КЫРГЫЗ РЕСПУБЛИКАСЫНЫН МИНИСТРЛЕР КАБИНЕТИНИН тескемеси

2026-жылдын 20-апрели № 266-т

Мамлекеттик ички жол-жоболорду аткаруу максатында, "Кыргыз Республикасынын эл аралык келишимдери жөнүндө" Кыргыз Республикасынын Мыйзамынын 8-беренесине, "Кыргыз Республикасынын Министрлер Кабинети жөнүндө" Кыргыз Республикасынын конституциялык Мыйзамынын 13, 17-беренелерине ылайык:

1. Евразия экономикалык бирлигинде товарлар менен электрондук соода жөнүндө макулдашуунун расмий тилде тиркелген долбоору жактырылсын.

2. Кыргыз Республикасынын Министрлер Кабинетинин Төрагасынын биринчи орун басарына ушул тескеменин 1-пунктунда көрсөтүлгөн Макулдашуунун долбооруна принциптүү эмес мүнөздөгү өзгөртүүлөрдү жана толуктоолорду киргизүү укугу менен кол коюуга ыйгарым укук берилсин.

Евразия экономикалык бирлигинде товарлар менен электрондук соода жөнүндө МАКУЛДАШУУ

Евразия экономикалык бирлигинин мүчө мамлекеттери, мындан ары мүчө мамлекеттер деп аталып,

2014-жылдын 29-майындагы Евразия экономикалык бирлиги жөнүндө келишимге таянып (мындан ары - Келишим), экономикалык кызматташтыкты жана соода-экономикалык байланыштарды өнүктүрүү ниетин ырастап,

Евразия экономикалык бирлигинин (мындан ары - Бирлик) ички рыногунун иштешин камсыз кылууда жана анын мүчө мамлекеттеринин экономикасын өнүктүрүүдө товарлардын өз ара электрондук соодасынын маанилүү ролун жана маанисин таанып, товарлардын өз ара электрондук соодасын өнүктүрүү жана ишке ашыруу үчүн шарттарды камсыз кылууга умтулуп, ошондой эле Бирликтеги товарлардын электрондук соодасынын катышуучуларынын укуктарын коргоону көздөп,

Бирликтеги товарлардын өз ара электрондук соодасын уюштуруу жана ишке ашыруу эрежелерин аныктоону каалап,

Бирликтеги товарлардын өз ара электрондук сооданын катышуучуларын басмырлабоочу принциптерине таянып, төмөнкүлөр жөнүндө макулдашышты:

1-берене. Макулдашууну колдонуу предмети жана чөйрөсү

1. Ушул Макулдашуу Бирликтин ички рыногунда электрондук сооданын кесипкөй катышуучулары тарабынан керектөөчүгө товарды сунуштоо жана (же) "Интернет" маалыматтык-телекоммуникациялык тармагын пайдалануу менен аралыктан сатуу жолу менен жүзөгө ашырылуучу ишкердик ишти жөнгө салууга багытталган (мындан ары - товарлардын өз ара электрондук соодасы).

Бул Макулдашуу товарларды өз ара электрондук соодага байланыштуу укуктук мамилелерге жайылтылат, анын алкагында товарлардын электрондук соодасынын кеминде бир кесипкөй катышуучусу же керектөөчү башка мүчө мамлекеттин жараны болуп саналат.

2. Товарлардын өз ара электрондук соодасын жүзөгө ашырууга байланыштуу укуктук мамилелер Бирликтин укугун түзгөн Келишим, башка эл аралык келишимдер жана актылар, ошондой эле мүчө мамлекеттердин мыйзамдары менен да жөнгө салынат.

3. Ушул Макулдашуу электрондук сооданын алкагында сатылып алынган товарларды Бажы бирлигинин бажы чек арасы аркылуу жылдырууга байланыштуу укуктук мамилелерге жайылтылбайт.

