Балдарга жана жаштарга ыңгайлуу шаар" наамын изденип алууга конкурска катыша алат.
3. Кыргыз Республикасынын жаштар саясаты чөйрөсүндөгү ыйгарым укуктуу мамлекеттик орган, Кыргыз Республикасынын Президентинин облустардагы ыйгарым укуктуу өкүлдөрү, жергиликтүү мамлекеттик администрация башчылары эки жылда бир жолу "Балдарга жана жаштарга ыңгайлуу шаар" конкурсун даярдоо жана өткөрүү боюнча уюштуруу иштерин жүргүзөт.
Жергиликтүү мамлекеттик администрациялар, жергиликтүү өз алдынча башкаруу органдары жана балдарды коргоо, билим берүү, саламаттык сактоо, маданият, прокуратура, жаштар, дене тарбия жана спорт, этностор аралык мамилелер, региондорду өнүктүрүү чөйрөсүндөгү ыйгарым укуктуу мамлекеттик органдын (мындан ары - ыйгарым укуктуу мамлекеттик орган) аймактык бөлүмдөрү ушул Жобонун 1-тиркемесине ылайык бир календардык жылда балдарга жана жаштарга карата ыңгайлуулуктун объективдүү көрсөткүчтөрүн чагылдырган тиешелүү документтерди даярдоого көмөк көрсөтөт.
4. Конкурска катышуу жана "Балдарга жана жаштарга ыңгайлуу шаар" наамын алуу үчүн критерийлер болуп төмөнкүлөр эсептелет:
- конкурстук тандоо башталганга чейин 30 жумуш күн мурун шаардын мэриясынын сайтында же башка жалпыга маалымдоо каражаттарында жарыяланган, конкурска чейинки отчеттук календардык жыл үчүн шаардагы балдардын жана жаштардын абалы жөнүндө баяндаманын болушу;
- ушул Жобонун 1-тиркемесине ылайык конкурска чейинки календардык жылда жетишилген балдарга жана жаштарга ыңгайлуулуктун индикаторлорунун (мындан ары - индикаторлор) көрсөткүчтөрүнүн мааниси.
2. Конкурстук комиссия
5. Конкурстук комиссия (мындан ары - комиссия) ыйгарым укуктуу мамлекеттик органдардын, ошондой эле коммерциялык эмес уюмдардын өкүлдөрүнүн жана жаштар саясаты чөйрөсүндөгү көз карандысыз эксперттердин ичинен тогуз адамдан кем эмес санда гендердик өкүлчүлүктү эске алуу менен түзүлөт. Конкурстук комиссиялардын курамы жыл сайын конкурс башталганга чейин жаңыланып турат.
6. Комиссия өз функцияларын коомдук башталышта жүзөгө ашырат.
7. Комиссиянын төрагасы болуп Кыргыз Республикасынын Министрлер Кабинетинин Төрагасынын социалдык блокту тескеген орун басары саналат.
8. Комиссиянын төрагасы төмөнкү функцияларды аткарат:
- комиссиянын ишин жалпы жетектейт;
- комиссиянын жыйналыштарын өткөрүүнүн датасын жана убактысын белгилейт;
- комиссиянын жыйналышын алып барат;
- комиссиянын жыйналыштарынын протоколдоруна кол коёт.
9. Комиссиянын төрагасы жок учурда анын милдеттерин комиссиянын төрагасынын орун басары - жаштар саясаты чөйрөсүндөгү ыйгарым укуктуу мамлекеттик органдын жетекчиси аткарат.
10. Комиссиянын ишин уюштуруучулук, методикалык жана башка камсыздоону жаштар саясаты чөйрөсүндөгү ыйгарым укуктуу орган (мындан ары - комиссиянын катчылыгы) жүзөгө ашырат.
11. Эгерде жыйналышка комиссиянын мүчөлөрүнүн жарымынан кем эмеси катышса, комиссиянын чечими укуктуу болуп саналат.
12. Комиссиянын чечими комиссиянын жыйналышка катышкан мүчөлөрүнүн жөнөкөй көпчүлүк добушу менен кабыл алынат. Комиссия мүчөлөрүнүн добуштары бирдей санда болуп калган учурда, комиссиянын төрагасынын добушу чечүүчү болуп саналат.
Ыйгарым укуктуу мамлекеттик органдардын жана коммерциялык эмес уюмдардын өкүлдөрүнүн ичинен комиссиянын бекитилген мүчөсүнүн конкурска катышуусу мүмкүн болбогон учурда, анын милдеттерин ошол органдын же уюмдун жетекчиси тарабынан расмий өкүлдөнгөн адам аткарат.
13. Комиссиянын мүчөлөрүнүн сырттан добуш берүү жолу менен чечим кабыл алуусуна жол берилбейт.
Комиссиянын мүчөсүнүн жана/же мүчөлөрүнүн жүйөлүү себептер боюнча катышуусу мүмкүн болбогон (добуш берүүгө катышуунун мүмкүн эместигинин анык себебин далилдеген тиешелүү документтерди көрсөтүү менен) же ал жеткис күчтүн (форс-мажор) жагдайлары келип чыккан учурда комиссиянын жыйналышын өткөрүүгө жана комиссия мүчөлөрүнүн онлайн-режиминде (түз көрсөтүү) добуш берүүсүнө жол берилет.