КЫРГЫЗ РЕСПУБЛИКАСЫНЫН МЫЙЗАМЫ

2003-жылдын 12-августу № 197 

Жазык-аткаруу (пенитенциардык) тутумунун органдары жана мекемелери жөнүндө

  Мыйзамдарынын редакцияларына ылайык)

Ушул Мыйзам Кыргыз Республикасынын мыйзамдарына ылайык жазык жазаларын аткарууну, кылмыш жасаган адамдарды камакта кармоону жүзөгө ашыруучу органдардын жана мекемелердин ишинин негиздерин, жазык-аткаруу тутумунун статусун, пенитенциардык кызматтын кызматкерлеринин укуктук абалын аныктайт.

I Глава Жалпы жоболор

1-статья. Жазык-аткаруу тутумунун иш принциптери

Жазык-аткаруу тутумунун иши мыйзамдуулуктун, гумандуулуктун жана адамдын укуктарын урматтоо принциптеринин негизинде жүзөгө ашырылат.

2-статья. Жазык-аткаруу тутумунун милдеттери

Жазык-аткаруу тутумунун милдеттери:

- Кыргыз Республикасынын жазык-аткаруу иши чөйрөсүндөгү мыйзамдарына ылайык жазык жазаларын аткаруу;

- кылмыш жасаган адамдарды тергөө абактарында Кыргыз Республикасынын жазык-аткаруу иши чөйрөсүндөгү мыйзамдарына ылайык кармоо;

- жазык-аткаруу тутумунун мекемелеринде укук тартибин жана мыйзамдуулукту, аларда кармалып турган соттолгон, камоодо кармалган адамдардын, ошондой эле ал мекемелердин аймагындагы кызмат адамдарынын жана жарандардын коопсуздугун камсыз кылуу;

- (абзац КР 2021-жылдын 23-апрелиндеги № 56 Мыйзамына ылайык күчүн жоготту)

- соттолгондорду эмгекке тартуу, ошондой эле аларга жалпы жана кесиптик билим берүүнү камсыз кылуу;

- соттолгондордун саламаттыгын сактоону камсыз кылуу;

- кайрымдуулук, коомдук жана башка бюджеттен тышкаркы каражаттарды кыйла кеңири тартуу жана максаттуу пайдалануу үчүн шартты камсыз кылуу;

- изин суутпай издөө ишин жүзөгө ашыруу, ошондой эле аны жүзөгө ашыруучу органдарга кылмыштарды ачууда жана алардын алдын алууда көмөк көрсөтүү;