ЖАЛАЛ-АБАД ШААРДЫК КЕҢЕШИ

ТОКТОМ

VIII-чакырылыш кезектеги VI-сессия

 

2018-жылдын 11-апрели № 1

Жалал-Абад шаарынын мектепке чейинки билим берүү мекемелеринде ата-эне төлөмүн төлөө, төлөөдөн бошотуу жана чогулган ата-эне төлөмдөрүн чыгымдоо Жобосун, Мугалимдер күнүнө карата берилүүчү материалдык жардам жөнүндө Жобосун бекитүү жөнүндө

 

Кыргыз Республикасынын “Мектепке чейинки билим берүү жөнүндө” мыйзамынын 24-беренесин, Жалал-Абад шаардык билим берүү бөлүмүнүн 01.12.2017-жылдагы чыг.№01-10/740 жана 27.02.2018-ж. чыг.№01-10/201 катты негиз кылып, шаардык кеӊештин социалдык, укуктук маселелер, мыйзамдуулук, партиялар, депутаттык этика, депутаттык ишмердүүлүк, коомдук уюмдар, жана кыймылдар боюнча туруктуу комиссиясынын корутундусуна ылайык Жалал-Абад шаардык кеӊешинин кезектеги VI сессиясы

ТОКТОМ КЫЛАТ:

1. Жалал-Абад шаарынын мектепке чейинки билим берүү мекемелеринде ата-эне төлөмүн төлөө, төлөөдөн бошотуу жана чогулган ата-эне төлөмдөрүн чыгымдоо Жобосу №1-тиркемеге ылайык бекитилсин.

2. “Мугалимдер күнүнө” карата берилүүчү материалдык жардам жөнүндө Жобосу №2-тиркемеге ылайык бекитилсин.

3. Жалал-Абад шаардык билим берүү бөлүмүнүн башчысына (Ы.Калчаев) өз ишмердүүлүгүндө ушул Жоболордогу ченемдердин негизинде иш жүргүзүү жагы милдеттендирилсин.

4. Ушул токтомду массалык маалымат каражаттарында жарыялап, Кыргыз Республикасынын Юстиция министрлигине мамлекеттик реестрге киргизүү жагы шаардык кеӊештин жооптуу катчысына (Б.Беркбаева) милдеттендирилсин.

5. Ушул токтомдун аткарылышын көзөмөлгө алуу жагы шаардык кеңештин социалдык, укуктук маселелер, мыйзамдуулук, партиялар, депутаттык этика, депутаттык ишмердүүлүк, коомдук уюмдар, жана кыймылдар боюнча туруктуу комиссиясына (С.Чимбердиев) милдеттендирилсин.

6. Ушул токтом Жалал-Абад шаарынын www.jacity.kg расмий сайтында жарыялангандан тартып күчүнө кирет.

 

Жалал-Абад шаардык кеӊешинин

11-апрель 2018-жылдагы кезектеги

VI сессиясынын № _1_-токтомуна

№1-тиркеме

Жалал-Абад шаарынын мектепке чейинки билим берүү мекемелеринде ата-эне төлөмүн төлөө, төлөөдөн бошотуу жана чогулган ата-эне төлөмдөрүн чыгымдоо

Жобо Кыргыз Республикасынын Президентинин 23.12.1992-ж. №УП-391 «Кыргыз Республикасындагы мектепке чейинки мекемелерде балдарды багуу» Указынын, Кыргыз Республикасынын «Мектепке чейинки билим берүү жөнүндө» мыйзамынын жана Кыргыз Республикасынын «Мугалимдин статусу жөнүндө» мыйзамын негиз катары иштелип чыкты

 

1. Балдар бакчасында тарбияланган балдардан ата-энелердин төлөмдөрүн кабыл алуунун тартиби.

 

Ата энелердин төлөмдөрүн кабыл алуу шаардык билим берүү бөлүмү менен коммерциялык банктын келишиминин негизинде жүргүзүлөт. Ата-энелердин төлөмдөрдү коммерциялык банктар, филиалдары жана терминалдары аркылуу ар айдын 10-күнүнө чейин алдын ала төлөнүп, ай толук бүткөндөн кийин баланын келгендигине жараша кайрадан эсептешүү жүргүзүлөт. Банктык кызмат үчүн төлөм ата-эненин эсебинен төлөнөт. Алдын ала төлөм кечиктирилген учурда тарбиялануучу баланы кабыл алуу убактылуу токтотулат. Тарбияланган балага себептүү келбеген күндөрү үчүн төлөм эсептелинбейт. Ата-энелер төлөмүнүн өлчөмү шаардык билим берүү бөлүмүнүн сунушунун негизинде шаардык кеӊештин токтому менен бекитилет. Ата-энелер төлөмү аныкталган өлчөм (фиксированный) болуп эсептелип, айдын жумуш күндөрүнө бөлүү менен эсептешүү жүргүзүлөт. Тарбиялануучу бала ай толук бүтө электе балдар бакчасынан чыгарылса, айырмасы ата эненин арызынын негизинде кайтарылып берилет.

2. Балдар бакчасында тарбияланган балдарды ата-энелер төлөмүнөн бошотуунун тартиби.

 

Ата-энелер төлөмүнүн ченеми бир жылдан кем эмес убакытка белгиленет.

Бала бакчаларда тарбияланган балдардын ата-энелеринен (мыйзамдуу өкүлү) төмөнкү учурларда ата энелер төлөмдөрүнөн бошотулат;

 - ата-энеси 1-2-тайпадагы майыптар, тоголок жетимдер, майып балдар, кургак учук-интокцикациясы бар балдар 100%га бошотулат.