Ушул Макулдашуу биржалык (уюштурулган) соодага, ошондой эле баалуу кагаздарды жана валюталык баалуулуктарды сатууга байланыштуу мамилелерге жайылтылбайт.

2-берене. Аныктамалар

1. Ушул Макулдашуунун максаттары үчүн төмөнкүдөй түшүнүктөр колдонулат:

"коштоочу кызмат көрсөтүүчү жак" - мүчө мамлекеттин аймагында катталган юридикалык жак же мүчө мамлекетте туруктуу жашаган жери бар, юридикалык жакты түзбөстөн ишкердик ишти жүзөгө ашыруучу (ишкердик ишти жүзөгө ашырууга укугу бар) жеке жак, ошондой эле мүчө мамлекеттин мыйзамдарына ылайык жеке ишкер катары катталган, коштоочу кызмат көрсөтүүчү жеке жак;

"электрондук документ жүгүртүүнүн улуттук оператору" - электрондук документ жүгүртүү чөйрөсүндөгү ошол мүчө мамлекеттин мыйзамдарында белгиленген талаптарга жооп берген жана юридикалык күчкө ээ болгон электрондук документтерди алмашууну камсыз кылган мүчө мамлекеттин аймагында катталган юридикалык жак;

"электрондук соода аянтынын оператору" - мүчө мамлекеттин аймагында катталган, электрондук соода аянтынын ээлери болуп саналат жана (же) аны башкарууну жүзөгө ашыруучу, сатуучуларга жана керектөөчүлөргө электрондук соода аянтын пайдалануу менен товарды сатууга байланышкан кызматтарды көрсөтүүчү юридикалык жак же мүчө мамлекеттин мыйзамдарына ылайык жеке ишкер катары катталган жеке жак, алар;

"ачык маалыматтар" - мүчө мамлекеттердин мыйзамдарына, Бирликтин укугун түзгөн эл аралык келишимдерге жана актыларга ылайык жалпыга жеткиликтүү болгон, мүчө мамлекеттердин мамлекеттик бийлик органдары же Евразия экономикалык комиссиясы тарабынан "Интернет" маалыматтык-телекоммуникациялык тармагында жайгаштыруу аркылуу чектелбеген адамдардын чөйрөсүнө берилүүчү товарлардын өз ара электрондук соодасын жүргүзүүнү жүзөгө ашырууга тиешелүү маалымат;

"персоналдык маалыматтар" - мүчө мамлекеттин мыйзамдарына ылайык, түздөн-түз же кыйыр түрдө аныкталган же аныкталуучу жеке адамга (персоналдык маалыматтардын субъектисине) тиешелүү болгон ар кандай маалымат;

"керектөөчү" - мүчө мамлекетте туруктуу жашаган же анын аймагында убактылуу жүргөн, "Интернет" маалыматтык-телекоммуникациялык тармагы аркылуу товарды жеке (тиричилик) муктаждыктары үчүн гана сатып алууга ниеттенген же сатып алган, ишкердик ишин жүзөгө ашырууга байланышпаган жеке адам;

"сатуучу" - мүчө мамлекеттин аймагында катталган юридикалык жак же мүчө мамлекетте туруктуу жашаган жери бар, юридикалык жакты түзбөстөн ишкердик иш жүргүзгөн (ишкердик иш жүргүзүүгө укугу бар) жеке жак, ошондой эле мүчө мамлекеттин мыйзамдарына ылайык жеке ишкер катары катталган, керектөөчүгө товарларды чекене сатып алуу-сатуу келишими же керектөөчүгө товарды сатууну караган башка келишим боюнча өз ара электрондук сооданын алкагында өз алдынча же электрондук соода аянтчасынын операторунун кызматтарын пайдалануу менен товарларды сунуштаган жана (же) саткан жеке жак;

"электрондук сооданын кесипкөй катышуучулары" - сатуучулар, электрондук соода аянтчаларынын операторлору;

"коштоочу кызмат көрсөтүүлөр" - товарлардын өз ара электрондук соодасын жүзөгө ашырууга байланышкан кызмат көрсөтүүлөр;

