КР Өкмөтүнүн 2018-жылдын 4-сентябрындагы № 417 токтомуна ылайык КҮЧҮН ЖОГОТТУ

КЫРГЫЗ РЕСПУБЛИКАСЫНЫН ӨКМӨТҮ

ТОКТОМ

2011-жылдын 1-июнундагы № 276

Инвестициялык фонддордун отчёттору жөнүндө жобону бекитүү тууралуу

«Кыргыз Республикасынын ченемдик укуктук актылары жөнүндө» жана «Баалуу кагаздар рыногу жөнүндө» мыйзамдарына ылайык Кыргыз Республикасынын Өкмөтү токтом кылат:

1. Инвестициялык фонддордун отчёттору жөнүндөгү жобо бекитилсин.

2. Бул токтом 2011-жылдын 1-январынан тартып күчүнө кирет.

3. Бул токтом расмий жалпыга маалымдоо каражаттарында жарыялансын.

Инвестициялык фонддордун отчёттору жөнүндөгү жобо

1. Жалпы жоболор

1. Бул Жобо «Кыргыз Республикасынын ченемдик укуктук актылары жөнүндө», «Инвестициялык фонддор жөнүндө», «Бухгалтердик эсеп жөнүндөгү» Кыргыз Республикасынын мыйзамдарына жана Каржылык отчёттуулуктун эл аралык стандарттарына ылайык (мындан ары - КОЭАС) иштелип чыкты.

2. Бул Жобо төмөнкүлөрдү аныктайт:

- акционердик жана үлүштүк инвестициялык фонддордун иши жөнүндө отчёт түзүү жана берүү тартибин (мындан ары - инвестициялык фонддордун отчёттору);

- инвестициялык фонддордун отчетторунун курамы жана формасы.

3. Инвестициялык фонддордун каржылык абалы жөнүндө маалыматты билдирет.

2. Инвестициялык фонддордун отчётторун түзүү

4. Акционердик инвестициялык фонддун же үлүштүк инвестициялык фонддун башкаруучу компаниясынын жетекчиси инвестициялык фонддордун иши жөнүндө отчётторду түзүү жана берүү үчүн жоопкерчиликтүү болот.

5. Акционердик инвестициялык фонддун аткаруучу органы же үлүштүк инвестициялык фонддун башкаруучу компаниясы инвестициялык фонддордун отчётторун түзүү жана берүү үчүн төмөнкүлөрдү дайындашы мүмкүн:

а) кызмат адамын - бухгалтерди;

б) түзүмдүк бөлүмү катары бухгалтердик кызматты;

в) адистешкен уюмду же бухгалтерди - контракттык негиздеги адисти.

6. Инвестициялык фонддордун отчётторун акционердик инвестициялык фонд жана үлүштүк инвестициялык фонддун башкаруучу компаниясы түзөт.

7. Акционердик инвестициялык фонддордун аткаруучу органынын жетекчиси же үлүштүк инвестициялык фонддун башкаруучу компаниясынын жетекчиси жана ыйгарым укуктуу органдын инвестициялык фонддордун отчётторун түзүүгө жоопкер кызмат адамы инвестициялык фонддордун бардык түзүлгөн отчётторунун формаларына колдорун коёт жана аларга башкаруучу компаниянын мөөрүн басылып күбөлөндүрүлөт.

Ошондой эле фонддун директорлор кеңешинин төрагасы инвестициялык фонддордун баардык түзүлгөн отчётторунун формаларына «тааныштым» деген белгини коюп, колун коёт жака инвестициялык фонддун мөөрүн басып күбөлөндүрөт.

8. Инвестициялык фонддун отчётторун түзүүгө жоопкер адам инвестициялык фонддордун отчётторунда камтылган маалыматтардын чындыгы үчүн ушул Жобого жана Кыргыз Республикасынын ченемдик укуктук актыларына ылайык жоопкерчиликти тартат.

3. Инвестициялык фонддордун отчётторун берүү

9. Ушул Жобо менен бекитилген инвестициялык фонддордун отчётторун Акционердик инвестициялык фонддордун аткаруучу органы (мындан ары - акционердик инвестициялык фонд) же үлүштүк инвестициялык фонддун башкаруучу компаниясы ушул Жобо менен бекитилген мөөнөттөрдө берет.

10. Акционердик инвестициялык фонддор жана үлүштүк инвестициялык фонддун башкаруучу компаниясы отчётторду ички жана тышкы пайдалануучуларга - башкаруу органдарына, инвестициялык фонддордун болгон же потенциалдуу инвесторлоруна, мамлекеттик органдарга Кыргыз Республикасынын мыйзамдарына ылайык берет.

11. Акционердик инвестициялык фонддорду же үлүштүк инвестициялык фонддун башкаруучу компаниясын аудитордук текшерүүлөрдүн жыйынтыгы жылдык отчёттуулуктун бөлүгү болуп саналат.

12. Акционердик инвестициялык фонддор жана үлүштүк инвестициялык фонддун башкаруучу компаниялары төмөнкүдөй формадагы отчётторду түзүүгө жана берүүгө милдеттүү:

- акционердик инвестициялык фонддор (акционердик инвестициялык фонддордун отчётторунун формалары - 1-тиркеме)

- үлүштүк инвестициялык фонддун башкаруучу компаниясы (Үлүштүк инвестициялык фонддун башкаруучу компаниясынын отчётторунун формалары - 2 тиркеме)