13-тиркеме

 

(Кыргыз Республикасынын Министрлер Кабинетинин 2024-жылдын 7-мартындагы № 98 токтому менен бекитилди)

 

Кыргыз Республикасынын Суу ресурстары, айыл чарба

жана кайра иштетүү өнөр жайы министрлигине караштуу

Кайра иштетүү өнөр жайы жана органикалык айыл чарба

департаменти жөнүндө

жобо

 

1-глава. Жалпы жоболор

1. Кыргыз Республикасынын Суу ресурстары, айыл чарба жана кайра иштетүү өнөр жайы министрлигине караштуу Кайра иштетүү өнөр жайы жана органикалык айыл чарба департаменти (мындан ары – Департамент) Кыргыз Республикасынын Суу ресурстары, айыл чарба жана кайра иштетүү өнөр жайы министрлигинин (мындан ары – Министрлик) тамак-аш өнөр жайын, айыл чарба продукциясын кайра иштетүү жана экспорттоо, жашыл айыл чарбасы жана органикалык өндүрүш жаатындагы мамлекеттик саясатты ишке ашыруу боюнча функцияларды камсыз кылуучу ведомстволук бөлүмү болуп саналат.

Департамент тамак-аш өнөр жайын жана айыл чарба продукциясын кайра иштетүүнү, жашыл айыл чарбасын, органикалык өндүрүштү өнүктүрүү жаатында мамлекеттик саясатты жана ченемдик укуктук жөнгө салууну иштеп чыгуу, климаттын өзгөрүшүнө байланыштуу айыл чарбасы чөйрөсүндө айыл чарба продукциясын, анын ичинде органикалык продукцияны экспорттоону адаптациялоо жана митигациалоо чараларын ишке ашыруу боюнча Министрликке жүктөлгөн функцияларды жүзөгө ашырат.

2. Департамент Кыргыз Республикасынын Айыл чарба министрлигинин Органикалык айыл чарба департаментинин укук улантуучусу болуп саналат.

3. Департамент өз ишинде Кыргыз Республикасынын Конституциясын жана Кыргыз Республикасынын мыйзамдарын, Кыргыз Республикасынын Президентинин жарлыктарын жана тескемелерин, Кыргыз Республикасынын Министрлер Кабинетинин токтомдорун жана тескемелерин, Министрликтин чечимдерин, башка ченемдик укуктук актыларды, эл аралык укуктун жалпы таанылган принциптерин жана ченемдерин, ошондой эле Кыргыз Республикасынын мыйзамдарына ылайык күчүнө кирген эл аралык келишимдерди жана ушул Жобону жетекчиликке алат.

4. Департамент өз ишин Министрликтин башка ведомстволук бөлүмдөрү жана уюмдары, ошондой эле министрликтердин, мамлекеттик комитеттин жана административдик ведомстволордун тийиштүү бөлүмдөрү, коомдук жана башка уюмдар менен өз ара аракеттенүү менен жүзөгө ашырат.

5. Департамент Кыргыз Республикасынын Мамлекеттик гербинин сүрөтү түшүрүлгөн жана өзүнүн аталышы мамлекеттик жана расмий тилдерде жазылган мөөрү бар, Кыргыз Республикасынын Финансы министрлигинин казыналык системасында өз алдынча балансы, алыш-бериш жана башка эсептери бар, ошондой эле белгиленген үлгүдөгү мамлекеттик жана расмий тилдердеги бланктары жана башка атрибуттары бар юридикалык жак болуп эсептелет.

6. Департамент уюштуруучулук-укуктук формасы боюнча мамлекеттик мекеме болуп эсептелет, Департаменттин кызматкерлери мамлекеттик жарандык кызматчылар болуп саналат.

Департаменттин расмий аталышы:

– мамлекеттик тилде: “Кыргыз Республикасынын Суу ресурстары, айыл чарба жана кайра иштетүү өнөр жайы министрлигине караштуу Кайра иштетүү өнөр жайы жана органикалык айыл чарба департаменти”;

– расмий тилде: “Департамент перерабатывающей промышленности и органического сельского хозяйства при Министерстве водных ресурсов, сельского хозяйства и перерабатывающей промышленности Кыргызской Республики”.

Департаменттин кыскартылган аталышы:

– мамлекеттик тилде: “КИӨЖОАЧД”;

– расмий тилде: “ДППОСХ”.

7. Департаменттин юридикалык дареги: Кыргыз Республикасы, Чүй облусу, Сокулук району, Новопавловка айылы, Депо көчөсү, 80.