"товар" - өз ара электрондук сооданын алкагында сатылуучу товарлар, санариптик товарлар, ар кандай кыймылдуу мүлк, ошондой эле мүчө мамлекеттердин мыйзамдарына ылайык кыймылсыз мүлккө теңештирилген башка жылдырылуучу буюмдар;

"ыйгарым укуктуу органдар" - мүчө мамлекеттердин мыйзамдарына ылайык товарлардын өз ара электрондук соодасын жөнгө салуу чараларын кабыл алууну жана (же) колдонууну, ошондой эле товарлардын жүгүртүлүшүнө контролду жана керектөөчүлөрдүн укуктарын коргоону жүзөгө ашыруучу мүчө мамлекеттердин мамлекеттик бийлик органдары;

"электрондук сооданын катышуучулары" - электрондук сооданын кесипкөй катышуучулары, тиешелүү кызматтарды көрсөтүүчү жактар жана керектөөчүлөр;

"санариптик товар" - санариптик технологиялардын жардамы менен катталган (санариптик форматка которулган) жана электрондук соода аянтчасында керектөөчүгө сатууга арналган продукт, анын ичинде электрондук эсептөө машиналары үчүн программалар жана программалардын элементтери (программа тарабынан түзүлгөн аудиовизуалдык чагылдырууларды кошо алганда), фонограммалар, аудиовизуалдык чыгармалар, мультимедиялык продуктулар жана интеллектуалдык ишмердүүлүктүн башка натыйжалары. Санариптик товар мамлекет-мүчөнүн мыйзамдарына ылайык аныкталган санариптик белгилерди (токендерди), виртуалдык (санариптик) активдерди, санариптик финансылык активдерди, башка санариптик укуктарды жана санариптик валюталарды камтыбайт;

"электрондук соода аянтчасы" - программалык-аппараттык комплекс же маалыматтык-телекоммуникациялык система (анын ичинде "Интернет" маалыматтык-телекоммуникациялык тармагындагы сайт же сайттын бөлүгү, электрондук эсептөө машиналары үчүн программа), товарларды өз ара электрондук соодалоо мүмкүнчүлүгүн камсыз кылуучу (анын ичинде сатуучу тарабынан товарды сатуу жөнүндө сунуштарды жайгаштыруу аркылуу керектөөчүлөрдү алар менен тааныштыруу, товарды жарнамалоо, чекене сатып алуу-сатуу келишимин же керектөөчүгө товарды сатууну караган башка келишимди түзүү, товар үчүн эсептешүүлөр, керектөөчүгө товарды жеткирүүнү уюштуруу).

Ушул Макулдашууда колдонулган башка түшүнүктөр Келишимде жана Бирликтин алкагындагы эл аралык келишимдерде аныкталган маанилерде түшүнүлөт.

3-берене. Товарлардын өз ара электрондук соодасын жүргүзүү

1. Товарлар менен өз ара электрондук соода жүргүзүү жөнүндөгү келишимдин жоболоруна ылайык, товарлардын жана аларга тиешелүү кызматтардын эркин жылышы камсыздалат.

2. Евразия экономикалык бирлигинин алкагында кызмат көрсөтүүлөрдүн бирдиктүү рыногу иштеген кызмат көрсөтүү секторлорунун (секторчолорунун) тизмесине кирбеген, финансылык жана транспорттук кызмат көрсөтүүлөрдөн тышкары, коштоочу кызмат көрсөтүүлөр Келишимдин XV бөлүмү жана Кызмат көрсөтүүлөр менен соода кылуу, уюмдаштыруу, иш жүргүзүү жана инвестицияларды ишке ашыруу жөнүндө протокол (Келишимге № 16 тиркеме) менен белгиленген тартипте жана шарттарда Жогорку Евразия экономикалык кеңешинин чечими менен мындай тизмеге киргизилет.

