КЫРГЫЗ РЕСПУБЛИКАСЫНЫН ЭМГЕК, СОЦИАЛДЫК КАМСЫЗДОО ЖАНА МИГРАЦИЯ МИНИСТРЛИГИНИН БУЙРУГУ

2026-жылдын 10-августу № 187

“Бала ырысы” ар айлык жөлөкпулун берүү тартиби жөнүндө жобого Усулдук көрсөтмөлөрдү бекитүү тууралуу

Кыргыз Республикасынын Министрлер Кабинетинин 2026-жылдын 15-июнундагы № 421 “Бала ырысы” ар айлык жөлөкпулун берүү тартиби жөнүндө” токтомун ишке ашыруу максатында, Кыргыз Республикасынын Министрлер Кабинетинин 2025-жылдын 4-июнундагы № 319 “Мамлекеттик органдардын укуктук мүнөзгө ээ актыларын кабыл алуу тартиби жөнүндө” токтому менен бекитилген Мамлекеттик органдардын укуктук мүнөзгө ээ актыларын кабыл алуу тартибинин 3 жана 4-пункттарын, ошондой эле Кыргыз Республикасынын Министрлер Кабинетинин 2021-жылдын 15-ноябрындагы № 252 токтому менен бекитилген “Кыргыз Республикасынын Эмгек, социалдык камсыздоо жана миграция министрлиги жөнүндө” Жобону жетекчиликке алып, буйрук кылам:

1. “Бала ырысы” ар айлык жөлөкпулун берүү тартиби жөнүндө жобого Усулдук көрсөтмөлөр (мындан ары – Усулдук көрсөтмөлөр) тиркемеге ылайык бекитилсин.

2. Кыргыз Республикасынын Эмгек, социалдык камсыздоо жана миграция министрлигине караштуу Социалдык коргоо департаменти (мындан ары – Социалдык коргоо департаменти) тиркемеге ылайык “Бала ырысы” ар айлык жөлөкпулун берүү маселелери боюнча Кыргыз Республикасынын Эмгек, социалдык камсыздоо жана миграция министрлигинин аймактык башкармалыктарына (мындан ары – аймактык башкармалыктар) практикалык жана усулдук жардам көрсөтсүн.

3. Аймактык башкармалыктардын жетекчилери:

1) “Бала ырысы” ар айлык жөлөкпулун дайындоодо Усулдук көрсөтмөлөрдү жетекчиликке алсын;

2) жалпыга маалымдоо каражаттарын тартуу менен бирге, калк арасында “Бала ырысы” ар айлык жөлөкпулун берүү маселелери боюнча түшүндүрүү иштерин туруктуу негизде жүргүзсүн.

4. Аймактык башкармалыктардын балдарды коргоо боюнча кызматкерлери социалдык кызматкерлер менен биргеликте, төрөлгөндөн баштап үч жашка чейинки балдары бар жана турмуштук оор кырдаалда турган үй-бүлөлөргө зарыл болгон социалдык, укуктук, психологиялык-педагогикалык жана медициналык жардам көрсөтөрү белгиленсин.

5. Төмөнкүлөргө жеке жоопкерчилик жүктөлсүн:

1) “Бала ырысы” ар айлык жөлөкпулун туура дайындоо, “Бирдиктүү социалдык камсыздоо системасы” автоматташтырылган маалыматтык системасына маалыматтарды толук, так жана өз убагында киргизүү, ошондой эле ушул буйруктун жана Усулдук көрсөтмөлөрдүн талаптарын сактоо үчүн аймактык бөлүмдөрдүн жетекчилерине;

2) аймактык бөлүмдөрдү усулдук жактан коштоп жүрүүнү уюштуруу жана “Бала ырысы” ар айлык жөлөкпулун берүү маселелери боюнча алардын ишин координациялоо үчүн Социалдык коргоо департаментинин жетекчисине.

6. Кыргыз Республикасынын Эмгек, социалдык камсыздоо жана миграция министрлигинин (мындан ары – Министрлик) Сатып алууларды уюштуруу жана техникалык тейлөө бөлүмү төмөнкүлөрдү камсыз кылсын:

1) “Бирдиктүү социалдык камсыздоо системасы” автоматташтырылган маалыматтык системасынын “Бала ырысы” ар айлык жөлөкпулун дайындоо, кайра эсептөө жана төлөө, ошондой эле кирүүчү жана чыгуучу маалыматтарды түзүү бөлүгүндө үзгүлтүксүз иштешин;

2) бул буйрукту катталган күндөн тартып үч жумушчу күндүн ичинде Министрликтин расмий сайтына жайгаштырууну.

7. Министрликтин Социалдык төлөмдөр башкармалыгы ушул буйрук кабыл алынган күндөн тартып жети жумуш күндүн ичинде анын электрондук версиясын мамлекеттик жана расмий тилдерде электрондук документ жүгүртүү системасы аркылуу Кыргыз Республикасынын Юстиция министрлигине Укук маалыматтарынын борбордоштурулган банкына киргизүү үчүн жөнөтсүн.

8. Министрликтин Аткарууну контролдоо жана канцелярия бөлүмү ушул буйрукту аткаруучуларга жеткирсин.

9. Бул буйрук кол коюлган күндөн тартып күчүнө кирет.

10. Бул буйруктун аткарылышын контролдоо министрдин орун басары М.К. Байгончоковго жүктөлсүн.