КЫРГЫЗ РЕСПУБЛИКАСЫНЫН ӨКМӨТҮ

БУЙРУК

2019-жылдын 20-февралы № 25-б

"Кыргыз Республикасында бажылык жөнгө салуу жөнүндө" Кыргыз Республикасынын Мыйзамына, "Кыргыз Республикасынын Өкмөтү жөнүндө" Кыргыз Республикасынын конституциялык Мыйзамынын 10 жана 17-беренелерине ылайык:

1. Кыргыз Республикасынын Өкмөтүнө караштуу Курчап турган чөйрөнү коргоо жана токой чарбасы мамлекеттик агенттиги, Кыргыз Республикасынын Өзгөчө кырдаалдар министрлиги, Кыргыз Республикасынын Саламаттык сактоо министрлиги жана Кыргыз Республикасынын Өкмөтүнө караштуу Экологиялык жана техникалык коопсуздук боюнча мамлекеттик инспекция, "Кумтөр Голд Компани" жабык акционердик коому деңиз контейнерлеринин химиялык жана радиациялык булгануусу белгиленген ченемдерге шайкеш экендигине экспертиза жасагандан кийин тиркемеге ылайык текшерүү жүргүзүшсүн.

2. Кыргыз Республикасынын Өкмөтүнө караштуу Мамлекеттик бажы кызматы ушул буйруктун 1-пунктунда аталган жол-жобо аткарылгандан кийин жана деңиз контейнерлери Евразия экономикалык бирлигинин Бажы кодексинин 7-беренесинин 3-пунктунун талаптарына туура келген шартта, "Кумтөр Голд Компани" жабык акционердик коомунун арызынын негизинде аларды мамлекеттин пайдасына баш тартуу бажылык жол-жобосуна тиркемеге ылайык жайгаштырсын.

3. Кыргыз Республикасынын Өкмөтүнө караштуу Мамлекеттик мүлктү башкаруу боюнча фонд:

- ушул буйруктун 2-пунктуна ылайык мамлекеттин пайдасына баш тартуунун жол-жобосуна жайгаштырылган деңиз контейнерлерин белгиленген тартипте мамлекеттин менчигине кабыл алсын жана аталган деңиз контейнерлерин оперативдүү башкарууга кабыл алуучу мамлекеттик органдар менен биргеликте тиркемеге ылайык деңиз контейнерлеринин наркын бааласын;

- контейнерлерди мамлекеттин пайдасына баш тартуу менен бажы жол-жобосуна жайгаштыруу таризделген күндөн тартып эки айдын ичинде деңиз контейнерлерин Кыргыз Республикасынын Өкмөтүнө караштуу Өнөр жай, энергетика жана жер казынасын пайдалануу мамлекеттик комитетинин алдындагы "Көмүр" мамлекеттик ишканасынын (мындан ары "Көмүр" мамлекеттик ишканасы) Ысык-Көл облусунун Балыкчы шаарындагы аймагына жеткирүү жана ушул буйруктун 2-пунктуна ылайык өткөрүп берүү жол-жобосун "Кумтөр Голд Компани" жабык акционердик коому менен белгиленген тартипте макулдашсын;

- ушул буйруктун 2-пунктуна ылайык мамлекеттин пайдасына баш тартуунун жол-жобосуна жайгаштырылган деңиз контейнерлерин бошотулганына жана мамлекеттик органдардан арыздардын түшкөнүнө жараша, аларды пайдалануунун максаттарына ылайык мамлекеттик органдарга оперативдүү башкарууга өткөрүп берсин.

4. "Көмүр" мамлекеттик ишканасы мамлекеттин менчигине кабыл алынган деңиз контейнерлерин жүктөп жана жөнөтүү боюнча практикалык чараларды ишке ашырсын жана аларды белгиленген тартипте бөлүштүргөнгө чейин сакталуусун камсыздасын.

5. Ушул буйруктун аткарылышын контролдоо Кыргыз Республикасынын Өкмөтүнүн Аппаратынын агроөнөр жай комплекси жана экология бөлүмүнө жүктөлсүн.

 

Премьер-министр

М.Д.Абылгазиев

 

Тиркеме

Мамлекеттин менчигине кабыл алынып жаткан деңиз контейнерлеринин тизмеси