3. Коштоочу финансылык жана транспорттук кызматтарды көрсөтүү Финансылык кызматтар боюнча протоколго (Келишимге № 17 тиркеме) жана Координацияланган (макулдашылган) транспорттук саясат жөнүндө протоколго (Келишимге № 24 тиркеме) ылайык жүзөгө ашырылат.

4. Мүчө мамлекеттер товарлардын өз ара электрондук соодасынын алкагында санариптик товарлардын эркин жылышын камсыз кылуу максатында программалык камсыздоонун баштапкы кодун берүү же ага жеткиликтүүлүктү камсыз кылуу талаптарын өз рыногуна кирүү шарты катары белгилешпейт.

Бул жобо маалыматты криптографиялык коргоо каражаттары менен өз ара электрондук соодага жайылтылбайт.

5. Электрондук соода аянтчаларынын операторлору товарлардын өз ара электрондук соодасын жүргүзүү алкагында сатуучуларга жана кайсы бир мүчө мамлекеттин товарларына өз кызматтарына жеткиликтүүлүктү камсыздайт жана аларды өзүнүн же башка мүчө мамлекеттин сатуучуларына жана товарларына берилген шарттардан кем эмес ыңгайлуу шарттарда көрсөтөт.

4-берене. Товарлардын өз ара электрондук соодасын жөнгө салуу

1. Товарлардын өз ара электрондук соодасын жөнгө салуу жана электрондук сооданын катышуучуларынын укуктарын жана мыйзамдуу кызыкчылыктарын камсыз кылуу максатында Евразия экономикалык комиссиясынын (мындан ары - Комиссия) Кеңеши тарабынан төмөнкүлөр бекитилет:

а) чекене соода-сатык келишимин же товарды керектөөчүгө сатууну караган башка келишимди (мындан ары - келишим) түзүү жөнүндө ачык офертанын мазмуну, ошондой эле аны жарыялоонун жана анын өзгөргөндүгү жөнүндө кабарлоонун тартиби жагынан электрондук сооданын кесипкөй катышуучуларына талаптар;

б) электрондук соода аянтчасынын операторлоруна алардын сатуучуларга кызмат көрсөтүүсү жөнүндө ачык офертаны жарыялоо жана өзгөртүү тууралуу кабарлоо тартиби бөлүгүндө талаптар;

в) товарды сатууга сунуштоо учурунда электрондук сооданын кесипкөй катышуучулары тарабынан милдеттүү түрдө берилүүчү бул товар жөнүндө, электрондук соода аянтчасынын сатуучусу жана оператору жөнүндө маалыматтардын жана башка зарыл маалыматтардын тизмеси;

г) эгерде мындай бирликтердин иши мүчө мамлекеттин мыйзамдарына каршы келбесе, электрондук сооданын катышуучуларынын ортосундагы, анын ичинде керектөөчүлөрдүн укуктарын коргоо коомдорунун базасында, ошондой эле электрондук сооданын кесипкөй катышуучуларынын жана алардын бирликтеринин ортосундагы талаш-тартыштарды сотко чейин жөнгө салуу тартибине карата талаптар;

д) келишимдин аткарылышынын жүрүшү жөнүндө керектөөчүгө маалымдоого карата талаптар;

е) товарды кайтарып берүү шарттары;

ж) акча каражаттарын кайтаруунун шарттары жана мөөнөттөрү.

2. Комиссиянын кеңеши зарыл болгон учурда программалык-аппараттык комплексти же маалыматтык-телекоммуникациялык системаны (анын ичинде сайтты же "Интернет" маалыматтык-телекоммуникациялык тармактагы сайттын бөлүгүн, электрондук эсептөө машиналары үчүн программаны) товарларды өз ара электрондук соодалоонун алкагында электрондук соода аянтчасына киргизүү критерийлеринин тизмесин бекитет.

3. Товарды келишим боюнча электрондук соода аянтчасынын оператору өз алдынча саткан учурда, электрондук соода аянтчасынын мындай оператору дагы сатуучу болуп саналат.

