КЫРГЫЗ РЕСПУБЛИКАСЫНЫН МЫЙЗАМЫ

2025-жылдын 11-июну № 116

Кыргыз Республикасынын айрым мыйзам актыларына (Кыргыз Республикасынын Укук бузуулар жөнүндө кодексине, "Кыргыз Республикасынын ички иштер органдары жөнүндө" Кыргыз Республикасынын Мыйзамына) өзгөртүүлөрдү киргизүү жөнүндө

1-берене.

Кыргыз Республикасынын Укук бузуулар жөнүндө кодексине ("Эркин-Тоо" гезити, 2021-жылдын 16-ноябры, № 122-133) төмөнкүдөй өзгөртүүлөр киргизилсин:

1) 55-беренеде:

а) 1-бөлүк төмөнкүдөй мазмундагы абзац менен толукталсын:

"Укук бузуулардын бирдиктүү реестринин автоматташтырылган маалымат тутумунун (АМТ) ээси болуп ички иштер чөйрөсүндөгү ыйгарым укуктуу орган саналат.";

б) 2-бөлүк төмөнкүдөй редакцияда баяндалсын:

"2. Укук бузуулардын бирдиктүү реестри жөнүндө жобо Кыргыз Республикасынын Министрлер Кабинети тарабынан бекитилет.";

2) 452-берененин 2-бөлүгү күчүн жоготту деп таанылсын.

2-берене.

"Кыргыз Республикасынын ички иштер органдары жөнүндө" Кыргыз Республикасынын Мыйзамына (Кыргыз Республикасынын Жогорку Кеңешинин Ведомосттору, 1994-ж., № 3, 76-ст.) төмөнкүдөй өзгөртүү киргизилсин:

8-статьянын биринчи бөлүгү төмөнкүдөй мазмундагы 27-пункт менен толукталсын:

"27) Укук бузуулардын бирдиктүү реестрин жүргүзүү боюнча ишти Кыргыз Республикасынын мыйзамдарына ылайык жүзөгө ашырууга, ошондой эле жалпы статистикалык маалыматтарды түзүүгө жана белгиленген тартипте башка ведомстволорго жана инстанцияларга маалыматтарды берүүгө.".

3-берене.

Ушул Мыйзам расмий жарыяланган күндөн тартып күчүнө кирет.

Эркин-Тоо мамлекетик расмий газетасынын 2025-жылдын 13-июнундагы № 43 (3699) жарыяланды