КЫРГЫЗ РЕСПУБЛИКАСЫНЫН МИНИСТРЛЕР КАБИНЕТИНИН ТЕСКЕМЕСИ

2026-жылдын 12-октябры № 771-т

Мамлекеттик мүлктү пайдалануунун натыйжалуулугун жогорулатуу, Кыргыз Республикасынын Ысык-Көл облусунун Каракол шаарынын социалдык жана турак жай инфраструктурасын өнүктүрүү максатында, Каракол шаардык кеңешинин 2026-жылдын 21-июлундагы № 29-26/2 токтомун көңүлгө алып, Кыргыз Республикасынын Министрлер Кабинетинин 2024-жылдын 23-июлундагы № 405 «Мамлекеттик мүлктү муниципалдык менчикке өткөрүп берүүнүн тартибин бекитүү жөнүндө» токтому менен бекитилген Мамлекеттик мүлктү муниципалдык менчикке өткөрүп берүүнүн тартибинин 5, 8-пункттарына, «Мүлккө муниципалдык менчик жөнүндө» Кыргыз Республикасынын Мыйзамынын 5, 6-статьяларына, «Кыргыз Республикасынын Министрлер Кабинети жөнүндө» Кыргыз Республикасынын конституциялык Мыйзамынын 13, 17-беренелерине ылайык:

1. Кыргыз Республикасынын Министрлер Кабинетине караштуу Мамлекеттик мүлктү башкаруу боюнча мамлекеттик агенттик Кыргыз Республикасы, Ысык-Көл облусу, Каракол шаары, Ж. Алышбаев көчөсү, 194 дарегинде жайгашкан мамлекеттик менчикте турган, идентификациялык коду 2-01-01-0068-0001, аянты 7481,2 м² болгон жер тилкесин, андагы курулуштары жана курулмалары менен Кыргыз Республикасынын Ысык-Көл облусунун Каракол шаарынын мэриясынын муниципалдык менчигине шаардын инфраструктурасын өнүктүрүү үчүн белгиленген тартипте өткөрүп берсин.

2. Кыргыз Республикасынын Ысык-Көл облусунун Каракол шаарынын мэриясына белгиленген тартипте төмөнкүлөр сунушталсын:

1) ушул тескеменин 1-пунктунда көрсөтүлгөн жер тилкесин муниципалдык менчикке кабыл алуу жана сакталышын камсыз кылуу;

2) ушул тескеменин 1-пунктунда көрсөтүлгөн жер тилкесин мамлекеттик кайра каттоодон өткөрүү;

3) ушул тескеменин 1-пунктунда көрсөтүлгөн жер тилкесин максаттуу багыты боюнча гана пайдаланууну камсыз кылуу;

4) ушул тескеменин 1-пунктунда көрсөтүлгөн жер тилкесин кыйыр же иш жүзүндө ээликтен ажыратууга багытталган ар кандай аракеттерди жасабоо, анын ичинде Кыргыз Республикасынын Ысык-Көл облусунун Каракол шаарынын мэриясы тарабынан контролду жоготууга алып келүүчү келишимдерди түзбөө;

5) жергиликтүү бюджеттин каражаттарынын эсебинен ушул тескеменин 1-пунктунда көрсөтүлгөн жер тилкесин күтүүнү жана андан ары тейлөөнү камсыз кылуу.

3. Кыргыз Республикасынын Министрлер Кабинетине караштуу Жер ресурстары, кадастр, геодезия жана картография боюнча мамлекеттик агенттик ушул тескеменин 1-пунктунда көрсөтүлгөн жер тилкесине менчик укугун мамлекеттик кайра каттоону белгиленген тартипте жүргүзсүн.

4. Бул тескеменин аткарылышын контролдоо Кыргыз Республикасынын Президентинин Администрациясынын Президенттин жана Министрлер Кабинетинин чечимдерин аткарууну контролдоо башкармалыгына жүктөлсүн.