4. Комиссия мүчө мамлекеттердин аймактарында алардын мыйзамдарына ылайык "Интернет" маалыматтык-телекоммуникациялык тармагы аркылуу сатууга тыюу салынган же чектелген товарлардын реестрин түзөт жана аны Бирликтин расмий сайтына "Интернет" маалыматтык-телекоммуникациялык тармагында жайгаштырат.

Аталган реестрди түзүүнүн жана жүргүзүүнүн тартиби Комиссия тарабынан бекитилет.

5-берене. Керектөөчүлөрдүн укуктары жана аларды коргоо

1. Керектөөчүлөрдүн укуктарын коргоо мүчө мамлекеттер тарабынан Келишимге жана керектөөчү жайгашкан мүчө мамлекеттин мыйзамдарына ылайык, товарлардын өз ара электрондук соодасынын өзгөчөлүктөрүн эске алуу менен сооданын башка түрлөрү үчүн каралгандан төмөн эмес деңгээлде ишке ашырылат.

2. Керектөөчү товарды өткөрүп бергенге чейин же товарды керектөөчүгө өткөрүп берген күндөн тартып 14 календардык күндүн ичинде тиешелүү сапаттагы товардан баш тартууга жана ушул Макулдашуунун 4-беренесинин 1-пунктунун "е" пунктчасына ылайык белгиленген товарларды кайтаруу шарттарын эске алуу менен товарды кайтарып берүүгө укуктуу. Мүчө мамлекеттер керектөөчү тиешелүү сапаттагы товардан баш тартууга укуктуу болгон узагыраак мөөнөттөрдү белгилей алышат.

3. Керектөөчү тийиштүү сапаттагы товардан баш тарткан учурда, электрондук сооданын кесипкөй катышуучусу ага керектөөчү келишим боюнча төлөгөн акча каражаттарын ушул Макулдашуунун 4-беренесинин 1-пунктунун "ж" пунктчасына ылайык белгиленген мөөнөттө кайтарып берет.

4. Электрондук соода аянтчасынын оператору сатуучулар менен керектөөчүлөрдүн ортосундагы талаш-тартыштарды сотко чейин жөнгө салуу максатында алардын өз ара аракеттенүүсүнө көмөктөшөт.

5. Электрондук сооданын кесипкөй катышуучусу товарды төлөөнүн ыкмаларын, анын ичинде мүчө мамлекеттердин улуттук төлөм системаларын (инструменттерин) колдонуу менен, керектөөчү жайгашкан аймактагы мүчө мамлекеттин мыйзамдарынын талаптарына ылайык колдонуу мүмкүнчүлүгүн өз алдынча аныктайт.

6-берене. Жарнамалык электрондук билдирүүлөр

Товарларды өз ара электрондук соодалоонун алкагында:

керектөөчүнүн макулдугу болгон шартта жарнамалык электрондук билдирүүлөрдү жөнөтүүгө жол берилет;

керектөөчүгө жарнамалык электрондук билдирүүлөрдү алуудан баш тартуу мүмкүнчүлүгү берилет.

7-берене. Товарлардын өз ара электрондук соодасы чөйрөсүндө пайдаланылуучу маалыматтар

1. Мүчө мамлекеттер тизмеги Комиссиянын Кеңеши тарабынан бекитилүүчү ачык маалыматтарга электрондук сооданын катышуучуларына эркин жеткиликтүүлүктүн берилишин камсыз кылышат.

2. Өз ара электрондук соода алкагында пайдаланылуучу жеке маалымат товарларын жыйноону, иштеп чыгууну жана сактоону чектөө же тыюу салуу боюнча талаптар мүчө мамлекет тарабынан өзүнүн электрондук соода катышуучуларына карата да, ошондой эле башка мүчө мамлекеттердин электрондук соода катышуучуларына карата да бирдей түрдө белгиленет жана колдонулат.

Мүчө мамлекеттер аталган талаптардын белгиленгендиги жөнүндө ушул Макулдашуунун 11-беренесинде каралган мөөнөттө Комиссияга маалымдайт.

