КЫРГЫЗ РЕСПУБЛИКАСЫНЫН ӨКМӨТҮ

БУЙРУК

2012-жылдын 10-сентябры № 451-б

Гранттык каражаттарды тартуу жана Кыргыз Республикасынын Өкмөтү менен Кытай Эл Республикасынын Өкмөтүнүн ортосундагы техника-экономикалык кызматташууну өнүктүрүү максатында:

1. Кыргыз Республикасынын Өкмөтү менен Кытай Эл Республикасынын Өкмөтүнүн ортосундагы Техника-экономикалык кызматташуу жөнүндө макулдашуунун тиркелген долбоору жактырылсын.

2. Кыргыз Республикасынын экономика министрине принциптүү эмес мүнөздөгү өзгөртүүлөрдү жана толуктоолорду киргизүү укугу менен ушул Макулдашууга кол коюуга ыйгарым укук берилсин.

Долбоор

Кыргыз Республикасынын Өкмөтү менен Кытай Эл Республикасынын Өкмөтүнүн  ортосундагы Техника - экономикалык кызматташуу жөнүндө

Макулдашуу

Кыргыз Республикасынын Өкмөтү менен Кытай Эл Республикасынын Өкмөтү достук мамилелерин жана техника-экономикалык кызматташуусун андан ары өнүктүрүү максатында төмөнкүлөр тууралуу ушул Макулдашууну түзүштү:

1-берене

Кыргыз Республикасынын Өкмөтүнүн суроо-талабына ылайык Кытай Эл Республикасынын Өкмөтү Кыргыз Республикасынын Өкмөтүнө жалпы суммасы 10 (он) миллион кытай юаны болгон кайтарымсыз грант берет.

2-берене

Жогоруда аталган кайтарымсыз грант эки өлкөнүн Өкмөттөрү макулдашкан долбоорлорду ишке ашыруу үчүн колдонулат. Конкреттүү маселелер кошумча эки тараптуу Макулдашууда белгиленет.

3-берене

Ушул Макулдашууну аткаруу үчүн эсептик жол-жоболор боюнча тиешелүү Макулдашуу Кыргыз Республикасынын Өкмөтү тарабынан дайындалган орган менен Кытайдын Мамлекеттик өнүктүрүү банкынын ортосунда кошумча кол коюлат.

4-берене

Бул Макулдашуу кол коюлган күндөн тартып күчүнө кирет жана эки өлкөнүн Өкмөттөрү ушул Макулдашуудан келип чыккан милдеттерди толук аткарганга чейин күчүндө болот.

Бишкек шаарында, 2012-жылдын “_’’-сентябрында ар бир тарап үчүн эки нускада, ар бири кыргыз, кытай жана орус тилдеринде түзүлдү, мында бардык тексттер бирдей күчкө ээ болот.