КЫРГЫЗ РЕСПУБЛИКАСЫНЫН МЫЙЗАМЫ

1996-жылдын 26-июну № 23

Эмгек акыны, пенсияларды, пособиелерди, стипендияларды жана башка социалдык төлөөлөрдү өз убагында берүүнү камсыз кылуу жөнүндө

(КР 2011-жылдын 19-июлундагы № 113, 2015-жылдын 18-декабрындагы № 227, 2023-жылдын 9-мартындагы № 55 Мыйзамдарынын редакцияларына ылайык)

Бул Мыйзам белгиленген социалдык төлөөлөрдү толук көлөмдө алууга болгон граждандардын укуктарын камсыз кылуунун механизмин жана менчигинин жана чарба жүргүзүшүнүн түрүнө карабастан, бардык ишканалар, мекемелер жана уюмдары тарабынан эмгек акыны, пенсияларды, пособиелерди, стипендияларды жана башка социалдык төлөөлөрдү төлөп берүүнүн мөөнөттөрүн бузууда күнөөкөрлөрдүн жоопкерчилигин Кыргыз Республикасынын Конституциясына жана Эмгекти Эл аралык уюштуруу Конвенциясына ылайык аныктайт.

(КР 2023-жылдын 9-мартындагы № 55 Мыйзамынын редакциясына ылайык)

1-статья.

Эмгек акыны, пенсияларды, пособиелерди, стипендияларды жана башка социалдык төлөөлөрдү төлөп берүүнү кечиктирүүгө жол берилбейт. Каражаттардын жоктугу эмгек акыны, пенсияларды, пособиелерди, стипендияларды жана башка социалдык төлөөлөрдү мөөнөтүндө жана толук көлөмдө төлөп берүү үчүн жоопкерчиликтен бошотпойт.

(КР 2023-жылдын 9-мартындагы N 55 Мыйзамынын редакциясына ылайык)

2-статья.

Эмгек акы, пенсиялар, пособиелер, стипендиялар жана башка социалдык төлөөлөр Кыргыз Республикасынын улуттук валютасы менен гана төлөнөт.

(КР 2023-жылдын 9-мартындагы N 55 Мыйзамынын редакциясына ылайык)

3-статья.

Ишканалар тарабынан эмгек келишимине ылайык эмгек акыны жана башка социалдык төлөөлөрдү, ошондой эле компенсацияларды, пособиелерди жана стипендияларды төлөп берүүнүн мөөнөттөрү жамааттык келишимдерде, макулдашууларда жана контракттарда айына кеминде бир жолу белгиленет.

(КР 2023-жылдын 9-мартындагы № 55 Мыйзамынын редакциясына ылайык)