3. Эгерде мүчө мамлекеттердин мыйзамдарында өздөрүнүн кесипкөй электрондук соодасынын катышуучуларына жана коштоочу кызматтарды көрсөтүүчү жактарга карата башкача белгиленбесе, жеке маалыматтарды жана жайылтылышы чектелген башка маалыматтарды кошпогондо, электрондук сооданын кесипкөй катышуучулары жана коштоочу кызматтарды көрсөтүүчү жактар өздөрүнүн сайттарынын маалыматтарын жайгаштырган жана сактаган мүчө-мамлекетти өз алдынча аныктоого укуктуу.

Көрсөтүлгөн жобо мүчө мамлекет тарабынан "Интернет" маалыматтык-телекоммуникациялык тармагынын сегментинде ушул мүчө-мамлекеттин домендик аталышын пайдалануучу сайттардын маалыматтарын сактоо боюнча талаптар белгиленген учурда колдонулбайт.

8-берене. Электрондук документтер

1. Комиссиянын Кеңеши тарабынан мындай документ жүгүртүүнүн алкагында электрондук документтерди жана электрондук санариптик кол тамганы (электрондук кол тамганы) өз ара таануу максатында Электрондук документ жүгүртүүнүн улуттук операторлорунун жана ишенимдүү үчүнчү жактардын катышуусу менен электрондук сооданын кесипкөй катышуучуларынын, ошондой эле коштоочу кызмат көрсөтүүчү адамдардын ортосундагы электрондук документ жүгүртүүнүн базалык модели аныкталат.

Электрондук сооданын кесипкөй катышуучулары жана коштоочу кызматтарды көрсөтүүчү жактар товарларды өз ара электрондук соодалоонун алкагында колдонулуучу документ жүгүртүүнүн (электрондук жана (же) кагаз) түрүн өз алдынча аныкташат. Электрондук документ жүгүртүүнү ишке ашырууда аталган базалык модель колдонулат.

2. Мүчө мамлекеттерде колдонулуучу электрондук документтердин, алардын түзүмдөрүнүн жана форматтарынын реестри, ошондой эле электрондук документ жүгүртүүнү колдонуу үчүн зарыл болгон башка реестрлер Бирликтин расмий сайтында "Интернет" маалыматтык-телекоммуникациялык тармагында жайгаштырылат. Аталган реестрлерди түзүү жана жүргүзүү Комиссия тарабынан бекитилген тартипте жүзөгө ашырылат.

3. Мүчө-мамлекет ыйгарым укуктуу органдардын электрондук сооданын кесипкөй катышуучулары жана коштоочу кызматтарды көрсөтүүчү жактар менен трансчек аралык маалыматтык өз ара аракеттенүүсүндө башка мүчө-мамлекеттин ушул башка мүчө мамлекеттин мыйзамдарына ылайык электрондук санариптик кол тамга (электрондук кол тамга) менен кол коюлган электрондук документтердин аныктыгын (жарактуулугун) тааныйт, эгерде мындай электрондук документтердин аныктыгы (жарактуулугу) биринчи мүчө мамлекеттин ишенимдүү үчүнчү тарабынан алынган маалыматтын негизинде ырасталса, комиссия тарабынан белгиленген тартипте жүргүзүлөт.

9-берене. Мүчө мамлекеттердин мыйзамдарын жакындаштыруу

Комиссиянын аянтчасында мүчө мамлекеттердин товарларды өз ара электрондук соода чөйрөсүндө мыйзамдарын жакындаштыруу маселелери боюнча үзгүлтүксүз консультациялар өткөрүлүп турат.

10-берене. Ыйгарым укуктуу органдардын өз ара аракети

1. Мүчө мамлекеттер ушул Макулдашууну ишке ашыруу жана (же) товарларды өз ара электрондук соода чөйрөсүндөгү ишти координациялоо үчүн жооптуу органдарды аныкташат жана бул жөнүндө Комиссияга кабарлашат.

