КЫРГЫЗ РЕСПУБЛИКАСЫНЫН МИНИСТРЛЕР КАБИНЕТИНИН тескемеси

2026-жылдын 10-марты № 150-т

Шаардык инфраструктураны өнүктүрүү, социалдык жана спорттук багыттагы объекттерди натыйжалуу пайдалануу, Кыргыз Республикасынын маданий жана спорттук потенциалын жогорулатуу максатында, Кыргыз Республикасынын Министрлер Кабинетинин 2024-жылдын 23-июлундагы № 405 "Мамлекеттик мүлктү муниципалдык менчикке өткөрүп берүүнүн тартибин бекитүү жөнүндө" токтому менен бекитилген Мамлекеттик мүлктү муниципалдык менчикке өткөрүп берүүнүн тартибине, "Мүлккө муниципалдык менчик жөнүндө" Кыргыз Республикасынын Мыйзамынын 5, 6-статьяларына, "Кыргыз Республикасынын Министрлер Кабинети жөнүндө" Кыргыз Республикасынын конституциялык Мыйзамынын 13, 17-беренелерине ылайык:

1. Кыргыз Республикасынын Министрлер Кабинетине караштуу Мамлекеттик мүлктү башкаруу боюнча мамлекеттик агенттик Кыргыз Республикасынын Министрлер Кабинетине караштуу Дене тарбия жана спорт мамлекеттик агенттиги менен биргеликте шаардык инфраструктураны өнүктүрүү боюнча иш-чараларды ишке ашыруу үчүн Бишкек шаары, Тоголок Молдо көчөсү, 40 дарегинде жайгашкан Каба уулу Кожомкул атындагы Спорт ордосунун учурдагы имараттар комплексин жанаша жайгашкан, идентификациялык коду 1-02-04-0028-0326, аянты 2,4143 га жер тилкеси менен Бишкек шаарынын мэриясынын муниципалдык менчигине белгиленген тартипте өткөрүп берсин.

2. Бишкек шаарынын мэриясына белгиленген тартипте төмөнкүлөр сунушталсын:

1) бул тескеменин 1-пунктунда көрсөтүлгөн объектти муниципалдык менчикке кабыл алуу;

2) бул тескеменин 1-пунктунда көрсөтүлгөн объектти күтүүнү жана андан ары тейлөөнү жергиликтүү бюджеттин каражаттарынын эсебинен жүзөгө ашыруу;

3) бул тескеменин 1-пунктунда көрсөтүлгөн объектти андан ары ээликтен ажыратууну жүзөгө ашырбоо жана аны максаттуу багыты боюнча пайдалануу;

4) бул тескеменин 1-пунктунда көрсөтүлгөн объекттин сакталышын, корголушун камсыз кылуу жана аны "Тарыхый-маданий мурастарды коргоо жана пайдалануу жөнүндө" Кыргыз Республикасынын Мыйзамынын талаптарына ылайык пайдалануу боюнча чараларды көрүү;

5) бул тескемеден келип чыгуучу башка чараларды көрүү.

3. Кыргыз Республикасынын Министрлер Кабинетине караштуу Жер ресурстары, кадастр, геодезия жана картография боюнча мамлекеттик агенттик ушул тескеменин 1-пунктунда көрсөтүлгөн объектти белгиленген тартипте кайра каттоону жүзөгө ашырсын.

4. Бул тескеменин аткарылышын контролдоо Кыргыз Республикасынын Президентинин Администрациясынын Президенттин жана Министрлер Кабинетинин чечимдерин аткарууну контролдоо башкармалыгына жүктөлсүн.