2. Мүчө мамлекеттер ушул Макулдашуу менен жөнгө салынуучу маселелер боюнча ыйгарым укуктуу органдардын ортосундагы өз ара аракеттенүүнү камсыз кылууда бири-бирине көмөк көрсөтүшөт.

Товарларды өз ара электрондук соода чөйрөсүндө бузууларды болтурбоо жана өз ара аракеттенүүнүн натыйжалуулугун камсыз кылуу үчүн, анын ичинде маалымат алмашуу максатында ыйгарым укуктуу органдар эки тараптуу жана көп тараптуу макулдашууларды түзүшү мүмкүн.

3. Ыйгарым укуктуу органдардын өз ара аракеттенүүсү өзүнө төмөнкүлөрдү камтыйт:

а) ыкчам маалымат алмашуу;

б) укук бузуулардын алдын алуу механизмин түзүү жана электрондук сооданын катышуучуларынын мыйзамдуу кызыкчылыктарын;

в) керектөөчүлөрдүн укуктарын коргоо чөйрөсүндөгү көйгөйлүү маселелер жана кырдаалдар боюнча консультацияларды өткөрүү жана биргелешип талкуулоо.

4. Бир мүчө-мамлекеттин ыйгарым укуктуу органдары башка мүчө мамлекеттердин ыйгарым укуктуу органдарына жана Комиссияга ушул мүчө мамлекеттин аймагында же башка мүчө мамлекеттердин аймактарында адамдардын, жаныбарлардын, өсүмдүктөрдүн ден соолугуна же коопсуздугуна зыян келтирүүгө жөндөмдүү болгон электрондук соодага катышуучулардын кайсынысынын болбосун белгилүү болгон аракеттери жөнүндө кыска мөөнөттө маалымдайт.

11-берене. Билдирүүлөр

1. Ыйгарым укуктуу органдар Комиссияга товарларды өз ара электрондук соодалоо маселелерин жөнгө салуучу ченемдик укуктук актылардын орус тилиндеги көчүрмөлөрүн (орус тилине котормосу менен) алар кабыл алынган күндөн тартып 10 календардык күндөн кечиктирбестен жиберет.

2. Комиссия ченемдик укуктук актылардын алынган көчүрмөлөрүн Бирликтин расмий сайтына "Интернет" маалыматтык-телекоммуникациялык тармагында жайгаштырат.

12-берене. Талаш-тартыштардын чечилиши

Ушул Макулдашууну чечмелөөгө жана (же) колдонууга байланыштуу талаш-тартыштар келишимде аныкталган тартипте чечилет.

13-берене. Макулдашууга өзгөртүүлөрдү киргизүү

Ушул Макулдашууга мүчө мамлекеттердин өз ара макулдугу боюнча өзгөртүүлөр киргизилиши мүмкүн, алар өзүнчө протоколдор менен таризделет жана ушул Макулдашуунун ажырагыс бөлүгү болуп саналат.

14-берене. Корутунду жоболор

1. Ушул Макулдашуу Бирликтин алкагында түзүлгөн эл аралык келишим болуп саналат жана Бирликтин укугуна кирет.

2. Ушул Макулдашуу анын күчүнө кириши үчүн зарыл болгон мүчө мамлекеттер ички мамлекеттик жол-жоболорду аткаргандыгы жөнүндө жазуу жүзүндөгү акыркы билдирүүнү депозитарий дипломатиялык каналдар аркылуу алган күндөн тартып 180 күн өткөндөн кийин күчүнө кирет.

_______________ шаарында 20_____- жылдын "____" ___________________ бир түп нускада орус тилинде түзүлгөн.

Бул Макулдашуунун түп нускасы Евразия экономикалык комиссиясында сакталат, ал ушул Макулдашуунун депозитарийи болуп саналуу менен ар бир мүчө мамлекетке анын күбөлөндүрүлгөн көчүрмөсүн жөнөтөт.